ރާއްޖޭގެ ހާރިޖީ ސިޔާސަތު މިހާރު ކޮންޓްރޯލްކޮށް ކަނޑައަޅަނީ ސައުދީ އަރަބިއްޔާގެ ފައިސާވެރިން ކަމަށް ކުރީގެ ރައީސުލްޖުމްހޫރިއްޔާ މުޙައްމަދު ނަޝީދު ތުހުމަތު ކުރައްވައިފިއެވެ.
ދައުލަތުއް ޤަތަރާއި އެކު ވޭތުވެ ދިޔަ 33 އަހަރު ރާއްޖެއިން ބޭއްވި ސިޔާސީ ގުޅުން ކަނޑާލުމަށް ދިވެހި ސަރުކާރުން ނިންމި ކުއްލި ނިންމުމާއި ގުޅިގެން ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ރާއްޖޭގެ ހާރިޖީ ސިޔާސަތު މިހާރު ކޮންޓްރޯލްކޮށް ކަނޑައަޅަނީ ސައުދީ އަރަބިއާގެ ރިޔާޟްގައި ތިބި ރައީސް ޔަމީނަށް ފައިސާ ފޯރުކޮށްދޭ ފަރާތްތައް ކަމަށެވެ.
ރައީސް ނަޝިދު އިތުރަށް ވިދާޅުވީ، ރާއްޖެއިން ދެކުނު އޭޝިއާގެ ބާރުތަކާއި އެކު ކުރިން އޮތް ފަދަ ގާތް ގުޅުމަށް އެނބުރި ރުޖޫޢަވާންޖެހޭ ކަމަށެވެ.
Maldives foreign policy now dictated by President Yameen's paymasters in Riyadh. Maldives should return to traditional South Asian alliances
— Mohamed Nasheed (@MohamedNasheed) June 5, 2017
ދިވެހި ސަރުކާރުން ހޯމަ ދުވަހު ނެރެފައިވާ ބަޔާނެއްގައި ބުނެފައިވަނީ، ދައުލަތުއް ޤަތަރާއި އޮތް ސިޔާސީ ގުޅުން 5 ޖޫން 2017 އިން ފެށިގެން، ކަނޑާލުމަށް ދިވެހި ސަރުކާރުން ނިންމާފައިވާ ކަމަށެވެ.
ދިވެހި ސަރުކާރުން ބުނެފައިވަނީ މި ނިންމުން ދިވެހި ސަރުކާރުން ނިންމާފައިވަނީ، ދީނީ ގޮތުން ހަރުކަށިވެ ހައްދު ފަހަނައަޅައި ދިއުމާއި، ޓެރަރިޒަމާއި ދެކޮޅަށް ދިވެހި ސަރުކާރުން ގެންގުޅޭ ވަރުގަދަ ޤަބޫލުކުރުންތަކާއި ގުޅިގެން ކަމަށެވެ. އަދި ރާއްޖެއިން އަބަދުވެސް މަސައްކަތް ކޮށްފައިވަނީ މެދުއިރުމައްޗަށް އަމާން ކަމާއި ސުލްޙަ މަސަލަސްކަން ލިބުމަށް އެދިގެން ކަމަށް ދިވެހި ސަރުކާރުގެ ބަޔާނުގައި ވަނީ ބުނެފައެވެ.
މީގެ އިތުރުން ދިވެހި ސަރުކާރުން ވަނީ ޓެރަރިޒަމާއި ދެކޮޅަށް ކުރާ ހަނގުރާމައަށް ކުރާ ތާއީދު ތަކުރާރުކޮށް، ސުލްޙައަށް މަސައްކަތްކުރާ ޤައުމުތަކާއި އެކުގައި މަސައްކަތް ކުރިއަށް ގެންދާނެ ކަމަށް ބުނެފައެވެ.
ދިވެހިރާއްޖެއިން ޤަތަރާއި އެކު ސިޔާސީ ގުޅުން ގާއިމު ކޮށްފައިވަނީ 1984 ވަނަ އަހަރުގެ މޭމަހުގެ 26 ވަނަ ދުވަހުއެވެ.
