މެލޭޝިއާގެ ބޮޑުވަޒީރު ރާއްޖެއަށް ކުރައްވާ ދަތުރުފުޅުގައި ދިފާޢީ ދާއިރާ އާއި އިސްލާމީ ކަންކަމާ ގުޅޭގޮތުން އެއްބާރުލުން ދިނުމަށް އެއްބަސްވުމުގައި ސޮއިކުރާނެ

މެލޭޝިއާގެ ބޮޑުވަޒީރު ދާތުކް ސެރީ އަންވަރު އިބްރާހީމް ދިވެހިރާއްޖެއަށް މިއަދު ފައްޓަވާ ދެ ދުވަހުގެ ދަތުރުފުޅުގައި ވިޔަފާރިއާއި އިންވެސްޓްމަންޓް، ތަޢުލީމީ ދާއިރާ، ފަތުރުވެރިކަން، ދިފާޢީ ދާއިރާ އަދި އިސްލާމީ ކަންކަމާ ގުޅޭ ދާއިރާތަކުން އެއްބާރުލުން އިތުރުކުރުމަށް ފުރުޞަތުތައް ފަހިވެގެންދާނެ ކަމަށް މެލޭޝިއާ އިން ރާއްޖެއަށް ކަނޑައަޅުއްވަފައި ހުންނަވާ ހައިކޮމިޝަނަރ ވިދާޅުވެއްޖެ އެވެ.

މެލޭޝިއާއިން ދިވެހިރާއްޖެއަށާއި ސްރީ ލަންކާއަށް ކަނޑައަޅުއްވާފައި ހުންނަވާ ހައިކޮމިޝަނަރު ބަދްލީ ހިޝާމް އާދަމް މެލޭޝިއާގެ މީޑިއާތަކަށް ވިދާޅުވީ، މިއަދު ފެއްޓެވުމަށް ހަމަޖެހިފައިވާ ބޮޑުވަޒީރު އަންވަރު އިބްރާހީމްގެ ދެ ދުވަހުގެ މި ދަތުރުފުޅަކީ އެމަނިކުފާނު ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅު ކަމަށެވެ. މި ދަތުރުފުޅުގައި މައިގަނޑު ގޮތެއްގައި އަލިއަޅުއްވާލައްވާނީ މިހާރު އޮތް ގުޅުންތައް ވަރުގަދަކުރުމަށާއި، ދެ ޤައުމަށް ފައިދާހުރި އާ ދާއިރާތަކުން ގުޅުން ބަދަހިކުރުމުގެ މައްޗަށެވެ.

Advertisement

ހައިކޮމިޝަނަރު އިތުރަށް ވިދާޅުވީ، ބޮޑުވަޒީރު އަންވަރު އިބްރާހީމާއި ރާއްޖޭގެ ރައީސް ޑރ. މުޙައްމަދު މުޢިއްޒު، ދެ ޤައުމުގެ ދެމެދުގައި އޮތް ގުޅުންތައް ކުރިއަށްދާ މިންވަރު މުރާޖަޢާކުރައްވައި، ސަރަޙައްދީ އަދި ބައިނަލްއަޤުވާމީ މުހިންމު މައްސަލަތަކާ ގުޅޭގޮތުން ޚިޔާލު ބަދަލުކުރައްވާނެ ކަމަށެވެ.

ބޮޑުވަޒީރުގެ ދަތުރުފުޅުގެ ކުރިން މެލޭޝިއާގެ މީޑިއާތަކަށް މަޢުލޫމާތު ދެއްވަމުން ބަދްލީ ހިޝާމް ވިދާޅުވީ، ދެ ޤައުމުގެ ލީޑަރުން ދެމެދުގައި އޮތް ޒަމާންވީ ގުޅުންތައް ވަޒަންކުރައްވައި، ޚާއްޞަކޮށް ވިޔަފާރިއާއި އިންވެސްޓްމަންޓް، ތަޢުލީމު، ފަތުރުވެރިކަން، ދިފާޢީ ދާއިރާ އަދި އިސްލާމީ ކަންކަމާ ގުޅޭ އެކި ދާއިރާތަކުން އާ ގުޅުންތައް އުފެއްދުމާ ބެހޭގޮތުން މަޝްވަރާކުރައްވާނެ ކަމަށެވެ.

މީގެއިތުރުން، ބޮޑުވަޒީރު އަންވަރު އިބްރާހީމާއި ރައީސް މުޢިއްޒު، ދިފާޢީ ދާއިރާއިން އެއްބާރުލުން ދިނުމަށާއި އިސްލާމީ ކަންކަމާ ގުޅޭގޮތުން ދެ ޤައުމުގެ ދެމެދުގައި ސޮއިކުރެވޭ ފަހުމުނާމާތައް ބަދަލުކުރުމުގެ ރަސްމިއްޔާތުގައި ބައިވެރިވެވަޑައިގަތުމަށް ވަނީ ހަމަޖެހިފަ އެވެ.

ބަދްލީ ހިޝާމް ވިދާޅުވި ގޮތުގައި، މި ދަތުރުފުޅަކީ 2025 ވަނަ އަހަރުގެ އޭޕްރީލް މަހު ރައީސް މުޢިއްޒު މެލޭޝިއާއަށް ކުރެއްވި ރަސްމީ ދަތުރުފުޅާ ގުޅިގެން ކުރައްވާ ދަތުރުފުޅެކެވެ. މި ދަތުރުފުޅުގެ ސަބަބުން ދެ ޤައުމުގެ ދެމެދުގައި އޮތް ގުޅުން އިތުރަށް ހަރުދަނާވެ، ކުރިމަގަށް އަމާޒުކުރެވިފައިވާ ބަދަހި ގުޅުމަކަށް ވަރުގަދަ ބިންގަލެއް އެޅިގެންދާނެ އެވެ.

މި ދަތުރުފުޅުގެ ތެރެއިން، ބޮޑުވަޒީރު އަންވަރު އިބްރާހީމަށް މަރުޙަބާ ދެންނެވުމުގެ ރަސްމީ ރަސްމިއްޔާތު ޖުމްހޫރީ މައިދާނުގައި ބޭއްވުމަށް ވަނީ ހަމަޖެހިފަ އެވެ. އޭގެ ފަހުން ރައީސް މުޢިއްޒުއާއެކު ބާއްވާ ވަކި ބައްދަލުވުމަކަށްފަހު، ދެ ޤައުމުގެ ވަފުދުތަކުގެ މެދުގައި ރަސްމީ މަޝްވަރާތައް ކުރިއަށްދާނެ އެވެ.

މި ބައްދަލުވުންތަކަށްފަހު ދެ ޤައުމުގެ ލީޑަރުން ގުޅިފައިވާ ނޫސްވެރިންގެ ބައްދަލުވުމެއް ބޭއްވުމަށް ހަމަޖެހިފައިވާއިރު، މި ދަތުރުފުޅުގެ އެންމެ މުހިންމު އެއް ހަރަކާތަކީ ބޮޑުވަޒީރުގެ ޝަރަފުގައި ރައީސް މުޢިއްޒު ދެއްވާ ރަސްމީ މެންދުރުގެ ފަރިއްކޮޅެވެ.

މެލޭޝިއާއާއި ދިވެހިރާއްޖެއާ ދެމެދު ސިޔާސީ ގުޅުން ޤާއިމުކޮށްފައިވަނީ 1968 ވަނަ އަހަރުގަ އެވެ. އެ ދުވަހުން ފެށިގެން ދެ ޤައުމުން ވެސް ދަނީ ދޭދޭ ގުޅުންތައް ބަދަހިކުރުމަށާއި، އިޤްތިޞާދީ އެއްބާރުލުން ވަރުގަދަކުރުމުގެ އިތުރުން ދެ ޤައުމުގެ ރައްޔިތުންގެ މެދުގައި އޮންނަ ގުޅުން ގާތްކުރުމަށް މަސައްކަތް ކުރަމުންނެވެ.

ދެކުނު އޭޝިޔާ ސަރަޙައްދުގައި 2025 ވަނަ އަހަރު މެލޭޝިއާގެ ހަވަނައަށް އެންމެ ބޮޑު ވިޔަފާރި ބައިވެރިޔަކީ ދިވެހިރާއްޖެ އެވެ. އަދި މެލޭޝިއާގެ މުދާ އެންމެ ގިނައިން ބޭރުކުރާ ޤައުމުތަކުގެ ލިސްޓުގެ ހަވަނައިގައި ރާއްޖެ ހިމެނޭއިރު، ދެ ޤައުމުގެ ދެމެދުގައި ކުރެވުނު ވިޔަފާރީގެ ޖުމްލަ އަގު 195 މިލިއަން އެމެރިކާ ޑޮލަރަށް އަރަ އެވެ.

މެލޭޝިއާއިން ރާއްޖެއަށް ބޭރުކުރި މުދަލުގެ އަގު 193 މިލިއަން އެމެރިކާ ޑޮލަރަށް އަރާއިރު، މީގެ ތެރެއިން 31.6 އިންސައްތައަކީ ޕެޓްރޯލިއަމްގެ އުފެއްދުންތަކެވެ.

މެލޭޝިއާގެ ބޮޑުވަޒީރަށް ރާއްޖެ ވަޑައިގަތުމުގެ ދަޢުވަތު އަރުވާފައިވަނީ، 2025 ވަނަ އަހަރުގެ އޭޕްރީލް މަހު ރައީސް ޑރ. މުޢިއްޒު މެލޭޝިއާއަށް ކުރެއްވި ރަސްމީ ދަތުރުފުޅުގެ ތެރެއިންނެވެ.