މުޅި ދައުލަތް މިއޮތީ ވައްކަން ކުރުމުގައި ކަމަށާއި ކަންބޮޑުވާ އެއްވެސް މުއައްސަސާއެއް ނެތް ކަމަށް ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ވިދާޅުވެއްޖެ އެވެ.

ރާއްޖެޓީވީގެ "މިރައީސް" ޕްރޮގްރާމްގައި ވާހަކަ ދައްކަވަމުން ނިޒާރު ވިދާޅުވީ ދައުލަތުގެ ފައިސާއިން ވައްކަން ކުރުން މިއީ މިހާރު އާދައިގެ ކަމެއްގެ ގޮތުގައި ރައްޔިތުންނަށް ދައްކަން މި ސަރުކާރުން މަސައްކަތް ކުރަމުންދާ ކަމަށާއި ދައުލަތުގެ ފައިސާއިން ވައްކަން ނުކުރާ އެއްވެސް މުއައްސަސާއެއް ނެތް ކަމަށެވެ.

"ވައްކަން ނުކުރާ އެއްވެސް ތަނެއްނެތް. ސިއްހީ ދާއިރާއަށް ބެލިޔަސް ހޮސްޕިޓް އަޅާއިރު ވައްކަން އެބަކުރޭ، މާލީ ދާއިރާއަށް ބަލާއިރު ފިނޭންސް މިނިސްޓްރީގެ އާއިމާރާތް އަޅާއިރު ވައްކަން އެބަކުރޭ، ހައުސިން މިނިސްޓްރީ ފްލެޓެއް އަޅާއިރު އެއިންވެސް ވައްކަން އެބަކުރޭ، ބްރިޖެއް އަޅާއިރު ވެސް ވައްކަން އެބަކުރޭ. މުޅި ދައުލަތް އެއްކޮށްހެން ވައްކަން ކުރުމުގައި،" ނިޒާރު ވިދާޅުވި އެވެ.

ނިޒާރު ވިދާޅުވީ ސަރުކާރުގެ ތެރޭގައި ހިންގާ ވައްކަންތަކުގެ ޒިންމާ ރައީސް އަބްދުﷲ ޔާމީން އަބްދުލްގައްޔޫމް ނަންގަވަންޖެހޭނެ ކަމަށާއި ރާއްޖޭގެ ތާރީހަށް ބަލާއިރުވެސް މިފަދަ ދަރަޖައެއްގައި މިފަދަ ވާހަކަތައް ނުދެކޭ ވަރަށް، އަދި އެއްވެސް ގޮތަކަށް ކޮންޓްރޯލެއް ނެތި ވައްކަން ކުރުން އިތުރުވެގެންދާތައް ފެންނަމުންދާ ކަމަށެވެ.

ނިޒާރު ވިދާޅުވީ ދައުލަތުގެ ފައިސާއިން ހިޔާނާތްތެރިވުމާއި ކޮރަޕްޝަންގެ މައްސަލަތައް ބަލަން އޮތީ އެންޓި- ކޮރަޕްޝަން ކޮމިޝަން (އޭސީސީ) ކަމަށެވެ. ނަމަވެސް އެކޮމިޝަންގެ މެމްބަރުންގެ މިއަދުގެ ހާލަތަކީ ކޮރަޕްޝަންގެ މިފަދަ މައްސަލަތައް ބެލުމުގެ ބަދަލުގައި ސިޔާސީ މަސައްކަތް ކުރުން ކަމަށެވެ.

"އެންޓި-ކޮރަޕްޝަން ކޮމިޝަން އޮތީ ސިޔާސީ މަސައްކަތުގައި. ރައީސް ޔާމީންގެ ޕާޓީއާއި ރައީސް ޔާމީން 2018 އަށް އިންތިހާބު ކުރުމަށްޓަކައި ކުރަންޖެހޭ މަސައްކަތް ކުރުމުގައި އެބޭފުޅުން އެއުޅުއްވަނީ،" ނިޒާރު ވިދާޅުވި އެވެ.

މީގެއިތުރުން ނިޒާރު ވިދާޅުވީ މިނިވަން މުއައްސަސާތަކުގެ ވެރިންނާއި މެމްބަރުން ތިއްބެވީ މިސަރުކާރުން ފިއްތާލާފައި ކަމަށާއި މިސަރުކާރުން ހިންގާ އެއްވެސް ކަމެއް ދެފުށް ފެންނަގޮތަށް ސާފުކޮށް ފެންނަމުން ނުދާ ކަމަށެވެ.

"މީގައި އެންމެ ދެރަކަމަކީ ރައީސް ޔާމީން މިކަމަކީ ވާންޖެހޭ ކަމެއްގެ ގޮތުގައި ގަބޫލުކުރުން. ހުދު ރައީސް ޔާމީން އެބަ ގަބޫލް ކުރައްވާ ވައްކަން ހިނގާނެކަން. އަދި ސަރުކާރަށް ނިސްބަތްވާ މަޖިލިސް މެމްބަރުން ވެސް އެބަވިދާޅުވޭ ކޮރަޕްޝަނުގައި ޝާމިލުވާ ކަމަށް. ކޮރަޕްޝަންގެ ކަންކަން ހިނގާނެ ކަމަށްވެސް އެބޭފުޅުން އަމިއްލަފުޅަށް ވިދާޅުވޭ،" ނިޒާރު ވިދާޅުވިއެވެ.

ނިޒާރު ވިދާޅުވީ ރައީސަކު ވެރިކަމުގައި ހުރެ މާލެއިން ބިންގަނެ، އެބިމުގައި ބޮޑު އުސް އިމާރާތެއް އިމާރާތް ކުރުމުގެ މަސައްކަތް ކުރަމުންދާ ދިވެހި ފުރަތަމަ ރައީސަކީ ރައީސް ޔާމީން ކަމަށްވުމަކީ އެއީ އާދައިގެ ކަމެއް ނޫން ކަމަށެވެ.

"އަޅުގަނޑުމެންނަށް ފެނިގެންދަނީ ވެރިކަމުގައި ހުންނަވައި މާލެއިން ބިންގަނެ، ގެ އަޅުއްވާ ރައީސެއްގެ ގޮތުގައި ރައީސް ޔާމީން. މިއީ އާދައިގެ ވާހަކަތަކެއް ނޫން،" ނިޒާރު ވިދާޅުވި އެވެ.