ޚަރަދު ކުޑަކުރަން ކަމަށް ބުނެ ކުންފުނިތަކެއް އުވާލުމަށްފަހު، އަނެއްކާ އެ އުފެއްދެވީ އައު ކުންފުންޏެއް!

ފެނަކަ ކޯޕަރޭޝަން އާއި ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އުވާލަން ސަރުކާރުން ނިންމީ ޚަރަދު ކުޑަކުރުމުގެ މަޤުސަދުގަ އެވެ. ފެނަކައިގެ މަސައްކަތްތައް ސްޓެލްކޯގެ ދަށަށް، އަދި އާރުޑީސީގެ މަސައްކަތްތައް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިކް ކޮމްޕެނީ (އެމްޓީސީސީ) ގެ ދަށަށް ބަދަލުކުރަން ނިންމީ، ވަރަށް ގިނަ މަޝްވަރާތައް ކުރުމަށް ފަހު އެވެ. ކުންފުނިތައް ހިންގުމަށް ކުރަމުން އަންނަ ޚަރަދުތައް މަދު ކުރުމާއި ކުންފުނިތަކުގައި ތިބޭ މުވައްޒަފުންގެ އަދަދު މަދުކުރުމަކީ ސަރުކާރުގެ މަގުސަދު ކަމަށް އިއުލާނުކުރެއްވީ، ރައީސް ޑރ. މުހައްމަދު މުއިއްޒު އެވެ.

ރަނގަޅެވެ. ކުންފުނިތައް އުވާލައިގެން ޚަރަދު ކުޑަކުރާ ނަމަ، އެކަން ކިތަންމެހާ ވެސް ރަނގަޅެވެ. ކުންފުނިތަކުގައި މުވައްޒަފުން ތިބޭ އަދަދު މަދުވެ، އެކަށީގެންވާ މިންވަރަކަށް މުވައްޒަފުން ލައިގެން ކުންފުނިތައް ހިންގަން އުޅޭ ނަމަ، އެކަން ވެސް ރަނގަޅެވެ. ކޮންމެ ކަމެއްގައި ވެސް ބޭނުންވަނީ އިޚުލާސްތެރި ހެޔޮ ނިޔަތާއި ރަނގަޅު ގޮތެވެ. ސުވާލަކީ، ސަރުކާރުގެ އަމަލުތައް ހުންނަ ގޮތުން އެކަން ހާސިލުވާނެ ހެއްޔެވެ؟ 

ޚަރަދު ކުޑަކުރުމުގެ ނަމުގައި ކުންފުނިތަކެއް އުވާލާ ވާހަކަ އިއުލާނުކުރުމަށް ފަހު، ޖެހިގެން އެ އިއުލާނުކުރެއްވީ އަނެއް ކުންފުނި އުފެއްދި ވާހަކަ އެވެ. މިސްކިތްތައް މަރާމާތު ކުރުމަށް ބޭނުންވާ ފައިސާ ހަމަޖައްސައި، މިސްކިތްތައް މަރާމާތު ކުރުމުގެ ކަންކަން ބަލަހައްޓަން ރައީސް މުއިއްޒު ކުންފުންޏެއް އުފެއްދެވީ އެވެ. މާލެ އާއި އަތޮޅުތެރޭގެ ރަށްތަކުގައި ހުރި މިސްކިތްތަކަކީ މިވީހާ ޒަމާނެއްގައި އެ ރަށެއްގެ ކައުންސިލުން ބަލަހައްޓަމުން އަންނަ މިސްކިތްތަކެކެވެ. 

ނަމަވެސް، މިސްކިތްތައް ބެލެހެއްޓުމަށް ބޭނުންވާ ބަޖެޓު ހޯދުމާއި މިސްކިތްތައް ބެލެހެއްޓުމަށް ސަރުކާރުން ކުންފުންޏެއް އުފެއްދުމާ އެކު، އަނެއްކާ ވެސް ބޮޑު ވާނީ ޚަރަދު ނޫން ހެއްޔެވެ؟ އެ ކުންފުންޏަށް ވެރިންތަކެއް ހަމަޖައްސައި، ވާޒިފާތަކަށް މުވައްޒަފުންތަކެއް ނެގުމަކީ، ދައުލަތުން އިތުރަށް ކުރަން ޖެހޭ ޚަރަދެއް ނޫން ހެއްޔެވެ؟ އަނެއްކާ ވެސް އިތުރު ބަޔަކަށް ވަޒީފާތައް ދިނުމާއި ސަރުކާރު ޕާޓީގެ މެންބަރުންނަށް ވަޒީފާ ދިނުމަށް ބޭނުން ކުރާނީ މި ކުންފުނި ނޫން ހެއްޔެވެ؟ 

އެއްކޮޅުން ޚަރަދު ކުޑަކުރާ ވާހަކަ ދައްކަމުން، ކުންފުނިތައް އުވާލަަމުން، އަނެއްކޮޅުން އައު ނަން ނަމުގައި އެކިއެކި ކުންފުނިތައް އުފެއްދުން އެއީ ޚަރަދު ކުޑަ ކުރުން ހެއްޔެވެ؟ ރައްޔިތުން ގާތު ބުނާ ވާާހަކަ އާއިި، ރައްޔިތުންނަށް ދައްކަމުން އަންނަ މަންޒަރާ އަމަލު ދިމަލެއް ނުވެ އެވެ. ޚަރަދު ކުޑަ ކުރުމުގެ އިޚުލްސްތެރި އެއްވެސް ނިޔަތެއް ނެތެއް ނޫން ހެއްޔެވެ؟ މިއަދު މިސްކިތްތައް ބަލަހައްޓަން ކުންފުންޏެކެވެ. މާދަމާ ކޮން ކަމަކަށް، ކޮން ކުންފުންޏެއް ހެއްޔެވެ؟

އަނެއްކޮޅުން ކައުންސިލްތަކުން ކުރަމުން އައި ކަމެއް ސަރުކާރުގެ ކުންފުންޏެއްގެ ދަށަށް ބަދަލު ކުރުމަކީ، ލާމަރުކަޒީ ނިޒާމު ޗެމްޕިއަންކަން ކުރުން ހެއްޔެވެ؟ މިވަރުން ދަންޏާ ވިހައި މަރުވާ ބަލަހައްޓަން ވެސް ކުންފުންޏެއް ހަދަންވީ ހެއްޔެވެ؟ ނަން ފާސް ކުރުމަށް ވެސް ކުންފުންޏެއް ހެއްޔެވެ؟ ނޫނީ ސިޓީ ކައުންސިލް އާއި ކައުންސިލްތަކުން ކުރަމުން އަންނަ އެހެން ކަމެއް ކުރުމަށް، ސަރުކާރުން ކުންފުންޏެއް ހަދަންވީ ހެއްޔެވެ؟