އެމްޑީޕީގެ 5 ވަނަ ކޮންގްރެސް ފެށުމަށް ތައްޔާރުވެއްޖެ
30 ސެޕްޓެމްބަރު 2026 | ބުދަ 15:34އެމްޑީޕީގެ 5 ވަނަ ކޮންގްރެސް އޮކްޓޯބަރު 1 ވާ ބުރާސްފަތި ދުވަހު މާލޭގައި ފެށުމަށް ތައްޔާރުވަމުންދާއިރު، މިއީ ޕާޓީގެ ކުރިމަގާއި ރާއްޖޭގެ ސިޔާސީ މަސްރަހަށް މުހިންމު ނިންމުންތަކެއް ނިންމާނެ ހަރަކާތެކެއް. މި ކޮންގްރެސްގެ ތެރެއިން ރައްޔިތުންގެ އުންމީދުތައް ހާސިލުވެ، ޕާޓީގެ ސިޔާސަތުތައް އިތުރަށް ވަރުގަދަވެގެންދާނެ ކަމަށް އެ ޕާޓީން ގަބޫލުކުރޭ
ރައްޔިތުންގެ މަޖިލީހުގެ ތޮއްޑޫ ދާއިރާގެ ކުރީގެ މެންބަރު ހުސައިން ސަމީރު ކޮންގްރެސްގެ އެންމެ ފަހުގެ ތއްޔާރިތަކާއި ބެހޭގޮތުން މައުލޫމާތު ދެނީ | ރާއްޖެ އެމްވީ
ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) ގެ 5 ވަނަ ކޮންގްރެސް ފެށުމަށްޓަކައި އެންމެ ފަހުގެ ތައްޔާރީތައް ވަރަށް ބާރަށް ކުރިއަށް އެބަދެ އެވެ.
1 އޮކްޓޯބަރު 2026 ވާ ބުރާސްފަތި ދުވަހުގައި ފެށުމަށް ހަމަޖެހިފައިވާ މި ކޮންގްރެސް ކުރިއަށްދާނީ މާލެ ސިޓީ ކައުންސިލްގެ ހޯލުގަ އެވެ. މި ހަފުތާގެ ހޮނިހިރު ދުވަހުގެ ރޭގެ ނިޔަލަށް ކުރިއަށްދާ މި ބޮޑު ހަރަކާތަކީ އެ ޕާޓީގެ ކުރިމަގާއި ރާއްޖޭގެ ސިޔާސީ މަސްރަހަށް މުހިންމު ނިންމުންތަކެއް ނިންމިގެންދާނެ ކޮންގްރެސްއެއް ކަމަށް އެމްޑީޕީ އިން ބުނެ އެވެ.
ކޮންގްރެސްގެ އެންމެ ފަހުގެ ތައްޔާރީތައް ކުރިއަށްދާ ގޮތް ބައްލަވާލެއްވުމަށްފަހު، ރައްޔިތުންގެ މަޖިލީހުގެ ތޮއްޑޫ ދާއިރާގެ ކުރީގެ މެންބަރު ހުސައިން ސަމީރު ވިދާޅުވީ، ރާއްޖެއަށް ހަގީގީ ހަމަމަގު ދައްކައިދެވޭނެ ހަމައެކަނި ސިޔާސީ ޕާޓީއަކީ އެމްޑީޕީ ކަމަށެވެ. އަދި ވެރިކަމުގައި އޮވެގެންނާއި ވެރިކަމުން ބޭރުގައި އިދިކޮޅުގައި އޮވެގެން ވެސް އެމްޑީޕީ އިން ކޮންގްރެސްތައް ކާމިޔާބުކަމާއެކު ބާއްވަމުން އަންނަކަން އޭނާ ފާހަގަކުރެއްވި އެވެ.
ސަމީރު އިތުރަށް ވިދާޅުވީ، ރައްޔިތުން މިއަދު އެދޭ އެދުންތަކާއި ދެކޭ ހުވަފެންތައް މި ކޮންގްރެސްގެ ތެރެއިން ހާސިލުވެގެންދާނެ ކަމާމެދު އެއްވެސް ޝައްކެއް ނެތް ކަމަށެވެ.
މި ކޮންގްރެސް ނިމިގެންދާއިރު، ރައްޔިތުން އެދޭ ތާހިރު، އަބުރުވެރި ދިރިއުޅުން ހޯދައިދޭނެ ގޮތްތައް ސާފުވެގެންދާނެ. އެމްޑީޕީއަކީ އަބަދުވެސް މި ޤައުމަށް އަސާސީ ބަދަލުތަކާއި ހެޔޮ ސިޔާސަތުތައް ގެނެސްދީފައިވާ ޕާޓީއެއްހުސައިން ސަމީރު
އެމްޑީޕީގެ ވެރިކަންތަކުގައި ޤައުމަށް ގެނެސްދީފައިވާ އިގުތިސާދީ އިންޤިލާބީ ބަދަލުތަކަށް އަލިއަޅުއްވާލައްވަމުން ސަމީރު ވިދާޅުވީ، 'ޒުވާން ދަނޑުވެރިޔާ' ފަދަ މުހިންމު ސިޔާސަތުތަކަކީ އެމްޑީޕީގެ އުފެއްދުމެއް ކަމަށާއި، ތޮއްޑޫ ދާއިރާއިން މިކަމުގެ ފައިދާ ވަރަށް ފަޚުރުވެރިކަމާއެކު ފެންނަން އެބައޮތް ކަމަށެވެ. މީގެއިތުރުން، އެމްޑީޕީއަކީ ހަމައެކަނި ސިޔާސަތުތަކެއް ކަރުދާހުގައި ލިޔެލާ ބައެއް ނޫންކަން ފާހަގަކުރައްވަމުން އޭނާ ވިދާޅުވީ، ރާއްޖޭގެ ބޮޑެތި ވިޔަފާރިވެރިންނަށް 50 އަހަރު ތެރޭގައި ވެސް ނުއުފެއްދުނު ފަދަ ބޮޑު ގެސްޓްހައުސް ވިޔަފާރީގެ ސިނާއަތެއް އުފަންކޮށް، އާންމު ރައްޔިތުންގެ ޖީބަށް އޭގެ މަންފާ ވައްދައިދިނީ ވެސް ސީދާ އެމްޑީޕީ އިން ކަމަށެވެ.
ކޮންގްރެސްގެ އިންތިޒާމުތަކާ ގުޅޭގޮތުން ވާހަކަދައްކަވަމުން ސަމީރު ވަނީ އެމްޑީޕީއަށް ތާއީދުކުރައްވާ އަދި ޕާޓީއަށް ލޯބިކުރާ ހުރިހާ ރައްޔިތުންނަށް ދައުވަތު ދެއްވާފަ އެވެ. އެގޮތުން، ވޯޓުލުމާއި ރަސްމީ ބަހުސްތަކުގައި ބައިވެރިވެވެނީ ހަމައެކަނި ކޮންގްރެސްގެ މަންދޫބުންނަށް ކަމުގައި ވިޔަސް، ކޮންގްރެސް ހިނގަމުންދާ ގޮތް ބަލާލުމުގެ ފުރުސަތު އާންމު ރައްޔިތުންނަށް ވެސް ހުޅުވާލެވިފައިވާ ކަމަށް އޭނާ ވިދާޅުވި އެވެ.
ހޮނިހިރު ދުވަހުގެ ނިޔަލަށް ކުރިއަށްދާ މި ކޮންގްރެސް ވެގެންދާނީ ޕާޓީގެ އެތެރޭގެ ޑިމޮކްރަސީ ވަރުގަދަކޮށް، ކުރިއަށް އޮތް ސިޔާސީ މައިދާނަށް ޕާޓީ އިތުރަށް ތައްޔާރުވެ، ރައްޔިތުންގެ އިތުބާރު އަލުން ހޯދުމަށް އެޅޭ ވަރަށް މުހިންމު ފިޔަވަޅަކަށް ކަމަށް އެމްޑީޕީ އިން ބުނެ އެވެ.
