ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އަހުމަދު ފާރިސް މައުމޫން ހައްޔަރުކުރި އަމުރާއި ބަންދުކުރި އަމުރުގެ އިސްތިއުނާފް މައްސަލަ ބަލާ ހައިކޯޓުގެ ބެންޗަށް ގެނައި ބަދަލާއެކު މައްސަލަ ކުރިއަށް ގެންދެވޭނެ ކަމަށް އެ ބެންޗުން ކަނޑައަޅައިފި އެވެ.
ފާރިސް ހައްޔަރުކުރަން ނެރުނު އަމުރާއި ޝަރީއަތް ނިމެންދެން ބަންދުކުރި އަމުރު ހައިކޯޓުގައި އިސްތިއުނާފް ކޮށްފައިވާއިރު، އެ މައްސަލަ ކުރިން ބައްލަވަމުން ގެންދެވީ، ހައިކޯޓުގެ އިސްފަނޑިޔާރު އަބްދުﷲ ދީދީ އާއި، ފަނޑިޔާރު އަލީ ސަމީރުގެ އިތުރުން ފަނޑިޔާރު ޢަބްދުލް ރައޫފް އިބްރާހީމް އެވެ.
އެހެން ނަމަވެސް، ހުކުމް އިއްވުމާ ހަމައަށް ގޮސްފައިވަނިކޮށް ފަނޑިޔާރު ސަމީރު ރިޔާސަތު ބެލެހެއްޓެވި ބެންޗަށް ވަނީ ބަދަލު ގެނެސްފަ އެވެ. ފަނޑިޔާރު ސަމީރު ބޭރުކޮށް، ފަނޑިޔާރު ޝުޖާއު އުސްމާން ވަނީ ބެންޗުގެ ރިޔާސަތަށް ހަމަޖައްސަވާފަ އެވެ.
ބެންޗަށް ބަދަލު ގެނައީ މީގެ ކުރިން ސުޕްރީމް ކޯޓުން ކޮށްފައިވާ ހުކުމަކާއި ގާނޫނީ އުސޫލުތަކާ ކަނޑައެޅިގެން ޚިލާފަށް ކަމަށް ބުނެ ފާރިސްގެ ފަރާތުން ވަނީ ބެންޗު ބަދަލުކުރި މައްސަލަ ސުޕްރީމް ކޯޓުގެ ބެލެނެވެރިކަމުގެ އިހުތިސާސްގެ މައްސަލައެއްގެ ގޮތުގައި އެ ކޯޓަށް ހުށަހެޅި އެވެ.
އެ މައްސަލައިގައި ސުޕްރީމް ކޯޓުން މިމަހުގެ 10 ވަނަ ދުވަހު ނިންމި ނިންމުމުގައި ބުނެފައި ވަނީ ފާރިސްގެ ފަރާތުން ހުށަހަޅާ އެ ދަފްއުއަކީ ހައިކޯޓުގެ ޝަރީއަތުގެ މަޖިލީހުގައި ފާރިސްގެ ފަރާތުން އެ ދަފްއު ހުށަހަޅައިފި ނަމަ، އެ އިޖުރާއަތުގެ ސައްޙަކަން ނުވަތަ ނޫން ކަން ގާނޫނީ ސަބަބާއެކު އެ ކޯޓުން ކަނޑައަޅައި މައްސަލައިގައި ފައިސަލާ ކުރަންޖެހޭ މައްސަލައެއް ކަމަށްވާތީ އެގޮތުގެ މަތިން އަމަލުކުރަންޖެހޭ މައްސަލައެއް ކަމަށް ސުޕްރީމް ކޯޓުގެ ފަނޑިޔާރުންގެ މަޖިލީހުން ކަނޑައަޅާފައިވާ ކަމަށެވެ. އަދި އެ ވާހަކަ ހައިކޯޓުގައި ދެންނެވިފައިވާ ކަމަށެވެ.
ސުޕްރީމް ކޯޓުން ގޮތެއް ކަނޑައަޅަންދެން އަޑުއެހުންތައް މަޑުޖައްސާލާފައި ބޭއްވުމަށް ފަހު އަންގާރަ ދުވަހު ބޭއްވި އަޑުއެހުމުގައި ފާރިސްގެ ވަކީލުން ވަނީ އިޖުރާއީ މައްސަލައެއްގެ ގޮތުގައި ބެންޗަށް ބަދަލު ގެނައި މައްސަލަ ހުށަހަޅާފަ އެވެ. އަދި އިސްފަނޑިޔާރު އަބްދުﷲ ދީދީ ބެންޗު ބަދަލުކުރެއްވި އިރު، އަބްދުﷲ ދީދީ އިންނަވައިގެން ބެންޗަށް ބަދަލު ގެނެސްފައިވާ އިޖުރާއަތުގެ ސައްހަކަން ނުވަތަ ނޫންކަން ކަނޑަނޭޅޭނެ ކަމަށް ބުނެ ވަކާލާތު ކޮށްފައިވެއެވެ.
އެހެންނަމަވެސް، އިސްފަނޑިޔާރު އަބްދުﷲ ދީދީ އިންނެވި ބެންޗުގެ އިއްތިފާގުން ނިންމީ، އަބްދުﷲ ދީދީ އިންނަވައިގެން އިޖުރާއަތުގެ ސައްހަކަން ނުވަތަ ނޫންކަން ކަނޑައެޅޭނެ ކަމަށެވެ. އެއަށްފަހު ބެންޗަށް ގެނެސްފައިވާ އިޖުރާއަތު ސައްހަ ކަމަށް ކަނޑައަޅައި، އެ ބެންޗުން މައްސަލަ ބެލޭނެ ކަމަށް ވެސް ވަނީ ކަނޑައަޅާފަ އެވެ.
ބެންޗަށް ބަދަލު ގެނައި އިޖުރާއަތުގެ ސައްޙަކަން ނުވަތަ ނޫން ކަން ގާނޫނީ ސަބަބާ އެކު ހައިކޯޓުން ކަނޑައަޅަންވާނެ ކަމަށް ސުޕްރީމް ކޯޓުން އަންގާފައި އޮތް ނަމަވެސް، އިޖުރާއަތު ސައްހަ ކަމަށް ކަނޑައެޅި ގާނޫނީ ސަބަބުތަކެއް ހާމަކޮށްފައެއް ނުވެއެވެ.
އަންގާރަ ދުވަހުގެ އަޑުއެހުން ނިންމާލާފައި ވަނީ އިތުރު އަޑުއެހުމެއް ބާއްވާނެ ކަން އިއުލާނުކުރުމަށްފަހުގަ އެވެ.
ފާރިސް ހައްޔަރުކުރުމަށް ނެރުނު އަމުރުގެ ދަށުން، ޖުލައި 18 ވަނަ ދުވަހު އޭނާ ހައްޔަރުކުރުމަށް ފަހު، ބަންދާ މެދު ގޮތެއް ނިންމުމަށް ޖުލައި 19 ވަނަ ދުވަހު ކްރިމިނަލް ކޯޓަށް ހާޒިރުކުރުމުން، ތުހުމަތު ކުރެވޭ މައްސަލައިގެ ތަހުގީގު ނިންމައި ދައުވާކޮށް ޝަރީއަތް ނިމެންދެން ހޯމް މިނިސްޓްރީން ކަނޑައަޅާ ތަނެއްގައި ބަންދުކުރުމަށް ވަނީ އަމުރުކޮށްފައެވެ. ފާރިސް ބަންދުކޮށްފައި ވަނީ މާފުށީ ޖަލުގައެވެ.
ފާރިސް ހައްޔަރުކުރީ ރައްޔިތުންގެ މަޖިލިސް މެންބަރަކަށް ރިޝްވަތު ދެއްވި ކަމަށް ބުނެ އެވެ.ޝަރީއަތް ނިމެންދެން ބަންދުކުރި އިރު، ތަހުގީގު ވެސް ނިމިފައިނުވެ އެވެ. ނަމަވެސް، އޯގަސްޓް 22 ވަނަ ދުވަހު އެ މައްސަލައިގައި ދައުވާކޮށް އިބްތިދާއީ އަޑުއެހުން ވަނީ ފަށާފަ އެވެ.
