މައްސަލަ އުފެދެނީ ސަރުކާރު ފާރަވެރިވުމާއި، ރައްޔިތުން ތަމްސީލުކުރުމުގެ ޒިންމާއިން މުޅިން ރެކިވަޑައިގެން ތިއްބަވާތީ!
26 އޮކްޓޯބަރު 2026 | ހޯމަ 11:02ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ މަސައްކަތްތަކުގެ ދެބައިކުޅަ އެއްބައި ނުނިމި އޮތްއިރު، ސަރުކާރުން ބޭނުންވާ ބިލްތައް ފާސްކުރުމަށް އެކަނި އިސްކަންދޭކަމުގެ ކަންބޮޑުވުން ވަނީ އިތުރުވެފައި. ސަރުކާރު ޖަވާބުދާރީކުރުވުމާއި ފާރަވެރިވުމުގެ ދުސްތޫރީ ޒިންމާ އަދާކުރުމުގެ ބަދަލުގައި، މަޖިލީހުން ފެންނަނީ ސަރުކާރުގެ ނިންމުންތަކަށް އެއްވެސް ސުވާލެއް ނެތި ތާއީދުކުރާ މަންޒަރު.
ރައްޔިތުންގެ މަޖިލިސް | ރައްޔިތުންގެ މަޖިލިސް
ރައްޔިތުންގެ މަޖިލީހަކީ ހަމައެކަނި ސަރުކާރުގެ ގާނޫނު ހަދާ ޑިޕާޓްމަންޓެއް ނޫނެވެ. އެއީ ގާނޫނުތައް ހެދުމާއި، ސަރުކާރު ހިންގާ ބާރު މޮނިޓަރކޮށް ފާރަވެރިވުމާއި، ރައްޔިތުން ތަމްސީލުކުރުމުގެ އިތުރުން، ދައުލަތުގެ ބާރުތައް ހިންގާ ފަރާތްތައް ޖަވާބުދާރީ ކުރުވުމުގެ ގާނޫނީ ޒިންމާ މަތިކޮށްފައިވާ ދުސްތޫރީ މުއައްސަސާއެކެވެ.
ނަމަވެސް، ދިވެހިރާއްޖޭގައި މިއަދު ފެންނަމުންދަނީ އެ މަންޒަރެއް ނޫނެވެ. މަޖިލީހުން އިސްކަންދޭން ނިންމަނީ ކޮން ކަންތައްތަކަކަށްތޯ އާއި، ބަހުސްކުރުމުގެ ފުރުސަތު ދެނީ ކޮން ކަންތައްތަކަކަށްތޯ ބަލާލުމުންވެސް އެކަން ސާފުވެ އެވެ.
ރައްޔިތުންގެ މަޖިލީހުގެ އިދާރާއިން އާންމުކޮށްފައިވާ ތަފާސް ހިސާބުތަކަށް ބަލާއިރު، މިއަހަރުގެ ދެވަނަ ދައުރުގެ މުއްދަތު ދެ ފަހަރެއްގެ މަތިން އިތުރުކުރި ނަމަވެސް، މަޖިލީހަށް ހުށަހެޅުނު ގާނޫނު ހެދުމާއި ފާރަވެރިވުމުގެ މަސައްކަތްތަކުގެ ތެރެއިން ނިންމިފައިވަނީ އެންމެ 49.3 އިންސައްތަ މަސައްކަތެވެ. ތާވަލުކުރެވުނު ނުވަތަ ކުރިއަށް އޮތް ދައުރަށް ބަދަލުކުރެވުނު މަސައްކަތްތަކުގެ ބޮޑު ބައެއް އޮތީ ނުނިމި އެވެ.
އެހެންނަމަވެސް، ލާމަރުކަޒީ ނިޒާމަށް ގެންނަ ބަދަލުތަކާއި ބޭރު ފައިސާއާ ބެހޭ ގަވާއިދުތައް ފަދަ ސަރުކާރުން މުހިންމު ކަމަށް ދެކޭ ގާނޫނުތަކުގެ މަސައްކަތްތައް މަޖިލީހުން ދިޔައީ ބާރު ސްޕީޑުގައި ކުރިއަށް ގެންދަމުންނެވެ.
މިއިން އުފެދޭ ސުވާލަކީ، ސަރުކާރުގެ ގާނޫނީ މަސައްކަތްތައް ނިންމުމަށްޓަކައި މަޖިލީހުގެ ދައުރު އިތުރުކުރެވޭއިރު، ރައްޔިތުން ތަމްސީލުކުރުމާއި ސަރުކާރު ފާރަވެރިވުމާއި ގުޅޭ މަސައްކަތްތައް ނުނިމި ފުނިޖެހެމުންދަނީ ކީއްވެގެންތޯއެވެ؟
ވަޒީރުންނާ ސުވާލުކުރުމާއި، ސަރުކާރުގެ ނިންމުންތައް މޮނިޓަރކުރުމާއި، އާންމުން ކަންބޮޑުވާ މައްސަލަތައް ތަހުގީގުކުރުމުގެ ބާރުވެސް މަޖިލީހަށް ލިބިގެންވެއެވެ. ނަމަވެސް އަމަލީ ގޮތުން މިކަންކަން ހިނގާ ތަން މިއަދު އެއްވެސް ވަރަކަށް ފެންނަމުންނެއް ނުދެ އެވެ.
ވަޒީރަކަށް ސުވާލެއް ހުށަހެޅުމަކީ އެކަނި ޖަވާބުދާރީ ކުރުވުމެއް ނޫނެވެ. ޖަވާބުދާރީ ކުރުވުމަކީ، އެ ސުވާލަށް ފުރިހަމަ ޖަވާބެއް ލިބުމާއި، އެ ޖަވާބަށް ގޮންޖަހައި އިތުރު ސުވާލު ކުރުމުގެ ފުރުސަތު އޮތުމާއި، އަދި ދެވޭ ޖަވާބަކީ މައްސަލައަށް ހައްލެއް ލިބޭ ފަދަ ޖަވާބަކަށް ނުވާނަމަ އެކަމަށް މެމްބަރުން އަޑު އުފުލުމެވެ. ދާއިރާގެ ރައްޔިތުންގެ ހައްޤުގައި ބަސް ބުނުމެވެ. ނަމަވެސް ކަންވަނީ އެހެންތޯ އެވެ؟
މަޖިލީހުގެ އަޣުލަބިއްޔަތެއް އޮތުމުން ސަރުކާރަށް ބޭނުންވާ ގާނޫނުތައް ފާސްކުރުމުގެ ބާރު ލިބެއެވެ. ނަމަވެސް އޭގެ މާނައަކީ ސަރުކާރުން ހުށަހަޅާ ކޮންމެ ކަމެއް އެއްވެސް ސުވާލެއް ނެތި ބަލައިގަތުމެއް ނޫނެވެ. އަދި މައިނޯރިޓީގެ އަޑުތަކަކީ ބޭކާރު އެއްޗަކަށް ވުމެއްވެސް ނޫނެވެ.
މައްސަލައަކީ މަޖިލީހުން ސަރުކާރުގެ ބިލްތައް ފާސްކުރުމެއް ނޫނެވެ. ގާނޫނުތައް ފާސްކުރުމަކީ މަޖިލީހުގެ އަސާސީ އެއް ޒިންމާއެވެ. އަދި މަޖިލީހުގެ އަޣުލަބިއްޔަތެއް އޮތުމަކީ އޭގެ ޒާތުގައި ޑިމޮކްރަސީއާ ޚިލާފު ކަމެއްވެސް ނޫނެވެ.
މައްސަލަ އުފެދެނީ ސަރުކާރު ފާރަވެރިވުމާއި، ބަހުސްކުރުމާއި، ރައްޔިތުން ތަމްސީލުކުރުމުގެ ޒިންމާއިން މުޅިން ރެކިވަޑައިގެން ތިއްބަވާތީ އެވެ.
