ކެޓަލޯނިއާގެ މިނިވަންކަމުގެ ވޯޓާ ގުޅިގެން ސްޕެއިން ހަލަބޮލިކަމެއްގެ ތެރެެއަށް ވެއްޓިފައިވާއިރު ސްޕެއިން އިން ދަނީ އެގައުމުގެ ގައުމީ ދުވަސް ބުރާސްފަތި ދުވަހު ފާހަގަ ކުރުމަށް މަސައްކަތް ކުރަމުންނެވެ. 

ސްޕެއިންގެ ގައުމީ ދުވަހަކީ އޮކްޓޯބަރު މަހުގެ 12 ވަނަ ދުވަސް ކަމަށްވާ އިރު ސްޕެއިންގެ ބޮޑު ވަޒީރު މާރިއާނޯ ރަޚޮއި އެގައުމުގެ ގާނޫނު ހަދާ މަޖިލީހުގައި ބުދަ ދުވަހު ވިދާޅުވީ ސްޕެއިންއަށް މިހާރު ދިމާވެފައިވާ ހާލަތަކީ އެގައުމުގެ 40 އަހަރުގެ ޑިމޮކްރަސީގެ ތާރީޚުގައި ދިމާވެފައިވާ އެންމެ ބޮޑު ނުރައްކާ ކަމަށެވެ. 

ސްޕެއިންގެ ގައުމީ ދުވަހަކީ ޕަބްލިކް ހޮލިޑޭއަކަށްވާއިރު އެދުވަސް ސްޕެއިންގައި ފާހަގަ ކުރަމުން ދަނީ ސްޕެއިންގެ އެކި ސަރަހައްދުތައް އަލުން ރީ-ޔުނިފައި ކުރުން ފާހަގަ ކުރުމަށާއި އަދި 1492 ގައި އެމެރިކާ އަށް އަށް ކްރިސްޓޮފާ ކޮލަމްބަސް ވަޑައިގެންނެެވި ވަޑައިގެންނެވުން ފާހަގަކުރުމަށެވެ. 

ސްޕެއިންގެ ގައުމީ ދުވަހާ ގުޅިގެން ހާއްސަ ޕްރޭޑްތަކާއި އެކި ހަރަކާތްތައް ސްޕެއިންގައި އޮންނާނެއެވެ. 

ކެޓަލޯނިއާ ސްޕެއިން އިން މިނިވަންވުމަށް ކުރާ މަސައްކަތާ ގުޅިގެން ގައުމު ހަލަބޮލިވެފައިވާއިރު، ކެޓަލޯނިއާގެ މިނިވަންކަން އިއުލާން ކުރަން ފެނޭތޯ ބެލުމަށް އޮކްޓޯބަރު 1 ގައި ބޭއްވި ވޯޓުގައި، 90 ޕަސެންޓް މީހުން ސްޕެއިން އިން މިިނިވަން ވާން ފެންނަ ކަމަށް އާނ ބަސް ބުނެފައި ވެއެވެ. ކެޓަލޯނިއާގައި ނެގި ވޯޓާ ގުޅިގެން ސްްޕެއިންގެ މައި ސަރުކާރުން ބުނެފައި ވަނީ އެ ވޯޓަކީ ގާނޫނު އަސާސީއާ ޚިލާފު ބާތިލް އެއްޗެއް ކަމަށެވެ. ވޯޓު ނިމުނުތާ ކުޑަވަގުތުކޮޅެއްގެ ތެރޭގައި ސްޕެއިންގެ ބޮޑުވަޒީރު މާރިއާނޯ ރަޚޮއި ވިދާޅުވީ ޣައިރު ގާނޫނީ ވޯޓެއްގައި ބައިވެރިކޮށް ކެޓަލޯނިއާގެ ރައްޔިތުން މޮޔަ ހައްދާފައިވާ ކަމަށެވެ. ބޮޑުވަޒީރު ވަނީ އެ ވޯޓަކީ ޑިމޮކްރަސީއަށް ކުރި ފުރައްސާރައެއް ކަމަށް ވިދާޅުވެފައެވެ.

ވޯޓަށް ފަހު ކެޓަލޯނިއާގެ މިނިވަންކަން އިއުލާންކޮށްފިތޯ ބަލަން ސްޕެއިން އިން ވަނީ ކެޓަލޯނިއާގެ ލީޑަރަށް ފަސް ދުވަހުގެ މުހުލަތެއް ދީފައެވެ.