ކުރީ ސަރުކާރުގައި ވާނީ ކީސްޓޭޖް 2 ގެ ސިލަބަސް ރިވިއުކޮށް އެކުލަވާލާފައި: އިހުސާން
7 ޖުލައި 2026 | އަންގާރަ 08:46ކުރީ ސަރުކާރުން ކީސްޓޭޖް 2 ގެ ސިލަބަސް ރިވިއުކޮށް ފޮތްތައް އެކުލަވާލާފައިވާ ކަމަށް ވިދާޅުވެ، ކުރީގެ ޑެޕިއުޓީ މިނިސްޓަރު މުހައްމަދު އިހުސާން އެޑިއުކޭޝަން މިނިސްޓަރުގެ ވާހަކަތަކަށް ރައްދު ދެއްވައިފި. މިހާރުގެ ސަރުކާރަށް ތިން އަހަރުވާން ކައިރިވާއިރު ވެސް އެ ފޮތްތައް ޕްރިންޓްކޮށް ނުނިމޭކަން ފާހަގަކުރައްވައި، އިހުސާން ވިދާޅުވީ ދަރިވަރުން ހިސާބަށް ދަށްވަނީ ކިޔަވައިދޭ ގަޑި މަދުވެގެން ނޫން ކަމަށް. މީގެ އިތުރުން، މިހާރު ވެސް ސްކޫލުތަކުގައި ކިޔަވައިދެނީ ޓީޗަރުންނަށް ފޮނުވާފައިވާ ސޮފްޓް ކޮޕީތަކަށް ބަލައިގެން ކަމަށް އޭނާ ވިދާޅުވި.
ކުރީގެ ޑެޕިއުޓީ މިނިސްޓަރ، އަދި އެމްޑީޕީގެ ގައުމީ މަޖިލިސް މެންބަރު މުހައްމަދު އިހުސާން. | ރާއްޖެ އެމްވީ
ކުރީ ސަރުކާރުގައި ކީސްޓޭޖް 2 ގެ ސިލަބަސް ރިވިއުކޮށް އެކުލަވާލާފައިވާ ފޮތްތައް މި ސަރުކާރަށް 3 އަހަރުވާން ދާއިރު ވެސް ނުނިމޭ ކަމަށް ކުރީގެ ޑެޕިއުޓީ މިނިސްޓަރ، އަދި އެމްޑީޕީގެ ގައުމީ މަޖިލިސް މެންބަރު މުހައްމަދު އިހުސާން ވިދާޅުވެއްޖެ އެވެ.
ރާއްޖެ ޓީވީގެ "ފަލަސުރުހީ" ޕްރޮގްރާމުގައި އިހުސާން ވިދާޅުވީ ރައީސް އިބްރާހިމް މުހައްމަދު ސޯލިހުގެ ސަރުކާރު ނިމުނުއިރުގައި ކީސްޓޭޖް 2 ގެ ދަރިވަރުންގެ ސިލަބަސް ރިވިއުކޮށް، އޭގެ މައްޗައް ފޮތްތައް އެކުލަވާލާފައިވާނެކަމުގަ އެވެ.
އަޅުގަނޑުމެން ސަރުކާރު ނިމުނުއިރު ކީސްޓޭޖް 2 ގެ ފޮތްބައިވާނީ އެކުލަވާލާ ނިންމާފަ. ކަރިކިއުލަމް، މި ސިލަބަސްތަކަށް އިތުރަށް މި ރިވިއުކޮށް އެ ސިލަބަސްތައް އެކުލަވާލާ، އޭގެ މައްޗައް ފޮތް އެކުލަވާލާ ނިންމާފަ ވާނީ.ކުރީގެ ޑެޕިއުޓީ މިނިސްޓަރ، އަދި އެމްޑީޕީގެ ގައުމީ މަޖިލިސް މެންބަރު މުހައްމަދު އިހުސާން
އިހުސާން މި ވާހަކަ ދެއްކެވީ މިފަހުން އެޑިއުކޭޝަން މިނިސްޓަރ ޝަފީއު ދެއްކެވި ވާހަކައަކާއި ގުޅިގެންނެވެ. ޝަފީއު ވިދާޅުވި ގޮތުގައި މިހާރު ވެސް ސުކޫލުތަކުގައި ކިޔަވައިދެނީ، 2015 ވަނަ އަހަރުން ފެށިގެން އަމަލުކުރަމުން އަންނަ މުގައްރަރަކަށް ކަމަށާއި އެކަށީގެންވާ ބަދަލުތަކެއް އެ މުއްދަތުގެ ތެރޭގައި މުގައްރަރަށް އައިސްފައިނުވާ ކަމަށެވެ. މީގެ އިތުރުން ހިސާބު، އިސްލާމް އަދި ދިވެހި ކިޔަވަދޭ މުއްދަތު އިތުރުކުރަން ނިންމާފައިވާކަމަށް ވެސް ވިދާޅުވެފައިވެ އެވެ.
އިހުސާން ވިދާޅުވި ގޮތުގައި ޕެންޑިންގ ގައި ހުންނާނީ ހަމައެކަނި ލޭއައުޓް ތައްޔާރުކުރުމާއި ފޮތްތައް ޕްރިންޓް ކުރުން ކަމުގަ އެވެ. އަދި މިހާރުވެސް ކިޔަވާދެމުން ދަނީ ޓީޗަރުންނަށް ސޮފްޓް ކޮޕީތަކެއް ފޮނުވައިގެން ކަމަށް ވިދާޅުވި އެވެ.
މީގެއިތުރުން އިހުސާން ވިދާޅުވީ ދަރިވަރުން ހިސާބާށް ދަށްވަނީ ގަޑި މަދުވެގެން ނޫންކަމަށާއި މިހާރުވެސް އެންމެ ގިނަ ވަގުތު ކިޔަވަދެނީ ހިސާބުކަމަށެވެ. އަދި ދަރިވަރުން ހިސާބަށް ދަށްވާ މާ ގިނަ އަސާސީ ކަންކަން އެބަހުރިކަމަށް ވިދާޅުވި އެވެ.
