ބިލްބާއޯ ބަލިކޮށް، ބާސާ އިން ބަލިނުވުމުގެ ރެކޯޑް ދަމަހައްޓައިފި

ސްޕެނިޝް ލީގުގައި އެތުލެޓިކް ބިލްބާއޯ އާއި ބައްދަލުކުރި މެޗު ކާމިޔާބުކޮށް، ބާސެލޯނާ އިން ލީގުގައި ބަލިނުވުމުގެ ރެކޯޑް ދަމަހައްޓައިފި އެވެ.

ސްޕެނިޝް ލީގުގައި ހޮނިހިރު ދުވަހުގެރޭ ރަށުން ބޭރުގައި އެތުލެޓިކް ބިލްބާއޯގެ މައްޗަށް ކުރިހޯދީ ދެ ލަނޑު ސުން ލަނޑުންނެވެ.

މިމެޗުގެ 36 ވަނަ މިނިޓުގައި ބާސާ އަށް ކުރިހޯދައިދިނީ އާޖެންޓީނާގެ ފޯވާޑް ލިއޮނެލް މެސީ އެވެ.

މިނަތީޖާ އާއެކު މެޗުގެ ފުރަތަމަ ހާފްގެ ކުޅުން ނިމުނުއިރު، ދެވަނަ ހާފްގައި ބިލްބާއޯ އިން ވަނީ މޮޅު ކުޅުމެއް ދައްކައި، ބާސާގެ ގޯލަށް ނުރައްކާ ކޮށްފައެވެ.

އެގޮތުން ބިލްބާއޯގެ ރައުލް ގާސިއާ ފޮނުވާލި ހަމަލާއެއް ގޯލުގެ މަތީ ދަނޑިއަށް އަމާޒުވިއިރު، އެރިޓްޒް އަދޫރިޒް ފޮނުވާލި ހަމަލާއެއް ބާސާގެ ކީޕަރު މާކް އަންދްރެ ޓަރ-ސްޓެގަން ވަނީ ދިފާއުކޮށްފައެވެ.

މިމެޗުގެ އިތުރު ވަގުތުގެ ތެރޭގައި ބާސެލޯނާ އަށް ލީޑު ފުޅާކޮށްދިނީ ޕައުލީނިއޯ އެވެ.

މިމޮޅާއެކު ލީގު ތާވަލްގެ ކުރީގައިވާ ބާސެލޯނާ އިން މިސީޒަނުގައި ސްޕެނިޝް ލީގުގައި ކުޅުނު 10 މެޗުން ވަނީ 28 ޕޮއިންޓް ހަމަކޮށްފައެވެ. ބާސާ ކުޅުނު 10 މެޗުން 9 މެޗު ކާމިޔާބު ކުރިއިރު، އެއް މެޗު ނިމިފައިވަނީ އެއްވަރު ވެގެންނެވެ.

ސްޕެނިޝް ލީގުގައި ހޮނިހިރު ދުވަހުގެރޭ ރޭ އަލާވެސްގެ މައްޗަށް ދެ ލަނޑު އެއް ލަނޑުން ކުރިހޯދައިގެން، ވެލެންސިއާ ވެސް ވަނީ ލީގުގައި ބަލިނުވުމުގެ ރެކޯޑް ދަމަހައްޓާފައެވެ.

މިމެޗުގެ 34 ވަނަ މިނިޓުގައި ވެލެންސިއާ އަށް ކުރިހޯދައިދިނީ ސިމޯން ޒަޒާ އެވެ. 49 ވަނަ މިނިޓުގައި އެލެކްސިސް ޖަހައިދިން ލަނޑުން އަލާވެސް އިން ނަތީޖާ ހަމަހަމަކުރިއިރު، 66 ވަނަ މިނިޓުގައި ލިބުނު ޕެނަލްޓީ އަކުން ވެލެންސިއާ އަށް ދެވަނަ ފަހަރަށް ކުރިހޯޑައިދިނީ ރޮޑްރިގޯ އެވެ.

މިމޮޅާއެކު 10 މެޗުން 24 ޕޮއިންޓް ހަމަކޮށްގެން ވެލެންސިއާ އޮތީ ތާވަލްގެ ދެވަނާގައެވެ. ވެލެންސިއާ ވެސް މިސީޒަނުގައި ސްޕެނިޝް ލީގުގައި ކުޅުނު އެއްވެސް މެޗަކުން ބަލިވެފައެއްނުވެއެވެ.

ސްޕެނިޝް ލީގުގައި ރޭ އެތުލެޓިކޯ މެޑްރިޑާއި ވިޔަރެއާލް ކުޅުނު މެޗު ނިމުނީ އެއް ލަނޑު އެއް ލަނޑުން އެއްވަރުވެގެންނެވެ. މިމެޗުގެ 61 ވަނަ މިނިޓުގައި އެތުލެޓިކޯ އަށް ކުރިހޯދައިދިނީ އެންޚެލް ކޮއްރެއާ އެވެ. މެޗު ނިމެން ނުވަ މިނިޓަށް ވެފައިވަނިކޮށް ވިޔަރެއާލް އަށް ނަތީޖާ ހަމަހަމަކޮށްދިނީ ކާލޯސް ބައްކާ އެވެ.

މިނަތީޖާއާއެކު އެތުލެޓިކޯ މެޑްރިޑް އޮތީ 10 މެޗުން 20 ޕޮއިންޓާއެކު ތާވަލްގެ ހަތަރުވަނާގައެވެ. އެތުލެޓިކޯ އަށްވުރެ އެއް މެޗު މަދުން ކުޅެގެން ތާވަލްގެ ތިންވަނާގައިވާ ރެއާލް މެޑްރިޑަށް ވެސް ލިބިފައިވަނީ 20 ޕޮއިންޓެވެ.

ސްޕެނިޝް ލީގުގައި ލެގާނޭސްގެ މައްޗަށް ސެވިއްޔާ ކުރިހޯދީ ދެ ލަނޑު އެއް ލަނޑުންނެވެ.

ލީގުގައި އާދީއްތަ ދުވަހު ގެޓާފޭ އާއި ދެކޮޅަށް ރަށުން ބޭރުގައި ރެއާލް ސޮސިއަޑަޑް ނުކުންނައިރު، ރަށުން ބޭރުގައި ޗެމްޕިއަން ރެއާލް މެޑްރިޑް ނުކުންނާނީ ޖިރޫނާ އާއި ދެކޮޅަށެވެ. އަދި ރަށުން ބޭރުގައި ލެވަންޓޭ ނުކުންނާނީ އެއިބާ އާއި ދެކޮޅަށެވެ.