އިރުވައި މޫސުމުގައި ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނި ހިފާ ގެންގުޅޭ މީހުންނާ މެދު ފިޔަވަޅު އަޅާނެކަމުގެ އިންޒާރު ދީފި
1 އޮކްޓޯބަރު 2026 | ބުރާސްފަތި 07:49އިރުވައި މޫސުމާ ދިމާކޮށް ރާއްޖެއަށް ހިޖުރަކުރާ ދޫނި ހިފާ ގެންގުޅުމަކީ ގާނޫނީ ގޮތުން މަނާކަމަކަށް ވާއިރު، މިފަދަ އަމަލުތައް ހިންގާ ފަރާތްތަކާމެދު ފިޔަވަޅު އަޅައި ޖޫރިމަނާ ކުރާނެ ކަމުގެ އިންޒާރު އީއާރްއޭ އިން ވަނީ ދީފައި. މި ދޫނިތައް ހިމާޔަތްކުރުމަކީ ރާއްޖޭގެ ތިމާވެށީގެ މުއްސަނދިކަން ދެމެހެއްޓުމަށް މުހިއްމު ކަމަކަށް ވާތީ، އެފަދަ އަމަލުތައް ހިންގާ ފަރާތްތަކުގެ މައުލޫމާތު ހިއްސާކުރުމަށް އެ އޮތޯރިޓީން އިލްތިމާސްކޮށްފައިވޭ
ކުޅުދުއްފުށީ ކުޅީގައި ގުޑުގުޑާ ދޫނިތަކެއް މަޑުކޮށްލައިގެން | މުޙައްމަދު މިހާޒު (މިހާޒު ފޮޓޯގްރަފީ)
އިރުވައި މޫސުމާ ދިމާކޮށް ދުނިޔޭގެ އެކި ކަންކޮޅުތަކުން ރާއްޖެއަށް ހިޖުރަކުރާ ހިމާޔަތްކޮށްފައިވާ ދޫނި ހިފުމާއި ގެންގުޅުން އަދި ވިޔަފާރިކުރާ ފަރާތްތަކާމެދު ގަވާއިދުގެ ދަށުން ޖޫރިމަނާކޮށް ފިޔަވަޅު އަޅާނެކަމުގެ އިންޒާރު އެންވަޔަރަންމަންޓަލް ރެގިއުލޭޓަރީ އޮތޯރިޓީ (އީއާރްއޭ) އިން ދީފި އެވެ.
އެ އޮތޯރިޓީން ބުނީ މިގޮތަށް ހިޖުރަކުރާ ދޫންޏަކީ ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާބެހޭ ގާނޫނުގެ ދަށުން އެކުލަވާލާފައިވާ 'ގުދުރަތީ ގޮތުގައި ނުވަތަ ތަބީއީ ގޮތުގައި ހިމާޔަތްކޮށް ރައްކައުތެރިކުރާ ދިރޭ ތަކެއްޗާބެހޭ ގަވާއިދު' ގެ ދަށުން ހިމާޔަތްކުރެވިފައިވާ ދިރުންތަކެއް ކަމަށެވެ. އަދި މިފަދަ ދޫނި ހިފާ، ގެންގުޅުމަކީ އެ ގަވާއިދުގެ 17 ވަނަ މާއްދާގެ ދަށުން މަނާކަމެއް ކަމަށްވެސް ފާހަގަކޮށްފައިވެ އެވެ.
އީއާރްއޭއިން ބުނީ، ރާއްޖެއިން ފެންނަ ގިނަ ބާވަތްތަކުގެ ދޫންޏަކީ މިގޮތަށް މޫސުމާ ގުޅިގެން ރާއްޖެއަށް ހިޖުރަކުރާ ބާވަތްތައް ކަމުގައިވާއިރު، މިފަދަ ދިރުންތައް ރައްކާތެރިކުރުމަކީ ރާއްޖޭގެ ދޫނިސޫފާސޫފީގެ ސިންދަފާތާއި ވެށީގެ މުއްސަނދިކަން ރައްކާތެރިރުމަށް އެޅިގެންދާ މުހިއްމު ފިޔަވަޅެއް ކަމަށެވެ.
ނަމަވެސް ކޮންމެ އަހަރެއްގެ ވެސް މި ދުވަސްވަރާ ދިމާކޮށް ހިޖުރަކުރާ ގިނަ ބާވަތްތަކެއްގެ ދޫނި މަޅިފަތިޖަހައިގެން ހިފުމާއި، ފިޔަކޮށައި ކޮށިތަކުގައި ބަންދުކޮށްގެން ގެންގުޅުމުގެ އިތުރުން އެތަކެތީގެ ވިޔަފާރިކުރުމާއި އޮޅުދޫނީގެ ގޮތުގައި ގެންގުޅޭކަން ފާހަގަކުރެވިފައިވާ ކަމަށް އޮތޯރިޓީން ބުނެ އެވެ.
މިފަދަ އަމަލުތަކަކީ ރާއްޖެއިން ބައިވެރިވެފައިވާ ބައިނަލްއަގުވާމީ މުއާހަދާއެއް ކަމަށްވާ 'ކޮންވެންޝަން އޮން މައިގްރޭޓަރީ ސްޕީޝީޒް' (ސީއެމްއެސް) އާ ޚިލާފު ކަންކަން ކަމަށެވެ. އަދި 2025 ވަނަ އަހަރު އެ އޮތޯރިޓީން ކުރި ދިރާސާއަކުން ރާއްޖެއަށް ހިޖުރަކުރާ ދޫނީގެ އަދަދު މަދުވަމުންދާކަން ފާހަގަކުރެވިފައިވާ ކަމަށް އީއާރްއޭއިން ބުނެ އެވެ.
އެހެންކަމުން، މިފަދަ އަމަލުތަކުން ދުރުހެލިވުމަށާއި ހިފާފައިވާ ދޫނިތައް ދޫކޮށްލުމަށް އީއާރްއޭއިން ވަނީ އިލްތިމާސްކޮށްފަ އެވެ.
މީގެ އިތުރުން އީއާރްއޭ އިން ބުނީ، ގަވާއިދާ ޚިލާފަށް ދޫނި ހިފާ، ގެންގުޅޭ އަދި ވިޔަފާރިކުރާ ފަރާތްތަކާ މެދު ގަވާއިދުގެ ދަށުން ޖޫރިމަނާ ކުރާނެ ކަމަށެވެ. އަދި މިފަދަ އަމަލުތައް ހިންގާ ފަރާތްތަކުގެ މައުލޫމާތާއި، ދޫނި ގެންގުޅޭ ތަނާއި، ދޫނީގެ ބާވަތް އަދި ފޮޓޯ އާއި ވީޑިއޯ ފަދަ ހެކިތަކާއެކު އޮތޯރިޓީގެ ނަންބަރު 3335949 ނުވަތަ އީމެއިލް secretariat@era.gov.mv މެދުވެރިކޮށް ހިއްސާކުރުމަށް ވަނީ އެދިފަ އެވެ.
