އެމްޑީޕީގެ އެންމެ އިސް މަގާމަކީ ޗެއަރޕާސަން ކަމަށް ކަނޑައަޅަން ކޮންގްރެސްއަށް ހުށަހަޅަނީ
1 އޮކްޓޯބަރު 2026 | ބުރާސްފަތި 12:52އެމްޑީޕީގެ ޚާއްސަ ކޮންގްރެސްގައި ޕާޓީގެ ރައީސާއި ނައިބު ރައީސްގެ މަގާމު އުވާލައި، އެންމެ އިސް ލީޑަރަކީ ޗެއަރޕާސަން ކަމަށް ކަނޑައެޅުމަށް އަސާސީ ގަވާއިދަށް ބަދަލުތަކެއް ގެންނަނީ. މި ބަދަލުތަކަކީ ޕާޓީގެ ހިންގުން އެއް ލީޑަޝިޕެއްގެ ދަށަށް ގެނައުމަށް ކުރާ މަސައްކަތެއް ކަމަށްވާއިރު، މިހާރު ހުސްކޮށް އޮތް މި ދެ މަގާމު އުވާލުމަށް 980 އަށް ވުރެ ގިނަ މަންދޫބުން ބައިވެރިވާ ކޮންގްރެސްއަށް ވަނީ ހުށަހަޅާފައި
އިދިކޮޅު އެމްޑީޕީގެ ދިދަ | ސޯޝަލް މީޑިއާ
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ އެންމެ އިސް މަގާމަކީ ޗެއަރޕާސަން ކަމަށް ކަނޑައަޅައި، އެ ޕާޓީގެ ރައީސާއި ނައިބު ރައީސްގެ މަގާމު އުވާލުމަށް އަސާސީ ގަވާއިދަށް ބޮޑެތި ބަދަލުތަކެއް ގެނައުމަށް ނިންމައިފި އެވެ.
މި މުހިންމު އިސްލާހުތައް ފާސްކުރުމަށް ހުށަހެޅުމަށް ހަމަޖެހިފައިވަނީ ބުރާސްފަތި ދުވަހުގެރެ އިން ފެށިގެން ހޮނިހިރު ދުވަހުގެ ނިޔަލަށް މާލޭގައި ކުރިއަށްގެންދިއުމަށް ތާވަލުކޮށްފައިވާ އެމްޑީޕީގެ ޚާއްސަ ކޮންގްރެސްގަ އެވެ.
އަލަށް އެކުލަވާލެވޭ އަސާސީ ގަވާއިދުގައި ބަޔާންކޮށްފައިވާ ގޮތުގައި، ޕާޓީގެ ސިޔާސީ އަދި އިދާރީ އެންމެ އިސް ލީޑަރަކީ ޗެއަރޕާސަން އެވެ. އަދި ޗެއަރޕާސަންއަށް ފަހު ޕާޓީގައި ދެން އެންމެ އިސް ދައުރެއް އަދާކުރައްވާނީ ޗެއަރޕާސަންގެ ނައިބުންނެވެ. މި ބަދަލާއެކު، ޕާޓީ ހިންގުމުގެ އެންމެހައި ކަންކަމާއި މުޅި މަސްއޫލިއްޔަތު ފުރިހަމައަށް އޮންނާނީ ޗެއަރޕާސަން އަދި ނައިބުންގެ އަތްމަތީގަ އެވެ.
އެމްޑީޕީގެ ރައީސާއި ނައިބު ރައީސްގެ މަގާމު އުވާލުމަށް ކޮންގްރެސްއަށް ހުށަހެޅުމަށް ތައްޔާރުވަމުންދާއިރު، މި ދެ މަގާމު ވެސް މިވަގުތު އޮތީ ހުސްކޮށެވެ. މި ދެ މަގާމު ހުސްވެފައިވަނީ، އިންތިހާބަކާ ނުލައި އެމްޑީޕީގެ ރައީސްކަމަށް އިންތިހާބުވެވަޑައިގެންނެވި ކުރީގެ ފޮރިން މިނިސްޓަރު އަބްދުﷲ ޝާހިދު، އެމްޑީޕީގެ ކުރިއަށް އޮތް ރިޔާސީ ޕްރައިމަރީގައި ވާދަކުރެއްވުމަށްޓަކައި އެ މަގާމުން އިސްތިއުފާ ދެއްވުމާ ގުޅިގެންނެވެ. ހަމައެއާއެކު، ޝާހިދުގެ ކެމްޕެއިން ހަރަކާތްތަކުގައި އަމަލީގޮތުން އިސްކޮށް ބައިވެރިވެވަޑައިގަތުމުގެ ބޭނުމުގައި، ޕާޓީގެ ނައިބު ރައީސްގެ މަގާމުގައި ހުންނެވި ހިސާން ހުސެއިން ވެސް ވަނީ މަގާމުން އިސްތިއުފާ ދެއްވާފަ އެވެ.
ފާހަގަކޮށްލެވޭ ގޮތުގައި، ޕާޓީގެ ހިންގުން ހަރުދަނާކޮށް އެއް ލީޑަރޝިޕެއްގެ ދަށަށް ގެނައުމަށްޓަކައި ރައީސާއި ނައިބު ރައީސްގެ މަގާމު އުވާލުމަކީ، އެ ޕާޓީގެ މިހާރުގެ ޗެއަރޕާސަން އަދި ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް މީގެކުރިން ވެސް ތާއީދުކުރައްވައި ފާޅުކުރައްވާފައިވާ ޚިޔާލެކެވެ.
މި ކޮންގްރެސްއާ ގުޅޭގޮތުން އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އެ ޕާޓީގެ ޑެޕިއުޓީ ޗެއާޕާސަން އިބްރާހީމް ވަހީދު (އިބުރޭ) ވިދާޅުވީ، މި ބައްދަލުވުމަށް ޕާޓީގެ އާންމު މެންބަރުންނާއި މަންދޫބުންގެ ފަރާތުން ވަރަށް ބޮޑު ތަރުހީބެއް ލިބެމުން އަންނަ ކަމަށެވެ. އެގޮތުން ރާއްޖޭގެ އެކި ކަންކޮޅުތަކުން މިހާތަނަށް 980 އަށް ވުރެ ގިނަ މަންދޫބުން މި ކޮންގްރެސްގައި ބައިވެރިވުމަށް ރަޖިސްޓްރީވެފައިވާ ކަމަށް އޭނާ ވިދާޅުވި އެވެ.
އިލެކްޝަންސް ކޮމިޝަންގެ އެންމެ ފަހުގެ ރަސްމީ ދަފްތަރުތަކުން ދައްކާ ގޮތުގައި އެމްޑީޕީގައި 55،399 މެންބަރުން އެބަތިއްބެވެ. މިއާއެކު އެމްޑީޕީ ވެފައިވަނީ ވެރިކަންކުރާ ޕީއެންސީ ފިޔަވައި، ރާއްޖޭގައި މިވަގުތު އޮތް ދެވަނަ އަށް އެންމެ މެންބަރުން ގިނަ އަދި ސިޔާސީ ގޮތުން އެންމެ ބޮޑު އިދިކޮޅު ޕާޓީއަށެވެ. މި ކޮންގްރެސްއިން ގެންނަ އިސްލާހުތަކަކީ ޕާޓީގެ ކުރިމަގާއި ކުރިއަށް އޮތް އިންތިހާބުތަކަށް އެ ޕާޓީން ކުރާ ތައްޔާރީތަކުގައި ވަރަށް މުހިންމު ދައުރެއް އަދާކުރާނެ ބަދަލުތަކެއް ކަމަށް ބެލެވެ އެވެ.
