ބޮލީވުޑްގެ ތަރި ޝާހިދު ކަޕޫރު ދެން ޝޫޓް ކުރަން ފަށާނީ "ބައްތީ ގުލް މީޓަރް ޗާލޫ" ކަމަށް އޭނާ ބުނެފިއެވެ. އޭނާގެ އެންމެ ފަހުގެ ފިލްމު އިއުލާންކޮށްފައިވަނީ ދިވާލީ ހަފްލާގައެވެ. އިންޑިއާގައި އެންމެ ކުލަގަދަކޮށް ފާހަގަކުރާ އެއް ފެސްޓިވަލް ކަމަށްވާ ދިވާލީ ހަފްލާގައި ޝާހިދު ބުނީ އޭނާގެ އެންމެ ފަހުގެ ފިލްމު "ބައްތީ ގުލް މީޓަރް ޗާލޫ"ގެ މަސައްކަތް ވަރަށް އަވަހަށް ފައްޓާނެކަމަށެވެ.
މި ފިލްމު ޑައިރެކްޓް ކުރާނީ ޝްރީ ނަރާޔަން ސިންހްއެވެ. އޭނާ އަކީ މިއަހަރު ނިކުތް "ޓޮއިލެޓް ޕްރޭމް ކަތާ"ގެވެސް ޑައިރެކްޓަރެވެ. "ބައްތީ ގުލް މީޓަރް ޗާލޫ" އަކީ ޓީ ސީރީޒްއާއި ކްރިއަރްޖް އެންޓަޓެއިންމަންޓް ގެ ޕްރޮޑަކްޝަނެކެވެ. "ބައްތީ ގުލް މީޓަރް ޗާލޫ" އަކީ އިންޑިއާގެ ކަރަންޓުގެ މައްސަލައިގެ މައްޗަށް އުފައްދާ ފިލްމެއް ކަމަށް ރިޕޯޓް ތައް ބުނެއެވެ. ޝްރީ ނަރާޔަން ސިންހް އުފެއްދި "ޓޮއިލެޓް ޕްރޭމް ކަތާ" އަކީ ވެސް އެކަހަލަ ސޯޝަލް މައްސަލައެއްގެ މައްޗަށް ބިނާކޮށް އުފެއްދި ފިލްމެކެވެ. މިފިލްމަކީ އިންޑިއާގެ ފަގީރު ހިސާބުތަކުގައި ފާޚާނާތައް ހެދުމުގެ މުހިންމު ކަމުގެ މައްޗަށް އަލިއަޅުވާލާ ހަދާފައިވާ ފިލްމެކެވެ. ފިލްމުގެ ލީޑުރޯލު ކުލެފައިވަނީ އަކްޝޭ ކުމާރާއި ބޫމީ ޕެޑްނެކާއެވެ.އެހެން ނަމަވެސް "ބައްތީ ގުލް މީޓަރް ޗާލޫ"ގައި ޝާހިދުގެ އިތުރުން ދެން ފެނިގެންދާނެ އެކްޓަރެއް އަދި ހާމަ ކޮށްފައެއް ނުވެއެވެ.
ޝާހިދު ސިނަމާތަކުން ދެން އެންމެ އަވަހަށް ފެނިގެންދާނީ ޑިސެމްބަރު މަހުގެ 1 ވަނަ ދުވަހު ރިލީޒްކުރާ "ޕާދްމަވަތީ" އިންނެވެ. އެފިލްމުގައި ޝާހިދުގެ އިތުރުން ފެނިގެންދާނީ ދީޕިކާ ޕަދުކޯންއާއި ރަންވީރު ސިންހެވެ.
