ބާރަ ވަނަ ގައުމީ ބާސްކެޓްބޯލް ލީގުގެ ދެވަނަ ޑިވިޝަނުގެ ޗެމްޕިއަންކަން އެއްވެސް މެޗަކުން ބަލިނުވެ ސްޓިންޖާސް ބީސީއިން ހޯދައިފިއެވެ.

މި މުބާރާތުގެ ޗެމްޕިއަންކަން ސްޓިންޖާސް ބީސީއިން ހޯދާފައިވަނީ ފަހު މެޗުގައި ކްލަބް އެޗްޑީސީގެ މައްޗަށް ކުރި ހޯދައިގެންނެވެ. ވާދަވެރި ކުޅުމަކަށްފަހު ސްޓިންޖާސްއިން މި މެޗު ކާމިޔާބު ކޮށްފައިވަނީ 67 ޕޮއިންޓް 63 ޕޮއިންޓް އިންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވިފައިވަނީ ކްލަބް އެޗްޑީސީގެ ޖާޒީ ނަމްބަރު 5، އިސްމާއިލް ޝިހާމް އެވެ.

އުއްމީދީ ޒުވާން ގިނަ ކުޅުންތެރިންގެ މައްޗަށް އެކުލެވޭ ސްޓިންޖާސްއިން މިމުބާރާތުގެ ޗެމްޕިއަންކަން ހޯދާފައިވަނީ ކުޅުނު އަށް މެޗުވެސް ކާމިޔާބު ކޮށްގެންނެވެ. އެ ޓީމުނެ 16 ޕޮއިންޓް ހޯދާފައިވާއިރު މިމުބާރާތުގެ ދެވަނައަށް ދިޔަ ކްލަބް އެޗްޑީސީއަށް ލިބިފައިވަނީ 13 ޕޮއިންޓްއެވެ. އަދި ތިންވަނައިގައި އޮތް އެލްކިއު ސްޕޯޓްސްއަށް 12 ޕޮއިންޓް ލިބިފައިވާއިރު 11 ޕޮއިންޓާއެކު ހަތަރު ވަނައިގައި އޮތީ ރެޑްވިންގްސް ބީސީއެވެ. މި މުބާރާތުގެ ޕޮއިންޓް ތާވަލުގެ ފުލުގައި އަށް ޕޮއިންޓާއެކު އޮތީ ކީން ސްޕޯޓްސް ކްލަބެވެ. މުޅު މުބާރާތުގައި ވެސް 629 ޕޮއިންޓާއެކު އެންމެ ގިނަ ޕޮއިންޓް އެއްކުރީ ވެސް ސްޓިންޖާސް ބީސީއިންނެވެ.

މި މުބާރާތުގެ އެންމެ މޮޅު ކުޅުންތެރިޔަކަށް ހޮވިފައިވަނީ ކްލަބް އެޗްޑީސީގެ ޖާޒީ ނަމްބަރު 4، ޝިރުފާން އަހުމަދު އެވެ. މު މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައި ހިމެނެނީ އެލްކިއު ސްޕޯޓްސްގެ ޖާޒީ ނަމްބަރު 10، އަހުމަދު ނާއިފް ރަޝީދްއާއި ރެޑްވިންގްސް ބީސީގެ ޖާޒީ ނަމްބަރު 15، އަހުމަދު ޔާފިއު ރަޝީދުއާއި ހަމަ އެ ޓީމުގެ ޖާޒީ ނަމްބަރު 11 މުހައްމަދު އަޝްމަލް އަހުމަދުގެ އިތުރުން ސްޓިންޖާސްގެ ޖާޒީ ނަމްބަރު 14، މުހައްމަދު ޝައުފް މިންތާޒްގެ އިތުރުން ހަމަ އެ ޓީމުގެ ޖާޒީ ނަމްބަރު 8، މުހައްމަދު ސަބީހު ތައުފީގު އެވެ.

ކޮންމެ އަހަރަކު އެއްފަހަރު ބާސްކެޓްބޯލް އެސޯސިއޭޝަނުން އިންތިޒާމުކޮށްގެން ބާއްވާ މި މުބާރާތުގެ ފިރިހެން ދެވަނަ ޑިވިޝަނުގައި މި އަހަރު ބައިވެރިވީ ފަސް ޓީމަކުންނެވެ. އެއީ އެލްކިއު ސްޕޯޓްސް، ކީން ސްޕޯޓްސް، ކްލަބް އެޗްޑީސީ، ރެޑްވިންގްސް ބީސީގެ އިތުރުން ސްޓިންޖާސް ބީސީއެވެ.