މިސްރުގެ ރާނީ ނާޒްލީ ތުރުކުރެއްވި އެތައް މިލިއަން ޑޮލަރުގެ އަގުބޮޑު ޖަވާހިރު ފަށެއް ވަގަށް ނަގައިފި

ވިއެންނާގެ މިއުޒިއަމް އޮފް އެޕްލައިޑް އާޓްސް (އެމް.އޭ.ކޭ) އަށް ވަނުމަށް ދެ މީހަކު ޓިކެޓް ގަތުމަށްފަހު، އެތަނުގެ ބިއްލޫރި އަލަމާރިއެއް ތަޅާލައި، 200 ކެރަޓުގެ ޕްލެޓިނަމް އަދި އަލިމަސް ހިމެނޭ ފަށެއް ވަގަށް ނަގައިގެން ފިލާފައިވާ ކަމަށް އޮސްޓްރިއާގެ ފުލުހުން ހުކުރު ދުވަހު ބުނެފި އެވެ.

އޮސްޓްރިއާގެ މީޑިއާތަކުން ރިޕޯޓްކޮށްފައިވާ ގޮތުގައި، 673 އަގުބޮޑު ޖަވާހިރު ހިމެނޭ "ވެން ކްލީފް އެންޑް އާޕެލްސް" ބްރޭންޑުގެ މި ފަށުގެ އަގު އެތައް މިލިއަން ޑޮލަރަކަށް އަރަ އެވެ. މިއީ ޔޫރަޕްގެ މިއުޒިއަމްތަކަށް އަމާޒުކޮށް ދެމުންދާ ބޮޑެތި ވައްކަންތަކުގެ ސިލްސިލާގެ ތެރެއިން ހިނގި އެންމެ ފަހުގެ ހާދިސާ އެވެ.

ފުލުހުން ބުނި ގޮތުގައި ބުރާސްފަތި ދުވަހު ހިނގި މި ވައްކަން ކުރި ދެ މީހުން ތިބީ މާސްކު އަޅައިގެންނެއް ނޫނެވެ. އަދި އެ މީހުން މިއުޒިއަމަށް ވަދެފައިވަނީ ޓިކެޓް ގަނެގެން ކަމަށާއި، އެ މީހުންގެ ހަރަކާތްތައް ސާފުކޮށް ސަރވެއިލަންސް ކެމެރާތަކަށް އަރާފައިވާ ކަމަށްވެސް ފުލުހުން ބުންޏެވެ.

ފުލުހުން ނެރުނު ބަޔާނެއްގައި ބުނެފައިވަނީ، އެ ދެ މީހުން މަރުތޭލަކުން ޖަހައި "ބިއްލޫރި އަލަމާރި ތަޅާލުމަށްފަހު"، ގަހަނާ ހިފައިގެން ފިލާފައިވާ ކަމަށެވެ.

އެމް.އޭ.ކޭ މިއުޒިއަމުން މި ވައްކަން ހިނގިކަން ކަށަވަރުކޮށްދީފައިވީ ނަމަވެސް، މައްސަލައިގެ ތަހުގީގު ކުރިއަށްދާތީ އެކަމާ ގުޅޭގޮތުން އިތުރު އެއްޗެއް ބުނަން ބޭނުންނުވާ ކަމަށް ވަނީ ބުނެފަ އެވެ.

ވަގަށް ނެގި ފަށަކީ ފަރަންސޭސި ޑިޒައިނަރުން ކަމަށްވާ ވެން ކްލީފް އެންޑް އާޕެލްސް އަށް ހާއްސަކޮށްގެން ބާއްވަމުންދިޔަ މައުރަޒެއްގެ ބައެކެވެ. މިދިޔަ ޖޫން މަހުން ފެށިގެން ކުރިއަށްދާ މި މައުރަޒުގައި ގާތްގަނޑަކަށް 500 އެއްޗެއް ދައްކާލުމަށް ބަހައްޓާފައިވެ އެވެ. މި މައުރަޒު ނިންމާލުމަށް ހަމަޖެހިފައިވަނީ ސެޕްޓެމްބަރު މަހުގެ 27 ވަނަ ދުވަހު އެވެ.

ވަގަށް ނެގި މި ފަށަކީ ކުރީގެ މިސްރުގެ ޝާހީ އާއިލާއަށް ހާއްސަކޮށްގެން ފަރުމާކޮށްފައިވާ ފަށެކެވެ. މި ފަށް 1939 ވަނަ އަހަރު ރާނީ ނާޒްލީ ތުރުކުރެއްވީ، އެކަމަނާގެ ދަރިކަނބަލުން ފާއިޒާ އާއި އީރާނުގެ ވަލީއަހުދު މުހައްމަދު ރިޒާ ޕަހްލަވީގެ ކައިވެނީގެ ހަފުލާގަ އެވެ.

މިދިޔަ އޮކްޓޯބަރު މަހު ޕެރިހުގެ ލޫވް މިއުޒިއަމަށް ދުވާލު ވަގުތު ބަޔަކު ވަދެ، އަށް މިނެޓަށް ވުރެ ކުޑަ ވަގުތުކޮޅެއްގެ ތެރޭގައި 102 މިލިއަން ޑޮލަރުގެ ގަހަނާ ހިފައިގެން ފިލި ހާދިސާއަށްފަހު، ޔޫރަޕްގެ މިއުޒިއަމްތަކުން މިފަދަ ބޮޑެތި ވައްކަންތައް ދަނީ ފެންނަމުންނެވެ.

މީގެ އިތުރުން، ބުރާސްފަތި ދުވަހު ސްޕެއިންގެ ވިލޭނާ ސިޓީގެ މިއުޒިއަމެއްގައި ހުރި "ޓްރެޜަރ އޮފް ވިލޭނާ" ނަމަކަށް ކިޔާ ބްރޮންޒް އޭޖްގެ ރަނުގެ ބޮޑު ކަލެކްޝަނަކުންވެސް ވަނީ ވައްކަން ކޮށްފަ އެވެ. އެތަނުން 50 އަށްވުރެ ގިނަ ރަނުގެ ތަށިތަކާއި، ފުޅިތަކުގެ އިތުރުން އެހެނިހެން ތަކެތި ވަނީ ވަގަށް ނަގާފަ އެވެ.

އިޓަލީގެ ކަލްޗަރ މިނިސްޓްރީން އާދީއްތަ ދުވަހު ބުނި ގޮތުގައި، ސިސިލީގެ މިއުޒިއަމަކުން ރެނެސަންސް ދައުރުގެ ކުރެހުންތެރިޔާ އެންޓޮނެލޯ ޑާ މެސީނާގެ "އާދަޔާ ހިލާފު އަގުބޮޑު" ހަތަރު ކުރެހުމެއް ވަނީ ވަގަށް ނަގާފަ އެވެ.

އޭގެ ދެ ދުވަސް ކުރިން އިޓަލީގެ ފުލުހުން ބުނެފައިވަނީ، ޕާމާ ކައިރީގައި ހުންނަ މެގްނާނީ-ރޮކާ ފައުންޑޭޝަން މިއުޒިއަމުން ވަގަށް ނަގާފައިވާ ރެނުއާ، ސެޒާން އަދި މެޓިސް ފަދަ މަޝްހޫރު ކުރެހުންތެރިންގެ 10.4 މިލިއަން ޑޮލަރަށް ވުރެ އަގުބޮޑު ކުރެހުންތަކެއް އަލުން ހޯދާފައިވާ ކަމަށެވެ.