ލަސް ވެގަސްގައި ހަމަލާދިނީ 65 އަހަރުގެ މީހެއް

އެމެރިކާގެ ނެވާޑާ ސްޓޭޓްގެ ލަސްވެގަސް ކޮންސެޓް ހޯލަކަށް ބަޑިން ހަމަލާދީ 50 މީހުން މަރާލައި 400 އަށްވުރެ ގިނަ މީހުން ޒަޚަމް ކޮށްލައިފިއެވެ.

އާދީއްތަ ދުވަހުގެ ރޭގެ ވަގުތެއްގައި މި ހަމަލާދީފައިވަނީ މެންޑަލޭ ބޭ ރިޒޯޓް އެންޑް ކެސިނޯގެ ބޭރުގައި ހުރި އިމާރާތެއްގެ ބޭރުގައި ރޫޓް 91 ކޮންސެޓް ކުރިޔަށް ދަނިކޮށެވެ.

ކޮންސެޓް ބެލުމަށް އެވަގުތު 22،000 މީހުން ވަދެ ތިއްބެއެވެ.

ފުލުހުންވަނީ ހަމަލާދިން މީހާއަކީ އުމުރުން 64 އަހަރުގެ ސްޓެފަން ޕެޑޮކް ނަމަކަށް ކިޔާ މީހެއްކަމަށް ބުނެފައެވެ.

އޭނާ ހަމަލާ ދީފައިވަނީ މެންޑަލޭ ބޭ ހޮޓަލުގެ 32 ވަނަ ބުރީގައި ހުރެގެންނެވެ.

ފުލުހުންގެ ބަޔާނެއްގައި ބުނެފައިވަނީ ހަމަލާ ދިންކަމަށް ބެލެވޭ މީހާ ހޮޓަލުގައި އޭނާ ހުންނަ ކޮޓަރީގައި މަރުވެފައި އޮއްވައި ފެނިފައިވާ ކަމަށެވެ.

ސޯޝަލް މީޑިއާގައި ޕޯސްޓްކޮށްފައިވާ ވީޑިއޯތަކުން ފެންނަ ގޮތުގައި ބަޑީގެ ވަޒަންތަކުގެ އަޑު އިވޭއިރު އެއްވެފައިވާ މީހުން އަސްދޫނި ބައެއްހެން ހަމަލާއިން ދިފާއުވާން ދުވެއެވެ.

ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ކްލާކް ކައުންޓީގެ ޝެރިފް ޖޯސެފް ލޮމްބާޑޯ ވިދާޅުވީ މަދުވެގެން 50 މީހުން މަރުވެ 400އަށްވުރެ ގިނަ މީހުން ޒަޚަމްވި ކަމަށެވެ. ނަމަވެސް އޭނާ ވިދާޅުވީ ސީދާއަދަދު އަދި މިވަގުތު ހާމަކުރަން ދަތި ކަމަށެވެ.

ލޮމްބާޑޯ ވިދާޅުވީ ޑިއުޓީގައި ހުރި ދެ ފުލުހެއްގެ ގަޔަށް ބަޑިޖަހާފައިވާއިރު އޭގެ ތެރެއިން އެކެއްގެ ހާލު ސީރިއަސްކަމަށެވެ.

މީގެ އިތުރުން އޭނާވަނީ ހަމަލާދިންކަމަށް ތުހުމަތުކުރެވޭ މީހާ މަރާލީ ހޮޓަލުގައި އޭނާ ހުރި ކޮޓަރީގައި ފުލުހުންނާ އޭނާއާދެމެދު ބަދަލުކުރެވުނު ހަމަލާތަކެއްގައި ފުލުހުން ކަމަށް ބުނެފައެވެ.

ލޮމްބާޑޯ އިތުރަށް ވިދާޅުވީ މިކަމުގައި ސުވާލު ކުރަންޖެހޭ އިތުރު މީހަކު ހުރިތޯ ފުލުހުން ބަލަމުން ދާކަމަށެވެ.

އެމެރިކާގެ ރައީސް ޑޮނަލްޑް ޓްރަމްޕްވަނީ މި ހަމަލާގައި މަރުވި ފަރާތްތަކަށް ތައުޒިޔާ ވިދާޅުވެ ޓްވީޓް ކުރައްވާފައެވެ.

އާދީއްތަ ދުވަހުދިން ބަޑީގެ ހަމަލާއަކީ 1949 ވަނަ އަހަރަށްފަހު އެމެރިކާގައި މިފަދައިން ދެވުނު އެންމެ ނުރައްކާތެރި ބަޑީގެ ހަމަލާއެވެ.

ގަން ވައޮލެންސް އާކައިވް ނަމަކަށް ކިޔާ ގްރޫޕަކުން ބުނެފައިވާގޮތުގައި 2017 ވަނަ އަހަރުގެ މިހާތަނަށް އެމެރިކާގައި ބަޑީގެ 273 ހަމަލާ ދީފައިވެއެވެ.