ލާމަރުކަޒީ ޤާނޫނަށް މި ސަރުކާރުން ގެނައި ބަދަލުތަކާއެކު މައިސަރުކާރަށް ސަލާން ޖެހުން ވަނީ އިޔާދަވެފައި: ހުޅުދެލި ކައުންސިލް
28 ސެޕްޓެމްބަރު 2026 | ހޯމަ 07:19ލާމަރުކަޒީ ނިޒާމަށް ގެނައި ބަދަލުތަކުގެ ސަބަބުން ކައުންސިލްތައް ހިންގުމަށް ހުރަސްތަކެއް ކުރިމަތިވެ، މައި ސަރުކާރަށް ބަރޯސާވާންޖެހޭ މިންވަރު އިތުރުވެފައިވާ ކަމަށް ހުޅުދެލި ކައުންސިލްގެ ރައީސް އަހުމަދު ނަސްރު ވިދާޅުވެއްޖެ. އެހެންކަމުން ރަށުގެ ތަރައްޤީއާއި ލޯކަލް ޓޫރިޒަމް ކުރިއެރުވުމަށްޓަކައި، ސަރުކާރަށް ބަރޯސާނުވެ އަމިއްލައަށް އާމްދަނީ ހޯދޭނެ މަގުތައް ފަހިކުރުން މުހިންމުކަން އޭނާ ފާހަގަކުރެއްވި
ދ. ހުޅުދެލި ކައުންސިލުގެ ރައީސް އަހުމަދު ނަސްރު | ރާއްޖެ އެމްވީ
ލާމަރުކަޒީ ޤާނޫނަށް މި ސަރުކާރުން ގެނައި ބަދަލުތަކުގެ ތެރޭގައި ކަންބޮޑުވާ ކަންކަން އެބަހުރިކަމަށާއި، އެކަމުގެ ސަބަބުން ކައުންސިލުގެ ހިންގުމާއި އިދާރީ ކަންކަމަށް ދަތިތައް އެބަހުރިކަމަށް ދ، ހުޅުދެލި ކައުންސިލުގެ ރައީސް އަހުމަދު ނަސްރު ވިދާޅުވެއްޖެ އެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ހުޅުދެލި ކައުންސިލް ރައީސް ވިދާޅުވީ، މިއީ މައިސަރުކާރުގައި ސަލާން ޖަހަން ޖެހުނު ޒަމާން އިޔާދަވުން ކަމަށާއި، ސަރުކާރަށް ބަރޯސާ ނުވެ، ރަށްރަށުން ވެސް އާމްދަނީ ހޯދައިގެން މަޝްރޫއުތައް ހިންގޭނެ ގޮތްތައް ހޯދަންޖެހޭ ކަމަށެވެ.
ހުޅުދެއްޔަކީ ލޯކަލް ޓޫރިޒަމަށް ހިތްގައިމު ރަށަކަށް ވާއިރު، ރަށް އިތުރަށް ތަރައްޤީ ކުރުމާއި، ފަތުރުވެރިކަން ތަރައްޤީ ކުރެވޭނެ ގޮތްތައް ބެލުމަކީ މިހާރު ކައުންސިލުގެ އަމާޒެއް ކަމަށް ނަސްރު ވިދާޅުވި އެވެ. އަދި ކައުންސިލުގެ ބޭނުމަކީ ފަތުރުވެރިން އަންނަ ހިތްވާނެ ފަދަ ސަރަހައްދުތައް ގާއިމުކޮށް، މިއީ ޓޫރިސްޓު ޑެސްޓިނޭޝަނަކަށް ހެދުން ކަމަށް ވިދާޅުވި އެވެ.
އެހެންނަމަވެސް ލާމަރުކަޒީ ޤާނޫނަށް މި ގެނައި ބަދަލުތަކާއެކު އެ ކަންކަމުގައި ވެސް ހުރަސްތައް ކުރިމަތިވާނެ ކަމަށް އޭނާ ވިދާޅުވި އެވެ.
މީގެއިތުރުން އަތޮޅު ކައުންސިލުތައް އުވާލުމާ ގުޅިގެން ވެސް ބޮޑެތި ދަތިތައް އެބަހުރި ކަމަށް ނަސްރު ވިދާޅުވި އެވެ. އަދި އެލްޖީއޭއަށް އެކަށީގެންވާ ގޮތެއްގައި ކައުންސިލުތަކަށް އެހީތެރިކަން ފޯރުކޮށެއް ނުދެވޭ ކަމަށް އޭނާ ވިދާޅުވި އެވެ.
ހުޅުދެލި ކައުންސިލް ރައީސް ފާހަގަކުރެއްވި މައިގަނޑު ކަންބޮޑުވުންތަކުގެ ތެރޭގައި ކައުންސިލުތަކުގެ އިދާރީ ހިންގުމުގައި ކުރިމަތިވާ ދަތިތަކާއި، ސަރުކާރުގެ އެހީތެރިކަން ލިބުމުގައި ދިމާވާ ދަތިތައް ހިމެނެ އެވެ. މި ހާލަތުގައި ރަށްރަށުން މިނިވަންކަމާއެކު އާމްދަނީ ހޯދައިގެން ތަރައްޤީގެ މަޝްރޫއުތައް ހިންގަން ޖެހޭނެ ކަމަށް ވިދާޅުވި އެވެ.
ލާމަރުކަޒީ ޤާނޫނަށް މި ސަރުކާރުން ގެނައި ބަދަލުތަކާ ގުޅިގެން ގިނަ ކައުންސިލްތަކުން ކަންބޮޑުވުން ފާޅުކޮށްފައިވެ އެވެ.
