ފްރެންޗް ލީގު: ކަވާނީގެ ދެ ލަނޑާއެކު ޕީއެސްޖީ ބަލިނުވުމުގެ ރެކޯޑު ދަމަހައްޓައިފި

ފްރެންޗް ލީގުގައި ކަވާނީ ކާމިޔާބު ކޮށްދިން ދެ ލަނޑާއެކު ޕީއެސްޖީ ބަލިނުވުމުގެ ރެކޯޑު ދަމަހައްޓައިފިއެވެ.

ހުކުރު ދުވަހުގެ ރޭ އަމިއްލަ ދަނޑުގައި ނީސްއާ ދެކޮޅަށް ކުޅުނު މެޗުން ޕީއެސްޖީ މޮޅުވެފައިވަނީ 3-0 ގެ ނަތީޖާއަކުންނެވެ. މި މެޗުގައި އެ ޓީމުގެ ފަރާތުން ވަނީ މޮޅު ކުޅުމެއް ފެނިގެން ގޮސްފައެވެ. އެގޮތުން އެ ޓީމުން ވަނީ ގިނަ ވަގުތު ބޯޅަ ގެންގުޅެ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ.

ޕީއެސްޖީއިން މެޗުގައި ޖެހި ފުރަތަމަ ލަނޑު މެޗުގެ 3 ވަނަ މިނެޓުގައި އެންހެލް ޑިމަރިއާގެ އެހީތެރި ކަމާއެކު އެ ޓީމަށް ކާމިޔާބު ކޮށްދިނީ އުރުގުއޭގެ އިތުބާރު ފޯވާޑް އެޑިންސަން ކަވާނީއެވެ. މި ލަނޑަށް ފަހުވެސް އެ ޓީމުން ވަނީ ރަނގަޅަށް ކުޅެ ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. ނަތީޖާއެއްގެ ގޮތުން 31 ވަނަ މިނެޓުގައި ޑިމިރިއާ ނަގައިދިން ހުރަހެއް ބޮލުން ގޯލުގެ ތެރެއަށް ފޮނުވާލައިގެން ކަވާނީ ވަނީ އެ ޓީމުގެ ލީޑު ފުޅާ ކޮށްދީފައެވެ.

ފުރަތަމަ ހާފު 2-0 ގެ ނަތީޖާއެއްގެ ގޮތުން ޕީއެސްޖީ ކުރީގައި އޮވެގެން ނިމިގެން ދިޔައިރު އެ ޓީމުން ވަނީ މިހާފުގައިވެސް ލަނޑު ޖެހުމަށް ރަނގަޅު ފުރުސަތުތަކެއް ތަނަވަސް ކޮށްފައެވެ. އެ ޓީމުގެ ތިންވަނަ ލަނޑަކީ 52 ވަނަ މިނެޓުގައި ނީސްގެ ބްރެޒިލް ޑިފެންޑާ ޑާންޓޭ އަތުން ބައިކޮޅަށް ވަން ލަނޑެކެވެ.

މި މެޗަށް ޕީއެސްޖީ ނުކުމެފައިވަނީ ދުނިޔޭގެ އެންމެ އަގުބޮޑު ކުޅުންތެރިޔާގެ ނޭމާ ނުލާކަން ފާހަގަކޮށްލެވެއެވެ. އެގޮތުން މިދިޔަ ހަފްތާގައި މާސޭއާ ދެކޮޅަށް ކުޅުނު މެޗުގައި އެނާ ކުޅުންތެރިއަކަށް ހަމަލާ ދިނުމާ ވިދިގެން އެނާ ވަނީ އެއް މެޗަށް ސަސްޕެންޑް ކޮށްފައެވެ.

މި ނަތީޖާއާއެކު ޕީއެސްޖީ އޮތީ ކުޅުނު 10 މެޗުން ލިބުނު 29 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ޕީއެސްޖީ ލީގުގައި ކުޅުނު އެއްވެސް މެޗަކުން އަދި ބަލިނުވެއެވެ. ނީސް އޮތީ ކުޅުނު ކުޅުނު 11 މެޗުން ލިބުނު 10 ޕޮއިންޓާއެކު ޕޮއިންޓް ތާވަލުގެ14 ވަނައިގައެވެ. ދެވަނައިގައި 22 ޕޮއިންޓާއެކު އޮތީ މޮނާކޯއެވެ.