ސިންގަޕޫރުން އެ ގައުމުގެ ސިވިލް ސާވަންޓުންނަށް ބައިވެރިން ހޯދައިދިނުމުގެ ރަސްމީ ޚިދުމަތެއް ފަށައިފި

ހަޔާތުގެ ބައިވެރިން ހޯދައިދިނުމުގެ ކަންކަން ސިންގަޕޫރުން ސަރުކާރުގެ އިދާރީ ނިޒާމުގެ ތެރެއަށް ވައްދައި، އާ ގޮތަކަށް އެކަން ކުރަން ފަށައިފި އެވެ. އެގޮތުން މިހާރު ސަރުކާރުން އިސްނަގައިގެން މީހުންނަށް ބައިވެރިން ހޯދައިދިނުމުގެ މަސައްކަތް ވަނީ ފަށާފަ އެވެ.

ސިންގަޕޫރުގެ ގަވަރންމަންޓް ޓެކްނޮލޮޖީ އެޖެންސީ (ގަވްޓެކް) އިން ވަނީ "ފަސްޓްޑޭޓް" ގެ ނަމުގައި މެޗްމޭކިންގ ނުވަތަ ބައިވެރިން ހޯދައިދޭ ޚިދުމަތެއް ތައާރަފުކޮށްފަ އެވެ. އުމުރުން 21 އަހަރާއި 35 އަހަރާ ދެމެދުގެ ސަރުކާރު މުވައްޒަފުންނަށް ޚާއްސަކޮށްގެން ފަރުމާކޮށްފައިވާ މި ޚިދުމަތުގެ ބޭނުމަކީ، އާންމުކޮށް ބޭނުންކުރާ ޑޭޓިންގ އެޕްތަކުގައި ވަގުތު ބޭކާރުކުރުމުގެ ބަދަލުގައި، ފަސޭހަކަމާއެކު ބައިވެރިއަކު ހޯދައިދިނުމެވެ.

މި ޚިދުމަތް ބޭނުންކުރާ ފަރާތްތަކުން ތަފްސީލީ ސުވާލު ކަރުދާހެއް ފުރިހަމަކުރުމުން، ނޯބެލް އިނާމު ހާސިލުކޮށްފައިވާ އަލްގޮރިދަމެއް ބޭނުންކޮށްގެން އެމީހަކާ އެންމެ ގުޅޭ ބައިވެރިއަކު ހޯދައިދެ އެވެ.

އާންމު ޑޭޓިންގ އެޕްތަކާ ޚިލާފަށް، މި ޚިދުމަތުން ކޮންމެ ބުރެއްގައިވެސް ދައްކައިދޭނީ އެންމެ ބައިވެރިއެކެވެ. ދެމީހުންނަށްވެސް އެސްއެމްއެސްއެއް ފޮނުވުމުން، ގުޅުން ކުރިއަށް ގެންދަން ބޭނުންތޯ ނިންމުމަށް 72 ގަޑިއިރުގެ ފުރުސަތެއް ލިބޭނެ އެވެ.

ސިންގަޕޫރުގެ ނޫސްވެރިޔާ ޓިއޯ ކައި ޝިއަންގްގެ ނިއުސްލެޓަރގައި ރިޕޯޓްކޮށްފައިވާ ގޮތުގައި، މި ސުވާލު ކަރުދާހުގައި ހިމެނޭ ސުވާލުތަކަކީ އާންމު ޑޭޓިންގ އެޕްތަކުގައި ހުންނަ ސުވާލުތަކަށްވުރެ މާ ފުން އަދި ތަފްސީލީ ސުވާލުތަކެކެވެ. އޭގެ ތެރޭގައި އެމީހަކީ ކަސްރަތަށް ލޯބިކުރާ މީހެއްތޯ ނުވަތަ ނޫންތޯއާއި، ހެނދުނު ހޭލާ މީހެއްތޯ ނުވަތަ ދަންވަރު ހޭލާ ހުންނަ މީހެއްތޯއާއި، އަދި ދަރިން ހޯދަން ބޭނުންވޭތޯ ފަދަ ސުވާލުތައް ހިމެނެ އެވެ.

މީގެ އިތުރުން، އެމީހަކު އުޅޭ ކޮޓަރި މިވަގުތު ހުރި ގޮތާ ބެހޭގޮތުންވެސް ސުވާލު ކުރެ އެވެ. "ފަސްޓްޑޭޓް" ވެބްސައިޓުގައިވާ ގޮތުން، މި ޚިދުމަތަށް ރަޖިސްޓްރީ ވެވޭނީ ސިންގަޕޫރުގެ ގައުމީ ޑިޖިޓަލް އައިޑެންޓިޓީ ނިޒާމު ކަމަށްވާ "ސިންގްޕާސް" މެދުވެރިކޮށެވެ. އަދި މިއީ ހުސްހަށިބައި މީހުންނާއި، ހުވަފަތްވެފައިވާ މީހުންގެ އިތުރުން ވަރިވެފައިވާ މީހުންނަށްވެސް ބޭނުންކުރެވޭނެ ޚިދުމަތެކެވެ. ސުވާލު ކަރުދާސް ފުރިހަމަކުރުމުން، 1962 ވަނަ އަހަރު ހިސާބު އިލްމުވެރިން ކަމަށްވާ ޑޭވިޑް ގޭލް އަދި ލޮއިޑް ޝޭޕްލީ އުފެއްދި "ގޭލް-ޝޭޕްލީ ސްޓޭބަލް މެރިއޭޖް" އަލްގޮރިދަމް ބޭނުންކޮށްގެން ބައިވެރިއަކު ހޯދައިދެ އެވެ.

މި އަލްގޮރިދަމަކީ 2012 ވަނަ އަހަރު އިގްތިސާދީ ދާއިރާއިން ޝޭޕްލީއަށް ނޯބެލް އިނާމު ލިބުމުގައި މުހިންމު ދައުރެއް އަދާކުރި އެއްޗެކެވެ. ނަމަވެސް މީގެ ކުރިން މި ނިޒާމު އާންމުކޮށް ބޭނުންކޮށްފައިވަނީ މެޑިކަލް ދަސްވެނިން ހޮސްޕިޓަލްތަކާ ގުޅުވައިދިނުމަށާއި ދަރިވަރުން ސްކޫލްތަކަށް ބެހުމަށެވެ. "ފަސްޓްޑޭޓް" އިން މި ނިޒާމު ބޭނުންކުރަނީ ދެ ބީރައްޓެހިންގެ މެދުގައި ލޯބީގެ ގުޅުމެއް އުފެދިދާނެތޯ ބެލުމަށެވެ.

ސާދާ ބަހުން ބުނާނަމަ، މި ނިޒާމުން ކުރާ ކަމަކީ ދެމީހުންވެސް ބައިވެރިއެއްގެ ކިބައިން ބޭނުންވާ ސިފަތަކަށް ބަލައި، އެންމެ އެކަށީގެންވާ ޖޯޑެއް ހޯދައިދިނުމެވެ.

ކޮންމެ މެޗަކާއެކު، ދެމީހުންގެ ގުޅުން ހުރި މިންވަރު އަންގައިދޭ ސްކޯއަކާއި، އެމީހެއްގެ ތައާރަފެއް އަދި އަމިއްލަ ނޯޓެއް ފެންނަން ހުންނާނެއެވެ. ނަމަވެސް ކޮންމެ ބުރެއްގައި ބައިވެރިއަކު ފެންނާނެ ކަމުގެ ޔަގީންކަމެއް ނޯވެ އެވެ. އެމީހެއްގެ މައުލޫމާތު ފެންނާނީ ހަމައެކަނި އެމީހަކާ ގުޅުވައިދޭ ބައިވެރިޔާއަށް އެކަންޏެވެ. އަދި ފޯނު ނަންބަރު ފަދަ މައުލޫމާތު ހިއްސާކުރެވޭނީ ދެމީހުންވެސް އެކަމަށް އެއްބަސްވުމުންނެވެ.

ދެމީހުން ބައްދަލުކުރަން ނިންމައިފިނަމަ، ގުޅުން ބަދަހިކުރުމަށް އެހީތެރިވުމުގެ ގޮތުން "ޑޭޓް ކުއެސްޓްސް" ނުވަތަ އެކުގައި ކުރެވިދާނެ ކަންކަން "ފަސްޓްޑޭޓް" އިން ހުށަހަޅަ އެވެ. އަދި ޕްރޮމޯޝަން ދުވަސްވަރުގައި، ދެމީހުން އެކުގައި ކެއުމެއް ތަޖުރިބާކުރުން ފަދަ ކަންކަން ފުރިހަމަކުރުމުން ވައުޗަރު ލިބުމުގެ ފުރުސަތުވެސް އޮވެ އެވެ. މި ޚިދުމަތަކީ ގަވްޓެކްގެ މުވައްޒަފުންތަކެއް، އާ މީހުންނާ ބައްދަލުވުމުގައި ދިމާވާ ގޮންޖެހުންތަކަށް ހައްލެއް ހޯދުމަށް ކުރި މަސައްކަތުން އުފެދުނު ޚިދުމަތެކެވެ.

އެމީހުން ގަބޫލުކުރާ ގޮތުގައި، ގިނަ ބަޔަކު ދެއްކުމުގެ ބަދަލުގައި، އުސޫލުތަކާއި ގަބޫލުކުރުންތަކަށް ބަލައި މަދު ބަޔަކު ދެއްކުމުން، އެމީހަކާ މެދު ފުންކޮށް ވިސްނައި ގޮތެއް ނިންމަން ފަސޭހަވާނެ އެވެ.

މީގެ ނަތީޖާއެއްގެ ގޮތުން އުފެދުނު "ފަސްޓްޑޭޓް" އަކީ ސިންގަޕޫރުގެ ސިވިލް ސާވިސްގެ ތެރޭގައި މިހާރު ޓެސްޓްކުރެވެމުންދާ ޕައިލެޓް ޕްރޮގްރާމެކެވެ. އެ ވެބްސައިޓުގައި ބުނެފައިވަނީ، މިއީ ޑޭޓިންގ އެޕްތަކުގައި މީހުން ހޯދައި ހޯދައި ވަރުބަލިވުމަށް އޮތް ހައްލެއް ކަމަށެވެ.

އިންޓަނެޓްގައި ގިނަ ބަޔަކު މިކަމަށް ތާއީދުކުރެ އެވެ. ޚާއްސަކޮށް، އަމިއްލަ ކުންފުނިތަކާ ޚިލާފަށް ސަރުކާރުން މިކަން ކުރަނީ ފައިދާ ހޯދުމުގެ މަގުސަދުގައި ނޫން ކަމަށްވާތީ ގިނަ ބަޔަކު އެކަން ފާހަގަކުރެ އެވެ.

ރެޑިޓްގައި މީހަކު ބުނެފައިވާ ގޮތުގައި، އަމިއްލަ ޑޭޓިންގ އެޕްތަކުން ބޭނުންވަނީ މީހުން އަބަދުވެސް އެ އެޕް ބޭނުންކުރުމަށެވެ. ނަމަވެސް ސަރުކާރުގެ ބޭނުމަކީ މީހުންނަށް ބައިވެރިން ހޯދައިދީ އެ މައްސަލަ ހައްލުކުރުމެވެ. އެހެން މީހަކު ބުނި ގޮތުގައި، ދާއިމީ ގުޅުމެއް ބޭނުންވާ މީހުންނަށް މިއީ ރަނގަޅު ފުރުސަތެކެވެ. ސަބަބަކީ އަމިއްލަ އެޕްތަކަށް ފައިދާވަނީ މީހުން ގިނަގިނައިން އެޕް ބޭނުންކޮށްގެން ކަމަށްވާތީ އެވެ.

ޑޭޓިންގ އެޕްތަކާ މެދު އޮތް މި ނުތަނަވަސްކަމަކީ ހަމައެކަނި ސިންގަޕޫރުގައި އޮތް ކަމެއް ނޫނެވެ. 2024 ވަނަ އަހަރު ގާޑިއަން ނޫހުން އިނގިރޭސިވިލާތުގައި ކުރި ރިޕޯޓެއްގައިވާ ގޮތުން، ގިނަ ބަޔަކު މިހާރު ތިބީ ޑޭޓިންގ އެޕްތަކުން މެސެޖުކޮށްކޮށް ވަރުބަލިވެފަ އެވެ.

ނަމަވެސް، ސަރުކާރުން މިކަން ކުރާ އަސްލު ބޭނުމަކީ އާބާދީ އިތުރުކުރުން ނުވަތަ ދަރިން ހޯދުން ކަމަށް ގިނަ ބަޔަކު ގަބޫލުކުރެ އެވެ.

އެކްސް (ކުރީގެ ޓްވިޓަރ) ގައި މީހަކު މަޖާޒީ ގޮތަކަށް ބުނެފައިވަނީ، މި މަޝްރޫއުގެ ސަބަބުން އާބާދީ އިތުރުވާ މިންވަރަށް ކުޑަވެސް ބަދަލެއް އަތުވެއްޖެނަމަ، މީގެ އުފެއްދުންތެރިންނަށް އަދި އެހެން ނޯބެލް އިނާމެއް ހައްގުވާނެ ކަމަށެވެ.

ތަފާސްހިސާބުތަކުން ދައްކާ ގޮތުގައި 2025 ވަނަ އަހަރު ސިންގަޕޫރުގައި އުފަންވެފައިވަނީ އެންމެ 30,004 ކުދިންނެވެ. މިއީ އޭގެ ކުރީ އަހަރާ އަޅާބަލާއިރު 11 އިންސައްތައިގެ ދަށްވުމެކެވެ. އަދި މިއީ ފާއިތުވި 60 އަހަރު ތެރޭގައި އުފަންވި ކުދިންގެ އަދަދު 30,000 އަށްވުރެ ދަށަށް ދިޔަ ފުރަތަމަ ފަހަރެވެ. ސިންގަޕޫރުގެ ފާޓިލިޓީ ރޭޓް ނުވަތަ އާބާދީ އިތުރުވާ މިންވަރު ވަނީ ރެކޯޑް މިންވަރަކަށް ދަށަށް ގޮސްފަ އެވެ. އެގޮތުން 2024 ވަނަ އަހަރު 0.97 ގައި ހުރި މި އަދަދު މިހާރު ވަނީ 0.87 އަށް ދަށަށް ގޮސްފައެވެ. މީގެ ދިހަ އަހަރު ކުރިން މި އަދަދު ހުރީ 1.24 ގަ އެވެ.

މިދިޔަ ފެބްރުއަރީ މަހު ސިންގަޕޫރުގެ ޑެޕިއުޓީ ޕްރައިމް މިނިސްޓަރު ގަން ކިމް ޔޮންގް ވިދާޅުވި ގޮތުގައި، އުފަންވާ މިންވަރު ދަށަށް ދިއުމާއި އާބާދީ މުސްކުޅިވުމަކީ ގައުމަށް އޮތް ވަރަށް ބޮޑު ނުރައްކަލެކެވެ. ރަސްމީ ހިސާބުތަކުން ދައްކާ ގޮތުގައި 2025 ވަނަ އަހަރު ކައިވެނިކުރި މީހުންގެ އަދަދުވެސް ވަނީ 5.6 އިންސައްތަ ދަށަށް ގޮސްފަ އެވެ.

ނަމަވެސް، ސޯޝަލް މީޑިއާގައި ބައެއް މީހުން މިކަމަށް ފާޑުކިޔަމުންދަނީ، ސަރުކާރުގެ ބޭނުމަކީ ހަމައެކަނި އާބާދީ އިތުރުކުރުން ކަމަށް ބުނެ އެވެ. މި ޚިދުމަތް 35 އަހަރުން މަތީގެ މީހުންނަށް ބޭނުން ނުކުރެވޭތީ، ރެޑިޓްގައި މީހަކު ބުނެފައިވަނީ 35 އަހަރުން މަތީގެ މީހުންނަށް ދަރިން ހޯދުމުގައި ނުރައްކާ ބޮޑުވުމުން، ސަރުކާރުން އެމީހުން ބާކީކޮށްލީ ކަމަށެވެ.

ސިންގަޕޫރު ސަރުކާރުން މީހުންނަށް ބައިވެރިން ހޯދައިދިނުމުގެ މަސައްކަތް ކުރާތާ މިހާރު އެތައް އަހަރެއް ވެއްޖެ އެވެ. ނަމަވެސް މިކަން ކުރާ ގޮތްތަކަށް ވަނީ ބޮޑެތި ބަދަލުތަކެއް އައިސްފަ އެވެ.

1984 ވަނަ އަހަރު ސަރުކާރުން ވަނީ "ސޯޝަލް ޑިވެލޮޕްމަންޓް ޔުނިޓް" (އެސްޑީޔޫ) ގެ ނަމުގައި އިދާރާއެއް އުފައްދާފަ އެވެ. އޭގެ ބޭނުމަކީ ޔުނިވަރސިޓީ ތައުލީމު ހާސިލުކޮށްފައިވާ ހުސްހަށިބައި މީހުން ކައިވެނިކުރުމަށް ހިތްވަރު ދިނުމެވެ. އެގޮތުން ރޭގަނޑުގެ ކެއުންތަކާއި، ނެށުމުގެ ހަފުލާތަކާއި، އަދި ގައުމުން ބޭރަށް ދަތުރުތައް ރާވައިގެން މީހުން ބައްދަލުވުމުގެ ފުރުސަތު ހޯދައިދިނެވެ.

މި މަސައްކަތް ފެށީ ކިޔަވައިގެން ތިބި އަންހެނުން ކައިވެނި ނުކޮށް ތިބޭ މިންވަރު އިތުރުވުމާ ގުޅިގެން، ސަރުކާރުން ސީދާ ގޮތެއްގައި ކައިވެނިކުރުމަށް ބާރުއެޅުމުގެ ގޮތުންނެވެ.