ޑިޕްލޮމެޓިކް ގުޅުންތަކަކީ އިގުތިސާދުގެ މައިނާރު، ރަސްމާލެ އެގްރީމެންޓް ހާމަކުރަން ޖެހޭ: ޝާހިދު
4 އޮކްޓޯބަރު 2026 | އާދީއްތަ 03:59ރަސްމާލެ މަޝްރޫއުގެ އެއްބަސްވުންތައް ސިއްރުކުރާތީ ކަންބޮޑުވުން ފާޅުކުރައްވައި، އެ ލިޔެކިޔުންތައް ހާމަކުރުމަށް އެމްޑީޕީގެ ކުރީގެ ރައީސް ޝާހިދު ވަނީ ގޮވާލައްވާފައި. މި ސަރުކާރުގައި ހާމަކަން ބޮޑު ސިޔާސަތެއް ނެތުމުން ބޭރުގެ ގައުމުތަކާއެކު އޮންނަ ގުޅުމަށް ބުރޫއަރާފާނެ ކަމަށާއި، ފުށިދިއްގަރުފަޅު ހިއްކުމުގެ މަޝްރޫއަކީ އުފެދުމުގައި ވެސް ބޮޑެތި އޮޅުވާލުންތަކެއް އެކުލެވޭ ކަމެއްގެ ގޮތުގައި ޝާހިދު ސިފަކުރެއްވި
އެމްޑީޕީގެ ރަސްމިއްޔާތެއްގައި އެމްޑީޕީގެ ކުރީގެ ރައީސް އަބްދުﷲ ޝާހިދު ވާހަކަފުޅު ދައްކަވަނީ | އެމްޑީޕީ ސެކްރިޓޭރިއެޓް
ދުނިޔެ ދުވަހުން ދުވަހަކަށް ބަވަނަވަމުން އަންނަ އިރު، އެއް ގައުމު އަނެއް ގައުމާއެކު އޮންނަ ޑިޕްލޮމެޓިކް ގުޅުންތަކަކީ އިގުތިސާދުގެ މައިނާރު ކަމަށާއި، އެ ގުޅުންތަކަށް ބުރޫއަރައިފިނަމަ އޭގެ ނިކަމެތިކަން ތަހައްމަލުކުރަން ޖެހޭނީ އާންމު ރައްޔިތުންނާއި ކުދި ވިޔަފާރިތަކުން ކަމަށް އެމްޑީޕީގެ ކުރީގެ ރައީސް, އަބްދުﷲ ޝާހިދު ވިދާޅުވެއްޖެ އެވެ.
ހޮނިހިރު ދުވަހުގެރޭ އެމްޑީޕީގެ 5 ވަނަ ކޮންގްރެސް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ޝާހިދު ވަނީ މިހާރުގެ ސަރުކާރުން ފުށިދިއްގަރުފަޅު ނުވަތަ ރަސްމާލެ މަޝްރޫއާ ގުޅިގެން ސޮއިކުރި ކަމަށް ބުނާ އެގްރީމެންޓުގެ ސިއްރުވެރިކަމާމެދު ކަންބޮޑުވުން ފާޅުކުރައްވާފަ އެވެ.
ޝާހިދު ވިދާޅުވީ މި ސަރުކާރުގައި ޓްރާންސްޕޭރެންސީ އާއި ގުޑް ގަވަރނަންސްގެ ކަންފުޅެއް ވެސް ނެތުމުގެ ސަބަބުން، އެ އެގްރީމެންޓުގައި އޮތީ ކޮން އެއްޗެއްކަން އެނގޭ ހަމަ އެކަކު ވެސް ނެތް ކަމަށެވެ. އަދި މީގެ ސަބަބުން ރައްޔިތުންނަށް ޖެހެނީ 'ސްޕެކިއުލޭޓް' ކުރަން ކަމަށާއި، އޭގެ ހިތި ނަތީޖާއަކަށް ވާނީ އެކުވެރި ދައުލަތްތަކާއެކު އޮންނަ ގުޅުން ހީނަރުވުން ކަމަށް އޭނާ ފާހަގަކުރެއްވި އެވެ.
މީގެ އިތުރުން ޝާހިދު ވަނީ ރަސްމާލެ އެގްރީމެންޓް ހާމަކުރުމަށް ވެސް ގޮވާލައްވާފަ އެވެ.
އަޅުގަނޑު މިރޭ ވެސް މި ގޮވާލަނީ ރަސްމާލެއާއި އެނޫން ވެސް ދިވެހި ދައުލަތާއި ބޭރުގެ ބޮޑެތި ކުންފުނިތަކާ ވެވޭ އެއްބަސްވުންތައް ސިއްރު ނުކޮށް ހާމަކުރަން. ރައްޔިތުންގެ އިތުބާރު ލިބޭނީ ހާމަކަން ބޮޑުކުރި ވަރަކަށްއަބްދުﷲ ޝާހިދު
ފުށިދިއްގަރުފަޅުގެ އެގްރީމެންޓަކީ "ޑިސެޕްޓަސް އެބް އިނީޝިއޯ" ނުވަތަ އުފެދުމުގައި ވެސް އޮޅުވާލުމެއް ކަމަށް ސިފަކުރައްވަމުން، ފަޅު ހިއްކުމުގައި ފައިސާ ހަރަދުކުރި ގޮތާއި، ވެލިއެޅި ގޮތުގެ އިތުރުން ފަޅަށް ކިޔާ ނަމާއި ދިން އެގްރީމެންޓުގައި ވެސް ބޮޑެތި އޮޅުވާލުންތަކެއް ހުރި ކަމަށް ޝާހިދު ތުހުމަތުކުރެއްވި އެވެ.
