ވޭސްޓް މެނޭޖްމެންޓް ކޯޕަރޭޝަން(ވެމްކޯ) އަށް ކޮޅުވެއްޓިއެއް ގެންނަން ސަރުކާރަށް ތާއީދު ކުރައްވާ ރައްޔިތުންގެ މަޖިލީހުގެ މެންބަރުންތަކެއްގެ މަސްލަހަތު އޮންނަ ކުންފުންޏަކަށް ދިން މައްސަލައެއް އެންޓި ކޮރަޕްޝަން ކޮމިޝަން(އޭސީސީ) އިން ތަހުގީގު ކުރަން ފަށައިފިއެވެ.

މައްސަލައާ ގުޅޭ އިތުރު ތަފްސީލެއް ނުދައްވައި، އޭސީސީގެ ނައިބު ރައީސް މުއައްވިޒް ރަޝީދު ވިދާޅުވީ، އެފަދަ މައްސަލައެއް ކޮމިޝަނުން އަމިއްލައަށް އިސްނަގައިގެން ބަލަމުންދާ ކަމަށެވެ.

މައުލޫމާތު ލިބިފައިވާ ގޮތުގައި ކޮޅުވެއްޓި ގެންނަން މެންބަރުންގެ މަސްލަހަތު އޮންނަ ކުންފުންޏާ ހަވާލުކުރީ 13 މިލިއަން ރުފިޔާ (އަށް ލައްކަ ފަންސާސް ޑޮލަރު) އަށެވެ. ވެމްކޯ އިން އެކުންފުންޏަށް އަޕްފްރަންޓްކޮށް 13 މިލިއަން ރުފިޔާގެ 30 އިންސައްތަ ދީފައިވާ ކަމަށް މައުލޫމާތު ލިބެއެވެ.

މައުލޫމާތު ލިބިފައިވާ ގޮތުގައި 30 އިންސައްތަ ފައިސާ އެކުންފުންޏަށް ދީފައިވާއިރު، ކޮޅުވެއްޓި ރާއްޖެ ގެނެސް އަދިވެސް ވެމްކޯއާ ހަވާލުކޮށްފައެއްނުވެއެވެ.

ވެމްކޯއާ ގުޅޭ އެހެން މައްސަލަތަކެއް މިދިޔަ އަހަރުވެސް ކޮމިޝަނުން ބަލަން ފެށިއެވެ. އެގޮތުން ކުނި އުފުލަން ކުއްޔަށް ހިފާފައިވާ ތިން ކޮޅުވެއްޓި އާއި ކުނި އަރުވަން ކުއްޔަށް ހިފާފައިވާ ދޯނިތަކުގެ ކުލީގެ ގޮތުގައި ދައްކާ ފައިސާގެ ބޮޑު ބައެއް ނަގަނީ ވެމްކޯގެ އިސް ފަރާތްތަކަށާއި އެ ކުންފުންޏާ ގުޅިފައިވާ ސިޔާސީ އިސް ފަރާތްތަކުން ކަމަށް ބުނާ މައްސަލަ އަދިވެސް ދަނީ ބަލަމުންނެވެ.

އަމިއްލަ މީހަކު އޭސީސީއަށް ހުށަހެޅި ސިޓީގައި ބުނީ މާލެ އިން ތިލަފުއްޓަށް ކުނި އުކަން ކޮޅުވެއްޓި ކުއްޔަށް ހިފާފައި ވަނީ ދުވާލަކު 45،000-50،000ރ. ގެ ރޭޓުން ކަމަށެވެ. އެހެންކަމުން ކޮޅުވެއްޓީގެ ކުލީގެ ގޮތުގައި އެވްރެޖްކޮށް މަހަކު ހަތަރު މިލިއަން ރުފިޔާއަށް ވުރެ ބޮޑު އަދަދެއް ވެމްކޯ އިން ދައްކަން ޖެހޭ ކަމަށް ސިޓީގައިވެއެވެ.

މުޅިން އާ ކޮޅުވެއްޓިއެއްގެ އަގު އުޅެނީ 10 މިލިއަން ރުފިޔާ އަށް ވުރެ ކުޑަކޮށް ކަމަށާއި އަހަރު ދުވަސް ތެރޭގައި ކޮޅުވެއްޓީގެ ކުލީގެ ގޮތުގައި 48 މިލިއަން ރުފިޔާ ހަރަދުކުރަމުންދާއިރު 30 މިލިއަން ރުފިޔާ ހަރަދުކޮށްގެން ތިން ކޮޅުވެއްޓި ނުގެނެވޭންވީ ނުވަތަ ނުގަންނަންވީ ސަބަބަކީ ކޮބައިތޯ އެ މައްސަލައިގައި ސުވާލު އުފައްދާފައިވެއެވެ.

ސިޓީގައި ތުހުމަތުކޮށްފައިވާ ގޮތުގައި ކޮޅުވެއްޓިތައް އަގު ބޮޑުކޮށް ކުއްޔަށް ހިފައިގެން އުޅެނީ، ކޮޅުވެއްޓީގެ ކުލީގެ ގޮތުގައި ދައްކާ ފައިސާގެ ބޮޑު ބައެއް ރިޝްވަތުގެ ގޮތުގައި ވެމްކޯ އާއި އެތަނުގެ ވެރިންނާއި ގުޅުން ހުރި ސިޔާސީ ފަރާތްތަކަށް ލިބެމުންދާތީއެވެ.