ޓެސްޓް ޗެމްޕިއަންޝިޕާއި އޯޑީއައި ލީގު ބޭއްވުމަށް އައިސީސީއިން ނިންމައިފި

އިންޓަނޭޝަނަލް ކްރިކެޓުގައި އޯޑީއައި ލީގާއި ޓެސްޓް ޗެމްޕިއަންޝިޕް ބޭއްވުމަށް އިންޓަނޭޝަނަލް ކްރިކެޓް ކައުންސިލް (އިއިސީސީ) އިން ނިންމައިފިއެވެ.

އައިސީސީއިން މިހެން ނިންމުމާއެކު މިހާރު ކުޅެމުންދާ ޓެސްޓް ސީރީސްގެ މެޗުތަކާއި އޯޑީއައި މެޗުތަކަށް ބޮޑެތި ބަދަލުތަކެއް އަންނާނެއެވެ. އެގޮތުން ދެ އަހަރު ދުވަހުގެ މުއްދަތެއްގެ ތެރޭގައި ނުވަ ޓީމެއްގެ މެދުގައި ހަ ސީރީސްގެ ޓެސްޓް މެޗުތަށް ކުޅެވޭނެއެވެ. އެއީ އަމިއްލަ ގައުމުގައި ކުޅޭ ތިން މެޗާއި ގައުމުން ބޭރުގައި ކުޅެވޭ ތިން މެޗެވެ. މި މެޗުތަށް ކާމިޔާބު ކުރާ ޓީމުތަކުން ދެން ވާދަކުރަން ޖެހޭނީ ވޯލްޑް ޓެސްޓް ޗެމްޕިއަންޝިޕްގެ ފައިނަލްސްގައި ކަމަށް އައިސީސީއިން ހާމަކުރެއެވެ.

ހަމައެހެންމެ 2021 ވަނަ އަހަރު ތައާރަފް ކުރަން ހަމަޖެހިފައިވާ އޯޑީއައި ލީގުގައި 13 ޓީމަކުން ވާދަކުރާނެ ކަމަށާއި މި ލީގަކީ އައިސީސީ ކްރިކެޓް ވޯލްޑް ކަޕަށް ކޮލިފައިވާ ޓީމުތަށް ކަނޑައަޅާ ލީގު ކަމަށް އެ ކައުންސިލުން ބުނެފައިވެއެވެ. އައިސީސީއިން ވަނީ ހަތަރު ދުވަހުގެ ޓެސްޓް މެޗުތަށް ކުޅުމުގެ ހުއްދަ ވެސް ގައުމުތަކަށް ދީފައެވެ. މިއީ ކްރިކެޓް ކުރިއަރުވާ ދެމެހެއްޓުމަށް ކުރެވެމުންދާ ކަންކަމުގެ ތެރެއިން އެ ކައުންސިލުން ނިންމި ނިންމުމެއް ކަމަށް އައިސީސީއިން ބުނެފައިވެއެވެ.

އައިސީސީއިން ހާމަކޮށްފައިވާ ގޮތުގައި 2019 ވަނަ އަހަރުގެ ކްރިކެޓް ވޯލްޑް ކަޕަށްފަހު ތައާރަފް ކުރަން ހަމަޖެހިފައިވާ ޓެސްޓް ޗެމްޕިއަންޝިޕް ކުރިޔަށް ގެންދިއުމުގެ މަގްސަދަކީ ކްރިކެޓު މެޗުތަކުގެ ވަގުތު ދިގުކޮށް ކްރިކެޓް ބެލުމަށް ދަނޑަށް ވަންނަ މީހުންގެ އަދަދު އިތުރު ކުރުމެވެ.

ދެކުނު އެފްރިކާއިން ވަނީ ދާދި ފަހުން ހަތަރު ދުވަހުގެ ޓެސްޓް މެޗުތަކެއް ކުޅުމުގެ ހުއްދައަށް އެދިފައެވެ. އެހެނަސް އައިސީސީއިން މިކަމަށް ހުއްދަ ދީފައެއް ނުވެއެވެ. ހަމަމިއާއެކު އައިސީސީއިން ވަނީ "ޑޭ ނައިޓް ޓެސްޓް" މެޗުތަށް ވެސް ތައާރަފް ކޮށްފައެވެ.