އެމްބީއޭ ދެވަނަ ޑިވިޝަން: ސްޓިންޖާސް ހުއްޓުވޭނެ ޓީމެއް ނެތް

ބާރަ ވަނަ ގައުމީ ބާސްކެޓްބޯލް ލީގުގެ ދެވަނަ ޑިވިޝަނުގައި ސްޓިންޖާސް ކުޅުނު މެޗު އެ ޓީމުން އަނެއްކާ ވެސް ކާމިޔާބު ކުރިއިރު އެޗްޑީސީ ވެސް މޮޅުވެއްޖެއެވެ.

މިހާތަނަށް މި މުބާރާތުގައި ކުޅުނު ހުރިހާ މެޗެއް ވެސް ސްޓިންޖާސްއިން ކާމިޔާބު ކޮށްފައިވާއިރު އެ ޓީމުން ވަނީ ކީން ސްޕޯޓްސް 122 ޕޮއިންޓް 45 ޕޮއިންޓް އިން ބަލިކޮށްފައެވެ. ސްޓިންޖާސްގެ ޒުވާން ކުޅުންތެރިންގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު މި މެޗުގެ މޮޅު ކުޅުންތެރިޔަކަށް ހޮވިފައި ވަނީ އެ ޓީމުގެ ޖާޒީ ނަމްބަރު 6، އައިހަމް އަބްދުލް ހަމީދްއެވެ.

އެ ޓީމަށް އެންމެ ގިނަ ޕޮއިންޓް 28 ޕޮއިންޓާއެކު ހޯދައިދީފައި ވަނީ ވެސް އޭނާއެވެ. މި މެޗުގައި ކީން ސްޕޯޓްސްއަށް އެންމެ ގިނަ ޕޮއިންޓް އެއްކޮށްދިން ކުޅުންތެރިޔަކީ އެ ޓީމުގެ ޖާޒީ ނަމްބަރު 7، މުހައްމަދު ޖިނާން އަބްދުﷲ އެވެ. މި މެޗުގައި އޭނާ ވަނީ އެ ޓީމަށް 11 ޕޮއިންޓް އެއްކޮށްދީފައެވެ.

މި މުބާރާތުގައި ސްޓިންޖާސްއާ އެންމެ ބޮޑަށް ވާދަކުރަމުން އަންނަ އެއް ޓީމު ކަމަށްވާ ކްލަބް އެޗްޑީސީއިން ވަނީ 73 ޕޮއިންޓް 69 ޕޮއިންޓްއިން ރެޑްވިންގްސް ބީސީ ބަލިކޮށްފައެވެ. މި މެޗުގެ މޮޅު ކުޅުންތެރިޔަކަށް ހޮވިފައި ވަނީ ރެޑްވިންގްސް ބީސީގެ ޖާޒީ ނަމްބަރު 15 އާދަމް ޔާފިއު އިބްރާހިމްއެވެ. މި މެޗުގައި 23 ޕޮއިންޓާއެކު އެ ޓީމަށް އެންމެ ގިނަ ޕޮއިންޓް ހޯދައިދިނީ ވެސް ޔާފިއުއެވެ. ކްލަބް އެޗްޑީސީއަށް 22 ޕޮއިންޓާއެކު އެންމެ ގިނަ ޕޮއިންޓް ހޯދައިދިނީ އެ ޓީމުގެ ޖާޒީ ނަމްބަރު 12 އާސިފް އިބްރާހިމްއެވެ.

މި މުބާރާތުގެ ދެވަނަ ބުރުގެ ކުޅުން ފަށާފައިވާއިރު މުބާރާތުގެ ކުޅުންތެރިންގެ ރޭންކިންގައި މިހާތަނަށް ގަދަ ފަހެއްގައި ހިމެނިފައިވާ ކުޅުންތެރިންނަކީ އެލްކިއު ސްޕޯޓްސްގެ އަހުމަދު ނާއިފް ރަޝީދްއާ ކްލަބް އެޗްޑީސީގެ ޝިރުފާން އަހުމަދުއާ ސްޓިންޖާސް ބީސީގެ މުހައްމަދު ޝައުފް މިންތާޒްއާ، ހަމަ އެ ޓީމުގެ މުހައްމަދު ސަބީހު ތައުފީގުގެ އިތުރުން އެޗްޑީސީގެ އާސިފް އިބްރާހިމްއެވެ.

މިހާތަނަށް މުޅި މުބާރާތުގައި އެންމެ ގިނަ ޕޮއިންޓް ހަމަކޮށްފައިވަނީ ސްޓިންޖާސްގެ ޝައުފްއެވެ. އޭނާ ވަނީ އެ ޓީމަށް 112 ޕޮއިންޓް ހަމަކޮށްދީފައެވެ. ހަމައެހެންމެ 38 އެސިސްޓާއެކީ މުޅި މުބާރާތުގެ އެންމެ ގިނަ އެސިސްޓް ދިން ކުޅުންތެރިޔަކީ ސްޓިންޖާސްގެ ސަބީހުއެވެ.

ކޮންމެ އަހަރަކު އެއްފަހަރު ބާސްކެޓްބޯލް އެސޯސިއޭޝަނުން އިންތިޒާމުކޮށްގެން ބާއްވާ މި މުބާރާތުގެ ފިރިހެން ދެވަނަ ޑިވިޝަނުގައި މި އަހަރު ބައިވެރިވެފައި ވަނީ ފަސް ޓީމަކުންނެވެ. އެއީ އެލްކިއު ސްޕޯޓްސް، ކީން ސްޕޯޓްސް، ކްލަބް އެޗްޑީސީ، ރެޑްވިންގްސް ބީސީގެ އިތުރުން ސްޓިންޖާސް ބީސީއެވެ.