ރާއްޖެޓީވީ ފަސްލައްކަ ރުފިޔާއިން ޖޫރިމަނާ ކުރުމާ ގުޅިގެން، ރާއްޖެޓީވީން އަބުރުފުޅު ފަންޑުގެ ނަމުގައި ހުޅުވަން ނިންމި ފަންޑް އަންގާރަ ދުވަހުގެ ހަވީރު 4:30 ގައި ހުޅުވައިފިއެވެ.

މި ގޮތުން ފަންޑު ހުޅުވައިދެއްވުމުގެ ގޮތުން ރާއްޖެޓީވީގައި ބަހައްޓައިފައިވާ ފަންޑް ފޮއްޓަށް ފުރަތަމަ ފައިސާގެ އެހީ ދެއްވީ ރައްޔިތުންގެ މަޖިލީހުގެ ތިމަރަފުށީ ދާއިރާގެ މެންބަރު މުހައްމަދު މުސްތަފާއެވެ.

ފަންޑު  ހުޅުއްވައިދެއްވަމުން މުސްތަފާ ވިދާޅުވީ ރާއްޖެޓީވީ ވުޖޫދުން ފުހެލުމަށްޓަކައި ބަޔަކު މަސައްކަތް ކުރާ ކަމަށެވެ. އަދި ރާއްޖެޓީވީ ޖޫރިމަނާ ކޮށްފައިވަނީ އިންސާނީ ބުއްދިއަށް ވިސްނޭ ގޮތަށް ނޫން ކަމަށްވެސް އޭނާ ވިދާޅުވިއެވެ.

ފަންޑު  ހުޅުވުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ރާއްޖެޓީވީގެ ޗީފް އޮޕަރޭޓިންގް އޮފިސަރ ހުސެއިން ފިޔާޒު މޫސާ ވިދާޅުވީ ރާއްޖެޓީވީ ފަސްލައްކަ ރުފިޔާއިން ޖޫރިމަނާ ކުރެވިގެން ދިޔުމަކީ ދައުލަތުގެ މުއައްސަސާތަކުން ގުޅިގެން ރާއްޖެޓީވީ ނައްތާލަން ކުރާ މަސައްކަތްތަކެއް ކަމަށެވެ. އަދި ފަސް ލައްކަ ރުފިޔާއިން ރާއްޖެޓީވީ ޖޫރިމަނާ ކުރުމަކީ ޤާނޫނާއި އެއްގޮތަށް ކޮށްފައިވާ ކަމެއްވެސް ނޫން ކަމަށެވެ.

ރާއްޖެޓީވީގެ ނިއުސް ޑިރެކްޓަރ ހުޝާމް މުހައްމަދު ވިދާޅުވީ މާލޭގެ އިތުރުން ރާއްޖެޓީވީއާ ގުޅިގެން އަތޮޅު ތެރޭގައި ފަންޑު ފޮށި ބެހެއްޓުމަށް އެހީތެރިކަން ފޯރުކޮށްދޭން ބޭނުންވާ ފަރާތްތަކުން ރާއްޖެޓީވީގެ ނަންބަރު 3007771 އަށް ގުޅައިގެން މައުލޫމާތު ސާފުކުރުމަށް އެދިލައްވާ ކަމަށެވެ.

މި ފަންޑަށް ފައިސާ ޖަމާކުރެވޭ އުސޫލުތަކުގެ ތެރޭގައި ފަންޑު ފޮށި ހުންނަ ސަރަހައްދަށް އައިސް ފައިސާ ޖަމާކުރުމާއި ރާއްޖެޓީވީން ކަނޑައަޅާ ފަންޑުގެ ބޭންކް އެކައުންޓަށް ފައިސާ ޖަމާކުރެވޭނެ ގޮތް ވަނީ ހަމަޖެހިފައިވެއެވެ.