އެމްވީ ކޯލް ގާލްސްގެ ނަމުގައި ހިންގަމުންދިޔަ ޓެލެގްރާމް ޗެނަލެއް އަތުލައިގެންފި

"އެމްވީ ކޯލް ގާލްސް" ގެ ނަމުގައި ހިންގަމުން ދިޔަ ޓެލެގްރާމް ޗެނަލެއް ފުލުހުން އަތުލައިގެންފިއެވެ.

ފުލުހުން ބުނީ ބޮޑެތި ކުށްތަކަށް އަރައިގަތުމަށް ހިތްވަރު ލިބޭގޮތަށް "އެމްވީ ކޯލް ގާލް" ގެ ނަމުގައި ހިންގަމުން ގެންދިޔަ ޓެލެގްރާމް ޗެނަލްއެއް އަތުލައިގެންފައިވާ ކަމަށެވެ. އަދި މި މައްސަލަ ފުލުހުން ގެންދަނީ ތަހުގީގުކުރަމުން ކަމަށް ބުނެފައިވެއެވެ.

ބޮޑެތި ކުށްތަކަށް އަރައިގަތުމަށް ހިންގާ މިފަދަ އިތުރު ޗެނަލްތަކެއް ވެސް މީގެ ކުރިން ފުލުހުން ވަނީ ބަންދުކޮށްފައެވެ.

އެގޮތުން ތަފާތު ބޮޑެތި ކުށްތަކަށް އަރައިގަތުމަށް ޖަޒީރާ އެޑްމިން، ޖަޒީރާ ގާރލްސް އަދި ޖަޒީރާ އެސްކޯޓު ގެލެރީ، ޖަޒީރާ ސްކޭމް އެލާޓް އަދި ޖަޒީރާ ލިންކް ޚަބަރުގެ ނަމުގައި 2023 ވަނަ އަހަރުގެ އޭޕްރީލް މަހުން ފެށިގެން ހިންގަމުންދިޔަ ޓެލެގްރާމް ޗެނަލްތަކުގެ މައްސަލަ ތަހުގީގުކޮށް މި ޗެނަލްތައް ހިންގާ ކަމަށް ތުހުމަތުކުރެވޭ މައްސަލައިގައި ބަޔަކުވެސް ހައްޔަރުކުރިއެވެ.

މީގެ ތެރޭގައި ހިމެނޭ 28 އަހަރުގެ ދިވެހި ފިރިހެނަކާއި، 39 އަހަރުގެ ދިވެހި އަންހެނެއްގެ އިތުރުން 60 އަހަރުގެ ފިރިހެނެއް ވަނީ ހައްޔަރުކޮށްފައެވެ.