މިއީ ރާއްޖޭގައި މިހާތަނަށް އެންމެ ފުޅާދާއިރާގައި ހިންގި ޗެނަލްތައް، ހަށިވިއްކުމުގެ ވިޔަފާރި ހިންގުމަށް ޚާއްސަ ޓެކްސީއެއްވެސް ހަމަޖައްސާފައިވޭ
28 އަހަރުގެ ފިރިހެނަކާއި 39 އަހަރުގެ އަންހެނަކު ވަނީ ހައްޔަރުކޮށްފައި
އާދިއްތަ ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގެ ތެރެއިން
ބޮޑެތި ކުށްތަކަށް އަރިގަތުމަށް ޖަޒީރާގެ އެކި ނަން ނަމުގައި ހިންގި ޓެލެގްރާމް ޗެނަލްތަކަކީ މިހާތަނަށް ރާއްޖޭގައި އެންމެ ފުޅާދާއިރާއެއްގައި މިފަދަ ގޮތަކަށް ހިންގި ޗެނަލްތައް ކަމަށާއި، ހަށިވިއްކުމުގެ ވިޔަފާރި ހިންގުމަށް ޚާއްސަ ޓެކްސީއެއް ހަމަޖައްސާފައިވާކަމަށް ތަހުގީގަށް އެނގިފައިވާކަމަށް ފުލުހުން ބުނެފިއެވެ.
އާދިއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ސައިބަރ ޕޮލިސް އިންވެސްޓިގޭޝަން އޮފިސަރު އިންސްޕެކްޓަރ އޮފް ޕޮލިސް އާމިނަތު މުހައްމަދު ވިދާޅުވީ، ޓެލެގްރާމް ޗެނަލްތައް އުފައްދައިގެން ގާނޫނާ ހިލާފު ކަންތައްތައް ހިންގާ ކަމަށް ހުށަހެޅޭ މައްސަލަތަކާއި ގުޅިގެން ޚާއްސަ އޮޕަރޭޝަނެއް ހިންގާ، 6 މާރިޗް 2024 ގައި ޖަޒީރާ އެޑްމިން އާއި ޖަޒީރާ ގާލްސް އާއި ޖަޒީރާ އެސްކޯޓް ގެލަރީ އާއި ޖަޒީރާ ސްކޭމް އެލާޓް އަދި ޖަޒީރާ ލިންކް ހަބަރު ޗެނަލް ފުލުހުންގެ ބާރުގެ ދަށަށް ގެނެސްފައިވާ ކަމަށެވެ. އަދި އެކަމުގެ ތުހުމަތުގައި މި މަހުގެ 6 ވަނަ ދުވަހު އުމުރުން 28 އަހަރުގެ ފިރިހެނަކާއި 39 އަހަރުގެ އަންހެނަކު ހައްޔަރުކޮށް، ތަހުގީގަށް ބަންދުގެ މުއްދަތު ޖަހާފައިވާ ކަމަށެވެ.
އިންސްޕެކްޓަރ އާމިނަތު ވިދާޅުވީ މި މައްސަލައިގައި ހައްޔަރުކުރި މީހުންނަކީ އާމްދަނީ ހޯދުމަށް ވަޒީފާއެއް އަދާކުރާ ބައެއް ނޫން ކަމަށާއި ނަމަވެސް އެކައުންޓްތަކުން ގިނަ އަދަދެއްގެ މުއާމަލާތްކޮށްފައިވާ ކަަމަށެވެ. އަދި އެކަކަކީ ކުށުގެ ރިކޯޑު އޮންނަ މީހެއް ކަމަށް އޭނާ ވިދާޅުވިއެވެ. މިމައްސަލައާ ގުޅިގެން ގިނަ ބަޔަކަށް ތުހުމަތުކުރެވޭކަން ފާހަގަކުރައްވައި އާމިނަތު ވިދާޅުވީ އެ އިން ކޮންމެ މީހެއްގެ އެކައުންޓުން ދެ މިލިއަނަށް ވުރެ ގިނަ ރުފިޔާ ދައުރު ކޮށްފައިވާ ކަމަށެވެ.
އިންސްޕެކްޓަރ އާމިނަތު ވިދާޅުވީ 2023 ވަނަ އަހަރުގެ އޭޕްރީލް މަހުގެ ތެރޭގައި ހިންގަން ފެށި މި ޓެލެގްރާމް ޗެނަލްތައް މިދިޔަ ދުވަސްތަކުގައި ވަރަށް ބޮޑަށް ކުރިއަރާފައިވާ ކަމަށާއި، މި ގްރޫޕްތަކުގައި 7000 ވުރެ ގިނަ މީހުން ތިބި ކަމަށެވެ. މީގެ ތެރޭގައި ގިނަ އަދަދެއްގެ ދިވެހިންނާއި ބިދޭސީން ހިމެނޭކަން އޭނާ ފާހަގަކުރެއްވިއެވެ.
މިމައްސަލައާ ގުޅިގެން ތަހުގީގަށް ފާހަގަކުރެވުނު ކަންތައްތަކަށް އިޝާރާތް ކުރައްވައި އޭނާ ވިދާޅުވީ ހަށިވިއްކުމުގެ ވިޔަފާރި ހިންގުމަށްޓަކައި ރާއްޖެއިން ބޭރުން އަންހެނުން ގެނެސްފައިވާ ކަމަށާއި، މިކަމަށް އެއް ޓެކްސީ ޚާއްސަކޮށްފައިވާ ކަމަށެވެ. އަދި މިކަންކަން ކުރުމަށް ދުވާލުގެ މެންދުރު ވަގުތު ޓެލެގްރާމް ޗެނަލްތަކުގައި ޕޯސްޓްތައް އިސްތިހާރުކޮށްފައިވާ ކަމަށެވެ.
އިންސްޕެކްޓަރ އާމިނަތު ވިދާޅުވީ މިއީ، ރާއްޖޭގައި މިހާތަނަށް އެންމެ ފުޅާދާއިރާގައި ހިންގި ޗެނަލްތައް ކަމަށެވެ.
