ފަތުވާ މަޖިލީހުގެ ވަފުދެއް މިސްރަށް ފުރައިފި
ފަތުވާގެ ނަމުގައި އޮންލައިންކޮށް ފެތުރޭ އެކިއެކި މައުލޫމާތުތައް ނައްތާލާނެ ނިޒާމެއް ޤާއިމް ކުރުމާއި ގުޅޭގޮތުން މަޝްވަރާ ކުރާނެ
މިޞްރަށް ފުރި ފަތުވާ މަޖިލީހުގެ ވަފުދު - މި އަހަރު މައުލޫއެއްގެ ގޮތުގައި ކަނޑައަޅާފައިވަނީ "ދަ ރޯލް އޮފް ފަތުވާ އިން ކްރިއޭޓިން އަ ސްޓޭބަލް ސޮސައިޓީ"
ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުގެ ވަފުދެއް މިސްރަށް ފުރައިފިއެވެ.
އިސްލާމިކް މިނިސްޓްރީން ބުނި ގޮތުގައި ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުގެ ތިން މެންބަރުން ހިމެނޭ މި ދަތުރަކީ، މިމަހުގެ 17 އިން 19 އަށް މިސްރުގެ ވެރިރަށް ގާހިރާގައި ބާއްވާ ތިން ވަނަ "އެނުއަލް ކޮންފަރެންސް އޮފް އިންޓަނޭޝަނަލް ބޯޑް އޮފް ފަތުވާ ކައުންސިލިން" ކޮންފަރެންސްގައި ބައިވެރިވުމަށް ކުރާ ދަތުރެކެވެ. ދަތުރުގައި ބައިވެރިވެވަޑައިގަންނަވަނީ ރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުގެ ރައީސް ޝައިހު މުޙައްމަދު ރަޝީދު އިބްރާހީމާއި، އެ މަޖިލީހުގެ މެންބަރު ޝައިހު އިސްޙާޤް މުޙައްމަދުފުޅާއި ސެކްރެޓަރީ ޖެނެރަލް މުޙައްމަދު ރިޒާއެވެ.
އިސްލާމީ ގިނަ ޤައުމުތަކެއްގެ ބައިވެރިވުމާއިއެކު އަހަރަކު އެއްފަހަރު ބާއްވާ މި ކޮންފަރެންސްގައި މި އަހަރު މައުޟޫއެއްގެ ގޮތުގައި "ދަ ރޯލް އޮފް ފަތުވާ އިން ކްރިއޭޓިން އަ ސްޓޭބަލް ސޮސައިޓީ" ކަނޑައަޅާފައިވާއިރު، ކޮންފަރެންސްގެ ޝިއާރެއް ކަމުގައި ކަނޑައަޅާފައި ވަނީ "ފަތުވާ: ސްޓެބިލިޓީ، ޑިވެލޮޕްމަންޓް، ޕްރޮސްޕެރިޓީ" އެވެ.
އިސްލާމިކް މިނިސްޓްރީން ބުނީ، މި ކޮންފަރެންސްގައި ދީނީ ހަރުކަށި ވިސްނުންތަކާއި ޒަމާނީ މުޖުތަމަޢުގައި ހުރި އެކި އެކި މައްސަލަތައް ދިރާސާކޮށް، އެ ކަންކަމަށް ޙައްލެއް ހޯދުމުގައި ފަތުވާގެ ރޯލާއި ގުޅޭގޮތުން މަޝްވަރާ ކުރާނެ ކަމަށެވެ. މީގެ އިތުރުން ފަތުވާ ނެރުމުގައި ޒަމާނީ ގޮތްތައް ބޭނުންކުރުމާއި، ފަތުވާގެ ނަމުގައި އޮންލައިންކޮށް ފެތުރޭ އެކިއެކި ސައްޚަނޫން މައުލޫމާތުތައް ނައްތާލާނެ ނިޒާމެއް ޤާއިމް ކުރުމާއި ގުޅޭގޮތުން މަޝްވަރާ ކުރުމަށް ވަނީ ހަމަޖެހިފައެވެ.
