އޭޝިއާ ކަޕްގެ ފައިނަލް މެޗުގައި ސްރީލަންކާ ބަލިކުރުމަށްފަހު، އޭޝިއަން ކްރިކެޓް ކައުންސިލްގެ ރައީސް ޕާކިސްތާނުގެ މުހުސިން ނަގްވީގެ އަތުން މުބާރާތުގެ ތަށި ހަވާލުވުމަށް އިންޑިއާ ޓީމުން އިންކާރުކޮށްފި

އާދީއްތަ ދުވަހު ދުބާއީގައި ކުޅުނު އަންހެނުންގެ އޭޝިއާ ކަޕްގެ ފައިނަލް މެޗުގައި ސްރީލަންކާ ބަލިކުރުމަށްފަހު، އޭޝިއަން ކްރިކެޓް ކައުންސިލް (އޭސީސީ) ގެ ރައީސް ޕާކިސްތާނުގެ މުހުސިން ނަގްވީގެ އަތުން މުބާރާތުގެ ތަށި ހަވާލުވުމަށް އިންޑިއާގެ އަންހެން ޓީމުން އިންކާރުކޮށްފި އެވެ. މިއީ މިދިޔަ އަހަރު ބޭއްވި ފިރިހެނުންގެ މުބާރާތުގައި ވެސް އިންޑިއާގެ ޓީމުން އަމަލުކުރި ގޮތެވެ.

ޕާކިސްތާން ކްރިކެޓް ބޯޑު (ޕީސީބީ) ގެ ޗެއާމަންގެ މަގާމުވެސް ފުރުއްވާ ނަގްވީ އަކީ އެ ގައުމުގެ ދާޚިލީ ވަޒީރުވެސް މެއެވެ. ތަށި ހަވާލުކުރުމުގެ ރަސްމިއްޔާތުގައި އޭނާއާ ކުރިމަތިލާން އިންޑިއާ ޓީމުން ދެކޮޅު ހެދި ހެދުމަކީ، އަވަށްޓެރި ދެ ގައުމުގެ މެދުގައި އޮތް ސިޔާސީ ނުތަނަވަސްކަން ހާމަވެގެންދިޔަ ކަމެކެވެ.

އިންޑިއާ އާއި ޕާކިސްތާނާ ދެމެދު މިދިޔަ އަހަރު ހިނގި އަސްކަރީ ކުރިމަތިލުންތައް ބޮޑު ހަނގުރާމައަކަށް ބަދަލުވުމާ ގާތަށް ދިޔަ އެވެ. މި ސަބަބާހުރެ، ދެ ގައުމުގެ މެދުގައި ވަކިން ކްރިކެޓް ސީރީޒްތައް ނުކުޅޭއިރު، ދެ ގައުމު ބައްދަލުކުރަނީ ހަމައެކަނި އައިސީސީ އާއި އޭސީސީގެ މުބާރާތްތަކުގައި، ވަކި ފަރާތަކަށް ނުޖެހޭ ގައުމުތަކުގަ އެވެ.

އިންޑިއާގެ ކޯޗު އަމޯލް މުޒުމްދާރު ނޫސްވެރިންނަށް މައުލޫމާތު ދެމުން ބުނީ، ނަގްވީގެ އަތުން ތަށި ގަބޫލުނުކުރުމަށް ނިންމީ އިންޑިއާގެ ކްރިކެޓް ބޯޑުން ކަމަށެވެ.

"އަހަރެމެން މިތިބީ އެ ނިންމުމާއެކު. އަހަރެމެންނަށް މި މުބާރާތް މިހާރު ނިމިއްޖެ. އަހަރެމެންނަކީ ޗެމްޕިއަނުން. އެވަރުން ފުދޭ،" އޭނާ ނޫސްވެރިންނަށް ބުންޏެވެ.

"އަހަރެމެން މިތިބީ އެކަތިގަނޑެއްގެ ގޮތުގައި. މި ޓީމުގެ ކޮންމެ މެންބަރަކާ މެދުވެސް، ކުޅުންތެރިންނާއި ސަޕޯޓް ސްޓާފުން ހިމެނޭހެން، އަހަރެން ފަޚުރުވެރިވަން."

މިކަމާ ގުޅޭގޮތުން ރޮއިޓާސްއިން ސުވާލުކުރުމުން އޭސީސީން އަދި ވަކި އެއްޗެއް ބުނެފައެއް ނުވެ އެވެ.

މިދިޔަ އަހަރުގެ ސެޕްޓެމްބަރު މަހު ދުބާއީގައި ބޭއްވި ފިރިހެނުންގެ ފައިނަލްގައި ޕާކިސްތާން ބަލިކުރުމަށްފަހު ވެސް، ނަގްވީގެ އަތުން ތަށި ގަބޫލުކުރަން އިންޑިއާގެ ޓީމުން ވަނީ ދެކޮޅު ހަދާފަ އެވެ.

އެ ފަހަރު ތަށި ހަވާލުކުރުމުގެ ރަސްމިއްޔާތު ގަޑިއިރަކަށްވުރެ ގިނަ އިރަށް ލަސްވުމަށްފަހު، ތަށި ހަވާލުކުރަން އޮތް ވަގުތު ވަނީ ރަސްމިއްޔާތު ކުރުކޮށްލާފަ އެވެ.

ދުބާއީ އިންޓަނޭޝަނަލް ކްރިކެޓް ސްޓޭޑިއަމްގައި އާދީއްތަ ދުވަހު ކުޅުނު ފައިނަލް މެޗުގައި، 2024 ވަނަ އަހަރުގެ ޗެމްޕިއަން ސްރީލަންކާގެ މައްޗަށް އިންޑިއާގެ އަންހެން ޓީމުން ކުރިހޯދީ 72 ރަނުންނެވެ. މިއީ ކޮންމެ ދެ އަހަރަކުން އެއް އަހަރު ބާއްވާ މި މުބާރާތުގެ ފާއިތުވި 10 ފަހަރުގެ ތެރެއިން އިންޑިއާ ތަށި އުފުލާލި އަށްވަނަ ފަހަރެވެ.

އިންޑިއާގެ ކުޅުންތެރިން ގެންގުޅޭ ސިޔާސަތެއްގެ ދަށުން، މެޗުގެ ކުރިންނާއި ފަހުން ޕާކިސްތާނުގެ ކުޅުންތެރިންނާ ސަލާމްކުރުމަށްވެސް ވަނީ އިންކާރުކޮށްފަ އެވެ. މި މަހުގެ ކުރީކޮޅު އޭޝިއާ ކަޕްގެ ގްރޫޕް ސްޓޭޖުގައި ޕާކިސްތާން އަތުން ހަތް ވިކެޓުން އިންޑިއާ މޮޅުވި މެޗުގައިވެސް އަންހެން ޓީމުން ވަނީ މި އުސޫލަށް އަމަލުކޮށްފަ އެވެ.

މި މަހުގެ ފަހުކޮޅު ޖަޕާނުގައި ފަށާ އޭޝިއަން ގޭމްސްގެ ފިރިހެނުންނާއި އަންހެނުންގެ ކްރިކެޓް މުބާރާތުގެ ފަހު މަރުހަލާތަކުގައި މި ދެ ގައުމު އަލުން ބައްދަލުކުރުމުގެ ފުރުސަތު އެބައޮތެވެ.