ކޮލަމްބިއާއަށް އައި 7.4 ގެ ބާރުގަދަ ބިންހެލުމާއެކު ގިނަ އިމާރާތްތައް ވެއްޓި، ކުއްލި ނުރައްކަލުގެ ހާލަތު އިއުލާނުކޮށްފި

ކޮލަމްބިއާގެ ހުޅަނގު ސަރަހައްދަށް ރިކްޓަރ މިންގަނޑުން 7.4 ގެ ބާރުގަދަ ބިންހެލުމެއް އައިސް، ގިނަ އަދަދެއްގެ އިމާރާތްތައް ބިމާހަމަވެއްޖެ އެވެ. އެމެރިކާގެ ޖިއޮލޮޖިކަލް ސާވޭއިން ބުނާ ގޮތުގައި މި ބިންހެލުން ރެކޯޑު ކުރެވިފައިވަނީ 7.4 ގެ މެގްނިޓިއުޑްގަ އެވެ.

ރޮއިޓާސް ނިއުސް އެޖެންސީން ރިޕޯޓްކޮށްފައިވާ ގޮތުގައި، ކާލީ ސިޓީގެ މޭޔަރު އަލެހަންދްރޯ އެޑާ ވިދާޅުވީ އެ ސިޓީން މަދުވެގެން 20 އިމާރާތް ވެއްޓިފައިވާ ކަމަށާއި، ބައެއް އިމާރާތްތަކުގެ ތެރޭގައި މީހުން ތާށިވެފައިވާ ކަމަށެވެ.

މި ބިންހެލުން އުފެދުނު މަރުކަޒު ނުވަތަ އެޕިސެންޓަރަކީ ޗޮކޯ ރީޖަންގެ ސަން ހޯސޭ ޑެލް ޕަލްމާ ކަމަށްވާއިރު، މިއީ ކާލީ އާއި މެޑެލިން ސިޓީއާ ދެމެދުގައި އޮންނަ ސަރަހައްދެކެވެ. މި ބިންހެލުން އައިސްފައިވަނީ ބިމުގެ 82 ކިލޯމީޓަރު އަޑިންނެވެ.

ކުއިބްޑޯ އަދި ޕެރެއިރާ ސިޓީގެ އިމާރާތްތަކަށް ބޮޑެތި ގެއްލުންތަކެއް ލިބި، ގިނަ ބަޔަކަށް އަނިޔާވެފައިވާ ކަމަށް އޮފިޝަލުން ވަނީ ރިޕޯޓްކޮށްފަ އެވެ. މީގެ ދުވަސްކޮޅެއް ކުރިން މަގާމުގެ ހުވާކުރެއްވި ކޮލަމްބިއާގެ ރައީސް އަބެލާޑޯ ޑި ލާ އެސްޕްރިއޭލާ ވިދާޅުވީ، 7.4 ގެ ބާރުގަދަ ބިންހެލުމާ ގުޅިގެން ކުއްލި ހާލަތުގައި ދޭންޖެހޭ އިޖާބައާއި އެހީތެރިކަމުގެ މަސައްކަތްތައް އޭނާގެ ސީދާ ބެއްލެވުމުގެ ދަށުން ކުރިއަށްގެންދަވާ ކަމަށެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ، ލިބުނު ގެއްލުންތަކަށް އިޖާބަދިނުމަށާއި އަސަރުކުރި ފަރާތްތަކަށް އެހީތެރިކަން ފޯރުކޮށްދިނުމަށްޓަކައި "ޔުނިފައިޑް ކޮމާންޑް ޕޯސްޓެއް" ގާއިމުކުރުމަށް އަމުރުކުރައްވާފައިވާ ކަމަށެވެ.

"އަޅުގަނޑު އަމިއްލައަށް ޕެރެއިރާ ސިޓީއަށް ގޮސް، ހާލުގައި ޖެހުނު މީހުންނާ ބައްދަލުކޮށް، ސަރުކާރުގެ އެހީތެރިކަން ފޯރުކޮށްދޭ ގޮތް ބަލާނަން. ތިޔަބޭފުޅުން އެކަންޏެއް ނުވާނެ. ސަރުކާރު މިއޮތީ ތިޔަބޭފުޅުންނާއެކު އަމަލީ ގޮތުން މަސައްކަތް ކުރަން،" ރައީސް އިތުރަށް ވިދާޅުވި އެވެ.

ކޮލަމްބިއާގެ އެކި ސަރަހައްދުތަކަށް އައި 7.4 ގެ ބާރުގަދަ ބިންހެލުމާ ގުޅިގެން، ކުއިބްޑޯގައި ވެއްޓުނު ހަތަރު ބުރީގެ އިމާރާތެއްގެ ތެރޭގައި ހަތަރު މީހަކު ތާށިވެފައިވާ ކަމަށް ރިޕޯޓްތައް ބުނެ އެވެ.

މި ބިންހެލުމުގެ ލޮޅުން މުޅި ގައުމުގެ ސިޓީތަކުގެ އިތުރުން އަވަށްޓެރި ވެނެޒުއޭލާއަށް ވެސް ވަނީ އިހުސާސް ކުރެވިފަ އެވެ.

ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި ގިނަ އިމާރާތްތަކަކަށް ވަނީ ބޮޑެތި ގެއްލުންތަކެއް ލިބި ބައެއް ތަންތަން ބިމާހަމަވެފަ އެވެ. އޭގެ ތެރޭގައި މެނިޒަލޭސް ސިޓީގައި ހުރި ކެތީޑްރަލްއަކަށް ލިބުނު ބޮޑެތި ގެއްލުންތައް ފާހަގަކޮށްލެވެ އެވެ.

ލިބިފައިވާ ގެއްލުންތައް ވަޒަންކުރުމަށާއި ބިންހެލުމަށްފަހު އަތުވެދާނެ ލޮޅުންތަކަކުން ރައްކާތެރިވުމަށްޓަކައި، ގިނަ ސިޓީތަކެއްގެ އިމާރާތްތަކުން މީހުން ވަނީ ހުސްކޮށްފަ އެވެ. މީގެ އިތުރުން، މުޅި ގައުމުގެ ހަ އެއާޕޯޓެއްގެ އޮޕަރޭޝަންތައް މިހާރު ވަނީ މެދުކަނޑާލާފަ އެވެ.

ކޮލަމްބިއާގެ ހުޅަނގު ސަރަހައްދެއް ކަމަށްވާ ޗޮކޯގެ ގަވަރުނަރު ވިދާޅުވީ، އެ ސަރަހައްދުގެ ވެރިރަށް ކުއިބްޑޯގެ އިމާރާތްތަކަށް ބޮޑެތި ގެއްލުންތަކެއް ލިބި، ގިނަ ބަޔަކަށް އަނިޔާވެފައިވާ ކަމަށެވެ.

ގަވަރުނަރު ނޫބިއާ ކެރޮލީނާ ކޯޑޯބާ-ކޫރީ އެކްސްގައި ލިޔުއްވާފައިވާ ގޮތުގައި، އެ ސަރަހައްދަށް ވަނީ "ވަރަށް ބާރުގަދަ ބިންހެލުމެއް" އައިސްފަ އެވެ. އަދި ބިންހެލުމަށްފަހު އަތުވެދާނެ ލޮޅުންތަކާ މެދު ކަންބޮޑުވާ ކަމަށްވެސް އޭނާ ވިދާޅުވި އެވެ.

އޭނާ ވިދާޅުވި ގޮތުގައި، ބިންހެލުން އުފެދުނު މަރުކަޒު ކައިރީގައި އޮތް ސަން ހޯސޭ ޑެލް ޕަލްމާގައި ހުރި ނަމަވެސް، ކުއިބްޑޯގެ އިމާރާތްތަކަށް ވަނީ ބޮޑެތި ގެއްލުންތަކެއް ލިބިފަ އެވެ.

"އަޅުގަނޑުމެން މިހާރު ދަނީ ލިބުނު ގެއްލުންތައް ވަޒަންކުރަމުން. ފުރަތަމަ ރަސްމީ ރިޕޯޓް ވަރަށް އަވަހަށް ނެރޭނަން،" ކޯޑޯބާ-ކޫރީ އިތުރަށް ވިދާޅުވި އެވެ.