ރަސްފަރި ސަރަހައްދާ ކައިރި ފަޅަކަށް ގިނަ އަދަދެއްގެ ގާކުނޑި އަޅައި އެ ފަޅު ކުނިގޮނޑަކަށް ހެދި މައްސަލަ ތަހުގީގުކުރަން ފަށައިފި
20 ނޮވެމްބަރު 2026 | ހުކުރު 07:45ހިމާޔަތްކޮށްފައިވާ ރަސްފަރި ކައިރީގައި އޮންނަ ފަޅަކަށް ވެމްކޯއިން ގިނަ އަދަދެއްގެ ކުނި އެޅި މައްސަލަ އީއާރްއޭއިން ތަހުގީގު ކުރަން ވަނީ ފަށާފައި. އީއައިއޭ ރިޕޯޓު ފުރިހަމަނުކޮށް ކުރިއަށްގެންދިޔަ މި މަސައްކަތް ހުއްޓާލުމަށް އަންގާފައިވާއިރު، ތަހުގީގަށްފަހު ފިޔަވަޅު އަޅާނެ ކަމަށް އެ އޮތޯރިޓީން ބުނޭ


ރަސްފަރި ސަރަހައްދާ ކައިރި ފަޅަކަށް ގިނަ އަދަދެއްގެ ގާކުނޑި އަޅާފައި | ރާއްޖެއެމްވީ
ހިމާޔަތްކޮށްފައިވާ ކ. ރަސްފަރި ސަރަހައްދާ ކައިރި ފަޅަކަށް ގިނަ އަދަދެއްގެ ގާކުނޑި އަޅައި އެ ފަޅު ކުނިގޮނޑަކަށް ހަދާފައިވާ މައްސަލަ ތަހުގީގު ކުރަމުންދާ ކަމަށް އެންވަޔަރަމެންޓަލް ރެގިއުލޭޓަރީ އޮތޯރިޓީ (އީއާރްއޭ) އިން ބުނެފި އެވެ.
ރާއްޖެއެމްވީއަށް އީއާރްއޭގެ ޗީފް އެގްޒެކެޓިވް ހައްސާން މުހައްމަދު ވިދާޅުވީ، ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ކުނި އަޅާފައިވަނީ އެ ކޯޕަރޭޝަންއާ ހަވާލު ކޮށްފައިވާ ފަޅަކަށް ކަމަށެވެ.
ހައްސާން ވިދާޅުވީ އެއީ ރަސްފަރީގެ އިރަށް އޮންނަ ފަޅެއް ކަމަށާއި، މިމައްސަލަ ރިޕޯޓު ކުރުމާ ގުޅިގެން ތަހުގީގު ކުރަމުންދާ ކަމަށެވެ. އަދި ކުނި އަޅާފައިވާ ސަރަހައްދަށް އީއާރްއޭގެ ޓީމުން ގޮސް، ބަލަންޖެހޭ ކަންކަން ބަލާފައިވާ ކަމަށް އޭނާ ވިދާޅުވި އެވެ.

ވެމްކޯއިން ގާކުނޑި އަޅާފައިވާ ފަޅު | ރާއްޖެއެމްވީ
ވެމްކޯއިން އެފަޅަށް ކުނި އަޅައި، ހިއްކުމުގެ މަސައްކަތް ކޮށްފައިވަނީ އެންވަޔަރަންމެންޓަލް އިމްޕެކްޓް އެސަސްމަންޓް (އީއައިއޭ)ގެ ރިޕޯޓު ނުނިމެނީސްކަން ފާހަގަކުރައްވާ ހައްސާން ވިދާޅުވީ، އެ މަސައްކަތް ހުއްޓާލުމަށް ވެމްކޯއަށް އަންގާފައިވާ ކަމަށާއި، ތަހުގީގު މަރުހަލާ ނިމުމުން ފިޔަވަޅު އަޅާނެ ކަމަށެވެ.
މި މައްސަލަ ތަހުގީގު ކުރަމުންދާ ކަމަށް އީއާރްއޭއިން ބުނެފައިވާއިރު، އިތުބާރުހުރި މަސްދަރަކުން ރާއްޖެއެމްވީއަށް ބުނީ، އެ ފަޅަށް ބޮޑެތި ގައުތަކާއި ލަކުނޑިތައް އެޅުމުގެ ސަބަބުން އެސަރަހައްދު ދުއްވާ އުޅަނދުތަކަށް ވެސް ބިރު ބޮޑުވެފައިވާ ކަމަށެވެ.
ރަސްފަރި ސަރަހައްދަކީ 1995 ވަނަ އަހަރުގެ ސެޕްޓެމްބަރު މަހުގެ 27 ވަނަ ދުވަހު ދިވެހި ސަރުކާރުން ހިމާޔަތްކޮށްފައިވާ ގުދުރަތީ މުހިންމު ސަރަހައްދެކެވެ. މާލެ އަތޮޅު އުތުރުބުރީގައި އޮންނަ މި ސަރަހައްދުގައި ރަސްފަރި ރަށާއި، އެ ރަށުގެ ފަޅާއި، ވަށައިގެންވާ ފަރު ހިމެނެ އެވެ.











