އުރީދޫ ދިވެހި ޕްރިމިއާ ލީގުގައި ބޮޑުތަފާތަކުން އއ.މާޅޮސްގެ މައްޗަށް މާޒިޔާ ސްޕޯޓްސް އެންޑް ރެކްރިއޭޝަން ކުރިހޯދައިފިއެވެ.

އަންގާރަ ދުވަހު ހަވީރު ކުޅުނު މެޗު މާޅޮސްއާ ވާދަކޮށް މާޒިޔާ މެޗު ކާމިޔާބު ކުރީ 0-6 ގެ ތަފާތުބޮޑު ނަތީޖާއަކުންނެވެ.

ގަލޮޅު ދަނޑުގައި ކުޅުނު މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ މާޒިޔާއެވެ. އެގޮތުން އެޓީމުން ވަނީ ހަވަނަ މިނެޓުގައި މެޗުގެ ލީޑު ނަގާފައެވެ. މި ލަނޑު އެޓީމަށް ކާމިޔާބު ކޮށްދިނީ މުހައްމަދު އުމެއިރުއެވެ. އޭގެ މިނެޓެއް ފަހުން މާޒިޔާއަށް ލީޑު ފުޅާކޮށްދިނީވެސް އުމެއިރުއެވެ.

މި ލަނޑުތަކަށްފަހު ވެސް މާޒިޔާ އިން ދިޔައީ ފުލުފުލުގައި މާޅޮސްގެ ގޯލަށް ނުރައްކާ ކުރަމުންނެވެ. އެގޮތުން 10 ވަނަ މިނެޓުގައި ކެރިޗް އަންޑްރެޖް ވަނީ މާޒިޔާ އަށް ލީޑު އިތުރަށް ފުޅާކޮށްދީފައެވެ.

ފުރަތަމަ ހާފް ނިމުމުގެ ކުރިން މާޒިޔާގެ ހަތަރުވަނަ ލަނޑު ކާމިޔާބު ކޮށްދިނީ ޔަސްފާދް ހަބީބްއެވެ. މި ލަނޑުތަކާއެކު ފުރަތަމަ ހާފް ނިމުނީ 0-4 ގެ ތަފާތުބޮޑު ނަތީޖާއަކުން މާޅޮސްގެ މައްޗަށް މާޒިޔާ ކުރީގައި އޮވެގެންނެވެ.

ދެވަނަ ހާފް ފެށިގެންވެސް މާޒިޔާގެ ފަރާތުން މޮޅު ކުޅުމެއް ފެނިގެންގޮސްފައިވާއިރު، އެޓީމުން މެޗުގައި ޖެހި ފަސްވަނަ ލަނޑު 70 ވަނަ މިނެޓުގައި ކާމިޔާބު ކޮށްދިނީ އަސްހަދު އަލީ (އަޑުބަރޭ) އެވެ.

މެޗު ނިމުމުގެ ކުރިން މާޒިޔާގެ ހަވަނަ ލަނޑު ކާމިޔާބުކޮށް، އުމެއިރު ވަނީ އޭނާގެ ހެޓްރިކް ފުރިހަމަކޮށްފައެވެ. މެޗުގެ މޮޅު ކުޅުންތެރިޔަކަށް ވެސް ހޮވިފައިވަނީ އުމެއިރުއެވެ.

މި ނަތީޖާއާއެކު މާޒިޔާ އޮތީ ކުޅުނު 11 މެޗުން ލިބުނު 23 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. މެޗުން ބަލިވި މާޅޮސް އޮތީ ކުޅުނު 11 މެޗުން ލިބުނު 8 ޕޮއިންޓާއެކު ޕޮއިންޓް ތާވަލުގެ ހަވަނައިގައެވެ.