މާރާމާރީތަކާއި ގުޅިގެން މިހާތަނަށް 50 މީހުން ހައްޔަރުކޮށްފިން: ފުލުހުން
9 އޮކްޓޯބަރު 2017 | ހޯމަ 16:07ބައެއް މީހުންގެ ޝަރީއަތްތައްވެސް އަންނަނީ ކުރިއަށްގެންދަމުން
މާރާމާރިތަކާއި ގުޅިގެން ފުލުހުން ބަޔަކު ހައްޔަރުކުރަނީ
މާލޭގައި ސިލްސިލާކޮށް ހިންގާ މާރާމާރިތަކާއި ގުޅިގެން މިހާތަނަށް 50 މީހަކު ހައްޔަރުކޮށްފައިވާކަމަށް ފުލުހުންގެ އިދާރާއިން ބުނެފި އެވެ. ފުލުހުންގެ އިދާރާއިން އެގޮތަށް ބުނެފައިވަނީ ނެރުނު ނޫސްބަޔާނެއްގައެވެ.
ނޫސްބަޔާނުގައި ފުލުހުން ބުނީ، މާރާމާރީގައި މިހާތަނަށް 50 މީހަކު ހައްޔަރުކޮށް އޭގެތެރެއިން ބައެއް މީހުންގެ ޝަރީއަތްތައް ކުރިއަށްދާކަމަށެވެ. އަދި މި މީހުންގެ ތެރޭގައި މާރާމާރި ހިންގައި މީހުންމެރުމުގައި އަމަލީގޮތުން ބައިވެރިވެފައިވާ މީހުން ހިމެނެއިރު، އެ މީހުން ހައްޔަރުކޮށްފައިވަނީ ކުށް ސާބިތުކުރުމަށް ބޭނުންވާ ހެއްކާ ޤަރީނާތާއިއެކުގައިކަމަށްވެސް ފުލުހުން ބުނެފައިވެއެވެ.
ފުލުހުން ބުނީ، ލިޓަސް ސާރވިސް ސެންޓަރުގެ ތެރޭގައި އަނިޔާވެރިގޮތަކަށް މަރާލި އަނަސްގެ މަރުގެ މައްސަލައާއި ގުޅިގެން ތުހުމަތުކުރެވުގެން ހޯދަމުންދިޔަ އެންމެވެސް މިހާރު ވަނީ ހައްޔަރުކުރެވިފައިކަމަށެވެ. އަދި މައްސަލައާއި ގުޅިގެން ހޯދަމުންދިޔަ އަފްރާހް އަބްދުއްރައްޒާގް ހައްޔަރުކޮށް އޭނާގެ ބަންދަށް 15 ދުވަސްޖަހާފައިވާކަން ނޫސްބަޔާނުގައި ވަނީ ފާހަގަކޮށްފަ އެވެ.
އޭގެއިތުރުން މިދިޔަ މަހުގެ 29 ވަނަ ދުވަހުގެރޭ ހުޅުމާލެ ހާފްވޭ ހައުސް ކައިރިން ތުނު އެއްޗަކުން ހަމަލާދީ ޒުވާނަކު މަރާލާފައިވާ މައްސަލައާ ގުޅިގެން އެކަމުގައި އަމަލީގޮތުން ބައިވެރިވި މީހަކު ހައްޔަރުކޮށް މައްސަލަ ތަހުޤީޤް ކުރަމުންދާއިރު، މާރާމާރީގެ އެހެން މައްސަލަތައްވެސް ދަނީ ސީރިއަސް މައްސަލަތަކެއްގެ ގޮތުގައި ތަހުޤީޤްކުރަމުންކަމަށެވެ. އޭގެއިތުރުން ކ. ހިންމަފުށީގައި ފުލުހުން ހިންގި އެޕަރޭޝަނެއްގައި ވަނީ މަރުގެ މައްސަލައަކާ ގުޅިގެން ތުހުމަތުކުރޭ ދެ މީހަކު ހައްޔަރުކޮށްފައިވާކަމަށެވެ.
ފުލުހުން ބުނީ، މާރާމާރިއާއި ރޭވިގެން ހިންގާ ކުށްތައް، ހާއްސަކޮށް ތޫނު އެއްޗެއްހި ބޭނުންކޮށްގެން ނުރައްކާތެރި ޖަރީމާތައް ހިންގުމަށްފަހު އެއްވެސް ފަރާތަކަށް ފިލާ ނުތިބެވޭނެކަމަށާއި، މިފަދަ ނުރައްކާތެރި އަމަލުތައް ހިންގާ ފަރާތްތައް ހޯދައި، އެ ފަރާތްތަކުގެ މައްޗަށް ހިންގަންޖެހޭ ތަހުޤީޤްތައް ހިންގާ ޝަރީއަތަށް ހުށައަޅާނެކަމަށެވެ. އަދި މިފަދަ މައްސަލަތައް ތަހުޤީޤްކުރުމުގައި ވަކި ފަރާތަކަށް ނުޖެހި ސާބިތުކަންމަތީ ފުލުހުން ދެމިތިބޭނެކަމުގެ ޔަޤީންކަންވެސްދޭކަމަށް ބަޔާނުގައި ބުނެފައިވެއެވެ.
