ޑަބްލިއުޓީއޭ ފައިނަލްސް: ސެމީގައި ވާދަކުރާ ކުޅުންތެރިން ކަށަވަރުވެއްޖެ

ސިންގަޕޫރުގައި މިހާރު ކުރިޔަށްދާ ޑަބްލިއުޓީއޭ ފައިނަލްސްގެ ސެމީ ފައިނަލުގައި ވާދަކުރާ ކުޅުންތެރިން ކަށަވަރުވެއްޖެއެވެ.

މިމުބާރާތުގެ ރައުންޑް ރޮބިންގެ ކުޅުމުގެ ފަހު ދުވަހާ ހަމަޔަށް ސެމީގެ ޖާގަ ކަށަވަރު ކޮށްފައިވަނީ ކޮންމެ ގްރޫޕަކުން ވެސް އެންމެ ކުޅުންތެރިޔެކެވެ. އެގޮތުން ފުރަތަމަ ގްރޫޕުން ސެމީގެ ޖާގަ ޗެކް ރިޕަބްލިކްގެ ކެރޮލައިން ޕްލިސްކޯވާ ހޯދިއިރު ދެވަނަ ގްރޫޕުން ސެމީއަށް ދަތުރުކުރީ ޑެންމާކުގެ ކެރޮލައިން ވޮޒްނިއާކީއެވެ.

ފުރަތަމަ ގްރޫޕުން ސެމީގެ ދެވަނަ ޖާގަ ފަހު ދުވަހު ކުޅުނު މެޗު ކާމިޔާބުކޮށް ވީނަސް ވިލިއަމްސް ވަނީ ކަށަވަރު ކޮށްފައެވެ. އޭނާ ވަނީ ގްރޫޕް ސްޓޭޖުގެ ފަހު މެޗުގައި މިއަހަރުގެ ވިމްބެލްޑަން މުބާރާތް ކާމިޔާބުކުރި ގާބައިން މުގުރްޒާ ސީދާ ދެ ސެޓުން ބަލިކޮށްފައެވެ. މިމެޗުގެ ސެޓުތައް ވީނަސް ގެންގޮސްފައިވަނީ 7-5 އަދި 6-4 އަކުންނެވެ. މިއަހަރުގެ ވިމްބެލްޑަން ފައިނަލުގައި ވީނަސް ވަނީ މުގުރްޒާ އަތުން ބަލިވެފައެވެ. މިއީ ވީނަސްގެ ކެރިއަރުގައި އޭނާ ޑަބްލިއުޓީއޭ ފައިނަލްސް މުބާރާތުގެ ސެމީގައި ވާދަކުރާ ފަސް ވަނަ ފަހަރެވެ.

މި ގްރޫޕުގެ ދެވަނަ މެޗުގައި ޖެލޭނާ އޮސްޓަޕެންކޯ ވަނީ ޗެކް ރިޕަބްލިކްގެ ކެރޮލައިން ޕްލިސްކޯވާ ސީދާ ދެ ސެޓުން ބަލިކޮށްފައެވެ. މި މެޗުގެ ސެޓުތައް އޮސްޓަޕެންކޯ ގެންގޮސްފައިވަނީ 6-3 އަދި 6-1 އަކުންނެވެ. މި މެޗުން ބަލިވި ނަމަވެސް އޮސްޓަޕެންކޯއަށް ވަނީ ގްރޫޕުގެ ފުރަތަމަ ދެ މެޗު ކާމިޔާބު ކޮށްފައިވާތީ ސެމީގެ ޖާގައެއް މި މެޗަށް ނުކުތުމުގެ ކުރިން ވެސް ކަށަވަރުވެފައެވެ. އަދި މި މުބާރާތް ޕްލިސްކޯވާ ކާމިޔާބު ކޮށްފި ނަމަ އޭނާއަށް ދުނިޔޭގެ ރޭންކިންގެ އެއްވަނަ ލިބޭނެއެވެ.

މި މުބާރާތުގެ ސެމީގެ ފަހު ޖާގަ ކަށަވަރު ކޮށްފައިވަނީ ފްރާންސްގެ ކެރޮލައިން ގާސިއާއެވެ. އެގޮތުން ދެވަނަ ގްރޫޕުގެ ރައުންޑް ރޮބިން ފަހު މެޗުގައި އޭނާ ވަނީ ޑެންމާކުގެ ކެރޮލައިން ވޮޒްނިއާކީ ދެ ސެޓު އެއް ސެޓުން ބަލިކޮށްފައެވެ. މުބާރާތުގެ ސެމީގެ ޖާގައެއް ކަށަވަރު ކޮށްފައިވާ ވޮޒްނިއާކީ ފުރަތަމަ ސެޓު 6-0 އަކުން ގެންދިޔަ ނަމަވެސް ގާސިއާ ވަނީ ފަހު ދެ ސެޓު 6-3 އަދި 7-5 އަކުން ގެންގޮސް ސެމީގެ ޖާގައެއް ކަށަވަރު ކޮށްފައެވެ.

ދުނިޔޭގެ ރޭންކިންގެ އެއްވަނައިގައި މިވަގުތު އޮތް ރޯމޭނިއާގެ ސައިމޯނާ ހޭލެޕް ވަނީ ސީދާ ދެ ސެޓުން ޔޫކްރެއިންގެ އެލީނާ ސްވިޓްލޯނާ އަތުން ބަލިވެ މި މުބާރާތުން ކަޓާފައެވެ. ސްވިޓްލޯނާ މި މުބާރާތުގެ ސެޓުތަށް ގެންގޮސްފައިވަނީ 6-3 އަދި 6-4 އަކުންނެވެ. މި މެޗުން ބަލިވުމާއެކު ހޭލެޕްއަށް ދުނިޔޭގެ ރޭންކިންގެ އެއްވަން ގެއްލުމަކީ އެކަށީގެންވާ ކަމެކެވެ.

ސެމީގެ ފުރަތަމަ މެޗުގައި އަށް ވަނައަށް ސީޑު ކުރެވިފައިވާ ކެރޮލައިން ގާސިއާ ނުކުންނާނީ ވީނަސް ވިލިއަމްސްއާ ދެކޮޅަށެވެ. އަދި ސެމީގެ ދެވަނަ މެޗުގައި ކެރޮލައިން ޕްލިސްކޯވާ ނުކުންނާނީ ކެރޮލައިން ވޮޒްނިއާކީއާ ދެކޮޅަށެވެ.