މުޅި ރާއްޖޭގެ މޫސުން ގޯސްވެ، ބޮޑު ސަރަހައްދަކަށް ވައިޓް އެލާޓް ނެރެފި
9 ނޮވެމްބަރު 2026 | ހޯމަ 08:58މުޅި ރާއްޖެއަށް މޫސުން ގޯސްވެ ބޯކޮށް ވާރޭވެހި ވައިގަދަވާނެތީ މޫސުމަށް ސަމާލުވުމަށް މޫސުމާބެހޭ ގައުމީ އިދާރާއިން ވަނީ އިލްތިމާސްކޮށްފައި. ކުރިއަށް އޮތް ވަގުތުތަކުގައި ވިލާގަނޑުގައި ގަޑިއަކު 35 މޭލަށް ވައިގަދަވެ ކަނޑުތައްވެސް ގަދަވާނެ ކަމަށް ލަފާކޮށްފައިވޭ. އަދި ހުޅަނގު މޫސުމުގެ މި ވިއްސާރައިގައި ބައެއް ރަށްތަކުގައި ފެންބޮޑުވެ އެކިވަރުގެ ގެއްލުންތައް ވެސް ދަނީ ލިބެމުން
ހުޅަނގު މޫސުމުގެ ވިއްސާރައިގައި މާލެގެ ހާލަތު / މަގުމަތީގައި ފެންބޮޑުވުން | ރާއްޖެއެމްވީ
މުޅި ރާއްޖޭގެ މޫސުން ގޯސްވެ، ބޮޑު ސަރަހައްދަކަށް ވައިޓް އެލާޓް ނެރެފި އެވެ.
މޫސުމާބެހޭ ގައުމީ އިދާރާއިން ވައިޓް އެލާޓް ނެރިފައިވަނީ ހއ. އަތޮޅުން ފެށިގެން ގދ. އަތޮޅަށް ހޯމަ ދުވަހުގެ މެންދުރުފަހު 1:30ން ހޯމަ ދުވަހުގެ ރޭ 7:00 ށެވެ.
މޫސުމާބެހޭ ގައުމީ އިދާރާއިން ބުނީ، ހޯމަ ދުވަހުގެ ހެނދުނު 10:00ން އަންގާރަ ދުވަހުގެ ހެނދުނު 10:00ށް ބޮޑުބަޔަކަށް ވިއްސާރަ ކުރާނެ ކަމަށާއި، ބައެއް ރަށްތަކަށް ގުގުރުމާއެކު ބޯކޮށް ވާރޭވެހުން އެކަށީގެންވާ ކަމަށެވެ. ހުޅަނގާއި ހުޅަނގުއުތުރުން ގަޑިއަކު 08 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 35 މޭލަށް ވައިގަދަވުން އެކަށީގެންވާ ކަމަށް އެ އިދާރާއިން ބުނެ އެވެ.
މީގެ އިިތުރުން މޫސުމާބެހޭ ގައުމީ އިދާރާއިން ބުނީ، ކަނޑުތައް އާދައިގެ ވަަރަކަށް ގަދަވެފައި ވިލާގަނޑުގައި ގަދަވާނެ ކަމަށާއި، ރާޅުގެ އުސްމިނުގައި 6 ނުވަތަ 3 ފޫޓު ހުންނާނެ ކަމަށެވެ.
ބޯކޮށް ވާރޭވެހޭނެ ކަމަށް ލަފާކުރެވޭތީވެ މޫސުމަށް ސަމާލުވުމަށް އިލްތިމާސް ކޮށްފައިވާއިރު، އާދިއްތަ ދުވަހުގެ ހެނދުނު 8:00ން ހޯމަ ދުވަހުގެ ހެނދުނު 8:00ށް އެންމެ ބޯކޮށް ވާރޭވެހިފައިވަނީ ކ.ދިއްފުއްޓަށެވެ. އެއީ 85.5 މިލިމީޓަރުގެ ވާރޭ އެވެ.
މޫސުމާބެހޭ ގައުމީ އިދާރާއިން އާއްމު ކޮށްފައިވާ ތަފާސްހިސާބުތައް ދައްކާ ގޮތުގައި ދެން އެންމެ ބޯކޮށް ވާރޭވެހިފައިވަނީ ބ. ތުޅާދޫ އަށެވެ. އެއީ 70.2 މިލިމީޓަރުގެ ވާރޭ އެވެ. މީގެ އިތުރުން މ.މުއްޔަށް 62.6 މިލިމީޓަރުގެ ވާރޭ، ފ.ނިލަންދޫ އަށް 61.2 މިލިމީޓަރުގެ ވާރޭ، އިފުރު އެއަރޕޯޓަށް 55.5 މިލިމީޓަރުގެ ވާރޭ އަދި ޅ.އޮޅުވެލިފުއްޓަށް 53.8 މިލިމީޓަރުގެ ވާރޭ ވެހިފައިވެ އެވެ.
ހުޅަނގު މޫސުމުގެ ބާރުގަދަވެ، ރާއްޖޭއަށް މިހާރު ކުރަމުންދާ ވިއްސާރައިގައި ބައެއް ރަށްތަކަށް އެކިވަރުގެ ގެއްލުންތައް ވަނީ ލިބިފަ އެވެ. ރަށު ތެރެ ފެން ބޮޑުވެ ގެތަކަށް ފެންވަދެ، ހިފައިގެންގުޅޭ އާލަތްތަކަށް ގެއްލުންވުމާއި، ކަރަންޓު ކެނޑުމާއި، ރުށްގަސްތައް ވެއްޓުން ފަދަ ހާދިސާތައް ހިނގާފައިވެ އެވެ.
