ގޫޗީއިން ޖަނަވާރުގެ ކެހެރި ބޭނުންކުރުން ހުއްޓާލަނީ

އަންނައުނުގެ ޑިޒައިންތަކުގައި ޖަނަވާރުގެ ކެހެރި ބޭނުންކުރުން ހުއްޓާލުމަށް މަޝްޙޫރު ފެޝަން ހައުސް، ގޫޗީއިން ނިންމައިފިއެވެ.

މަޝްޙޫރު ބައެއް އެހެން ފެޝަން ހައުސްތަކެކޭ އެއްފަދައިން، ޖަނަވާރުގެ ކެހެރި ބޭނުންކުރުން ހުއްޓާލުމަށް ގޫޗީން ނިންމާފައިވާއިރު، އެ ކުންފުނިން ހާމަކޮށްފައިވާ ގޮތުގައި އެ ކުންފުނިން ޖަނަވާރުގެ ކެހެރި ބޭނުންކުރުން ހުއްޓާލާނީ، އެ ކުންފުނީގެ ސްޕްރިންގ-ސަމަރ 2018 ކަލެކްޝަނުން ފެށިގެންނެވެ.

ގޫޗީގެ މި ނިންމުމާއި ގުޅިގެން، ފެޝަން ހައުސްތަކުން ޖަނަވާރުގެ ކެހެރި ބޭނުންކުރުން ހުއްޓާލުމަށް ގޮވާލައި ކެމްޕެއިން ކުރަމުންދާ ދި ހިއުމޭން ސޮސައިޓިން ބުނީ، މިއީ ބޮޑު، ހެޔޮ ބަދަލެއް ގެނުވާނެ ކަމެއް ކަމަށާއި، ގޫޗީއަކީ ޖަނަވާރުގެ ކެހެރި ބޭނުންކުރުން ހުއްޓާލުމަށް މިހާތަނަށް ނިންމި އެންމެ ބޮޑު ކުންފުނި ކަމަށެވެ.

ގޫޗީ ކުންފުނީގެ ސީއީއޯ މާކޯ ބިޒާރީ ވިދާޅުވީ، އެ ކުންފުނިން ކުރިއަށްއޮތް ތަނުގައި ޖަނާވާރުގެ ކެހެރި ބޭނުން ނުކުރާނެ ކަމަށާއި، ޖަނަވާރުގެ ކެހެރި ޕްރޮމޯޓްވެސް ނުކުރާނެ ކަމަށެވެ.

ހިއުމޭން ސޮސައިޓީން ހާމަކޮށްފައިވާ ގޮތުގައި ފްރީ ފަރ ޕޮލިސީގައި ހިމެނެނީ، މިންކް، ކަޔޯޓީ، ރެކޫން، ކުއްތާ، ހިޔަޅު، މުސަޚު އަދި އަސްޓްރަޚާން ކަންބަޅީގެ ކެހެރި ކަމަށެވެ.

ގޫޗީގެ އިތުރުން ޖަނަވާރުގެ ކެހެރި ބޭނުންކުރުން ހުއްޓާލާފައިވާ ކުންފުނިތަކުގެ ތެރޭގައި ޖޯޖިއޯ އަރްމާނީ، ހޫގޯ ބޮސް، އަދި ސްޓެލާ މެކްކާޓްނީ ފަދަ ކުންފުނިތައް ހިމެނެއެވެ.