އޮގަސްޓު 19 ގެ ނިޔަލަަށް ރާއްޖެއަށް 1.3 މިލިއަން ފަތުރުވެރިން، މިއީ މިދިޔަ އަހަރާ އަޅާބަލާއިރު 3.9 އިންސައްތައިގެ ދަށްވުމެއް!
22 އޯގަސްޓު 2026 | ހޮނިހިރު 17:54ރާއްޖޭގެ ފަތުރުވެރިކަމުގެ މާކެޓުގެ އެއްވަނައިގައި ޗައިނާ އޮތްއިރު، ފަތުރުވެރިން އަންނަ މިންވަރު ދަށްވަމުންދާތީ ސިނާއަތުގެ ޖަމިއްޔާތަކުން ވަނީ ކަންބޮޑުވުން ފާޅުކޮށްފައި. މި ދާއިރާ ކުރިއެރުވުމަށް ބައިނަލްއަގުވާމީ ސަމިޓްތަކެއް ބޭއްވުމަށް ތައްޔާރުވަމުންދާއިރު، އިގްތިސާދީ ގެއްލުންތަކުން ސަލާމަތްވުމަށް ސަރުކާރުގެ އެހީތެރިކަމަށް މަޓާޓޯ އާއި ގެސްޓްހައުސް އެސޯސިއޭޝަނުން ވަނީ އެދިފައި
ރާއްޖެއަށް އަންނަ ފަތުރުވެރިން: މިއަހަރުގެ އޮގަސްޓް މަހުގެ 19 ވަނަ ދުވަހުގެ ނިޔަލަށް ރާއްޖެއަށް 1.3 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވޭ | ގޫގުލް
މިއަހަރުގެ އޮގަސްޓު މަހުގެ 19 ވަނަ ދުވަހުގެ ނިޔަލަށް ރާއްޖެއަށް 1.3 މިލިއަނަށްވުރެ ގިނަ ފަތުރުވެރިން ޒިޔާރަތްކޮށްފައިވާއިރު، މިއީ މިދިޔަ އަހަރުގެ މި މުއްދަތާ އަޅާބަލާއިރު 3.9 އިންސައްތައިގެ ދަށްވުމެއްކަން ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައިފި އެވެ.
މިނިސްޓްރީ އޮފް ޓޫރިޒަމް އިން ހާމަކޮށްފައިވާ ތަފާސްހިސާބުތައް ދައްކާގޮތުން މި މުއްދަތުގައި ޖުމްލަ 1،385،676 (އެއް މިލިއަން ތިން ލައްކަ އަށްޑިހަ ފަސް ހާސް، ހަ ސަތޭކަ ހަތްދިހަ ހަ) ފަތުރުވެރިން ރާއްޖެއަށް އައިސްފައިވާއިރު، ފަތުރުވެރިން އުފުލާ ބޯޓުފަހަރުގެ ބޯޓު ފުރޭ މިންވަރު ވަނީ 7.4 އިންސައްތަ އިތުރުވެ، 74.70 އިންސައްތައަށް އަރާފަ އެވެ.
ރާއްޖެއަށް އެންމެ ގިނައިން ފަތުރުވެރިން އަންނަ މާކެޓުތަކަށް ބަލާއިރު، ލިސްޓުގެ އެއްވަނައިގައި އޮތީ ޗައިނާ އެވެ. ޗައިނާއިން 252،072 ފަތުރުވެރިން ޒިޔާރަތްކޮށްފައިވާއިރު، މިއީ ޖުމްލަ ފަތުރުވެރިންގެ 18.6 އިންސައްތަ އެވެ. ދެވަނައިގައި 14.7 އިންސައްތަ އާއެކު ރަޝިއާ އޮތްއިރު، ތިންވަނައިގައި އޮތީ 7.8 އިންސައްތަ އާއެކު އިނގިރޭސިވިލާތެވެ.
މީގެ އިތުރުން އިޓަލީ، ޖަރުމަނުވިލާތް، އިންޑިއާ، ފްރާންސް، އެމެރިކާ، އޮސްޓްރޭލިއާ އަދި ސްޕެއިން ހިމެނެނީ ރާއްޖެއަށް އެންމެ ގިނައިން ފަތުރުވެރިން އަންނަ 10 ގައުމުގެ ތެރޭގަ އެވެ. މީގެ ތެރެއިން ގިނަ ގައުމުތަކުގެ ފަތުރުވެރިން އެންމެ ބޮޑަށް އިސްކަންދެނީ ރިސޯޓުތަކުގައި މަޑުކުރުމަށެވެ.
މިހާރު ރާއްޖެއަށް 30 އަށްވުރެ ގިނަ އެއާލައިނުން ދަތުރުތައް ބާއްވަމުންދާއިރު، މީގެ ތެރޭގައި އެމިރޭޓްސް، ގަތަރު އެއާވޭސް، އިންޑިގޯ އަދި މޯލްޑިވިއަން ފަދަ އެއާލައިންތައް ހިމެނެ އެވެ. ފަތުރުވެރިންގެ އުމުރުފުރާއަށް ބަލާއިރު، އެންމެ ގިނައިން ރާއްޖެއަށް ޒިޔާރަތްކުރަނީ 25 އަހަރާއި 34 އަހަރާ ދެމެދުގެ އުމުރުފުރާގެ މީހުންނެވެ.
ރާއްޖޭގެ ފަތުރުވެރިކަން ޑިޖިޓަލްކޮށް ކުރިއެރުވުމަށްޓަކައި "ޑިޖިޓަލް އޯނަޝިޕް ސަމިޓް 2026" ބޭއްވުމަށް ސްވިޒަލޭންޑްގެ ސީއީޖީ ސްޓޭކް އޭޖީއާއެކު ވިޒިޓް މޯލްޑިވްސްއިން ވަނީ ޕާޓްނަޝިޕެއް ގާއިމުކޮށްފަ އެވެ. މި ސަމިޓް ބޭއްވުމަށް ހަމަޖެހިފައިވަނީ މިއަހަރުގެ ޑިސެމްބަރު މަހުގެ 12 ވަނަ ދުވަހު ކްރޮސްރޯޑްސް މޯލްޑިވްސްގަ އެވެ. އަދި ވޯލްޑް ޓްރެވަލް އެވޯޑްސް 2026 ރާއްޖޭގައި ބޭއްވުމަށްޓަކައި ޖަލްބޫތު މޯލްޑިވްސް އަދި އެސްޓީއޯ އެނާޖީއާއެކު ވިޒިޓް މޯލްޑިވްސްއިން ވަނީ އެއްބަސްވުންތަކެއްގައި ސޮއިކޮށްފަ އެވެ.
މި މަސައްކަތްތަކާ އެކު ވެސް ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދަށްވަމުން ދިއުމުގެ ސަބަބުން ރާއްޖޭގެ އިގްތިސާދަށާއި ފަތުރުވެރިކަމުގެ ސިނާއަތަށް ބޮޑެތި ގެއްލުންތަކެއް ވަމުންދާތީ، އެކަމުގެ ކަންބޮޑުވުން ފާޅުކޮށް ސަރުކާރުގެ ކުއްލި އެހީތެރިކަމަށް މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އާއި ނޭޝަނަލް ހޮޓެލްސް އެންޑް ގެސްޓްހައުސް އެސޯސިއޭޝަން އޮފް މޯލްޑިވްސް (އެންއެޗްޖީއޭއެމް) އިން ވަނީ އެދިފަ އެވެ.
