ޑާކްރެއިންގެ ފިލްމަކުން ޖުމައްޔިލް އާއި މަޖޫ ފެންނާނެ ފަހު ފިލްމަކީ ނޮވެންބަރ: މޮގާ

ރާއްޖޭގެ އެންމެ ކާމިޔާބު އެއް ޕްރޮޑަކްޝަން ކަމަށްވާ ޑާކްރެއިން އެންޓަޓެއިންމަންޓުގެ ފިލްމަކުން މަރިޔަމް މަޖުދާއާއި ޖުމައްޔިލް ނިމާލް ޕެއަރ އެއްގެ ގޮތުގައި ފެނިގެންދާނެ އެންމެ ފަހު ފިލްމަކީ "ނޮވެންބަރ" ކަމަށް ފިލްމުގެ ޕްރޮޑިއުސަރ މުޙައްމަދު ޢަލީ (މޮގާ) ބުނެފިއެވެ.

ރާއްޖެއެމްވީއަށް މަޢުލޫމާތުދެމުން މޮގާ ބުނީ އަންނަ އަހަރު ރިލީޒް ކުރުމަށް ހަމަޖެހިފައިވާ ފިލްމު "ނޮވެންބަރ" އަކީ މި ދެތަރިން އެކުގައި ފެނިގެންދާ ޑާކްރެއިން އެންޓަޓެއިންމަންޓްގެ ހަތަރު ވަނަ ފިލްމު ކަމަށާއި އަދި މިއީ ޑާކްރެއިން އެންޓަޓެއިންމަންޓްގެ ފިލްމަކުން އެ ދެތަރިން އެކުގައި ޕެއަރ އެއްގެ ގޮތުގައި ފެނިގެންދާނެ އެންމެ ފަހު ފިލްމް ކަމަށެވެ.

މި ނިންމުމަކީ އެ ދެތަރިންނާއި އެއްވެސް މައްސަލައެއް އޮވެގެން ނިންމި ނިންމުމެއް ނޫން ކަމަށާއި ކުރިއަށް ހުރި ޑާކްރެއިންގެ ފިލްމުތަކުން ޖުމައްޔިލް އާއި މަޖޫ ފެނިގެންދާނެ ކަމަށެވެ.

ނޮވެންބަރު މި ފިލްމާއި ގުޅޭ ގޮތުން މޮގާ ބުނީ މި ފިލްމަކީ ޑާކްރެއިން އިން ތައްޔާރު ކުރާ ލޯބީގެ ފިލްމެއް ކަމަށާއި އެ ދަތަރިންގެ ކެމިސްޓްރީ ގުޅޭކަން މި ފިލްމުން ފެނިގެންފާނެ ކަމަށެވެ.

ނޮވެންބަރ ގެ 95 ޕަސެންޓް ޝޫޓިންތައް މިހާރު ނިންމާލާފައިވާއިރު މި ފިލްމުގެ ޝޫޓިންތައް ނަގާފައިވަނީ މާލެ ސިޓީ، އައްޑޫ ސިޓީ، ކ. ތުލުސްދޫ، ލ އަތޮޅުގެ އިތުރުން ސިންގަޕޫރުގައެވެ.

އަޙްމަދު ޠަލާލާއި، ޢާއިޝަތު ފުއާދުގެ ސްކްރީން ޕްލޭއަކަށް ޢާއިޝަތު ފުއާދު އަދި ޢަލީ ޝިފާޢު (ޗިއްޕެ) ޑައިރެކްޓްކުރާ މިފިލްމުގެ ބައެއް ސިންގަޕޫރުގެ ހިތްގައިމު ޞަރަޙައްދު ތަކުގައި ކުރިޔަށް ގެންދިޔައިރު، ޝޫޓިންގައި ކުރީގެ މަޝްހޫރު ތަރި އިސްމާޢީލް ވަޖީހުގެ އިތުރުން އޭނާގެ ފިރިހެން ދަރިފުޅު ތަރީޝް އިސްމާޢީލް ވެސް ބައިވެރިވެއެވެ. މިއީ ވަޖީހުގެ ދަރިފުޅު ފިލްމަކުން ފެންނާނެ ފުރަތަމަ ފަހަރެވެ.