ރައީސް މުޢިއްޒު ސަޢޫދީ ފަންޑާމެދު ދެއްކެވި ވާހަކަތަކަކީ ކަނޑައެޅިގެން އިތުރުފުޅެއް
ސަޢޫދީ ފަންޑުން ހޮސްޕިޓަލްތައް ތަރައްޤީ ކުރުމަށް ލިބުނު 50 މިލިއަން ޑޮލަރާ ގުޅޭގޮތުން ރައީސް މުޢިއްޒު ވަނީ ރައްޔިތުންނަށް އޮޅޭގޮތަށް ދޮގު މަޢުލޫމާތު ދެއްވާފަ
ރައީސް ޑރ މުހައްމަދު މުއިއްޒު: ފ. ނިލަންދޫ އަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ވާހަކަދައްވަނީ
ރައީސް ޑރ މުހައްމަދު މުއިއްޒު ރާއްޖޭގެ ބައެއް ރަށްތަކަށް މިހާރު ކުރަމުން ގެންދަވާ ދަތުރުފުޅުގެ ތެރެއިން ފ. ނިލަންދޫ އަށް ވަޑައިގެން އެ ރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގެ ތެރެއިން ސައުދީ ފަންޑުން ލިބުނު 150 މިލިއަން ޑޮލަރަކީ ހޮސްޕިޓަލްތައް ތަރައްޤީ ކުރުމަށް ލިބުނު ފައިނޭންސިންގ ކަމަށް ވިދާޅުވެ އިތުރުފުޅުހައްދަވައިފި އެވެ.
ރައީސް މިފަދައިން ވިދާޅުވީ ސެޕްޓެމްބަރު މަހުގެ 23 ވަނަ ދުވަހު ފ، ނިލަންދޫ އަށް ކުރެއްވި ދަތުރުފުޅުގެ ތެރެއިން އެ ރަށުގެ ރައްޔިތުންނާއި ބައްދަލުކުރައްވައި ދެއްކެވި ވާހަކަފުޅުގަ އެވެ.
ސައުދީ ފަންޑާއި ގުޅޭގޮތުން ރައްޔިތުންނަށް އޮޅޭގޮތަށް ވާހަކަ ދައްކަވަމުން މުއިއްޒު ވިދާޅުވެފައި ވަނީ 50 އެނދުގެ ފުލްފުލެޗް ހޮސްޕިޓަލެއް އެޅުމަށް ސައުދީ ފަންޑު ހަމަޖެހިފައި ކަމަށެވެ. އެހެން ނަމަވެސް ރާއްޖޭން ބޭރުގެ މަޝްރޫއެއް ވީމަ ބޭރުފަންޑުތަކުގައި ހުންނަ ތަރުތީބު ވުމަށް ޕްރޮސީޗަރ ފުރިހަމަކުރަން ޖެހޭ ކަންތައް ތަކެއް ހުންނާތީ އަމަލީ މަސައްކަތަށް އަދި ނުފެށިގެން އުޅެނީކަމަށެވެ.
އަދި ބޭރުގެ ފަންޑުތަކުގެ ތެރޭގައި ތަފާތު ގިނަ އެކި ސްޓަޑީތަށް ހެދުމާއި ތައްޔާރުކުރަން ޖެހޭ ގިނަ ލިޔެކިޔުންތަކެއް ހުރުމުން މިހާރު ކަންކަން އެ ދަނީ އެ މަރުހަލާގެ ތެރޭގައި ކަމަށް ރައީސް ވިދާޅުވި އެވެ.
ނިލަންދޫ ރައްޔިތުންނަށް ކަންބޮޑުވެނުލެއްވުމަށް އިލްތިމާސް ކުރައްވަމުން ރައީސް މުއިއްޒު ވިދާޅުވީ އެއީ ފުލީ "ކޮންފާމްޑް" 50 އެނދުގެ ޒަމާނީ ހޮސްޕިޓަލް ޕްރޮޖެކްޓެއް ކަމަށެވެ.
ރައީސް ވިދާޅުވީ އާންމުކޮށް މިފަދަ ޕްރޮޖެކްޓް ތަކުގައި ނަގަނީ 8 ނޫނީ 10 މަސް ދުވަހުގެ މުއްދަތެއް ކަމަށެވެ. ގިނަވެގެން ނަގަނީ 10 ވަރަކަށް މަސް ދުވަސް ކަމަށެވެ. އަދި އޭގެ ތެރެއިން މިހާރު މަހެއްހާ ދުވަސް ހިނގައިފި ކަމަށް ރައީސް ވަނީ ވިދާޅުވެފަ އެވެ.
ނިލަންދޫގައި ސައުދީ ފަންޑާއި ގުޅޭގޮތުން ރައްޔިތުންނަށް އޮޅޭގޮތަށް ރައީސް މުއިއްޒު ޙަޤީޤަތާ ޚިލާފު ދޮގު މަޢުލޫމާތު ދެއްވާފައިވާއިރު، މި މަޝްރޫޢުގެ ފައިނޭންސިންގ އަކީ އެމްޑީޕީ ސަރުކާރުން ވެލާނާ އިންޓަނޭޝަނަލް އެއަރޕޯޓުގެ އައު ޓާމިނަލް އިމާރާތް ކުރުމަށް ހޯދި ފަންޑިންގ ޕެކޭޖްގެ ބައެކެވެ.
އަދި މިއީ 2022 ވަނަ އަހަރު ރައީސް އިބްރާހިމް މުޙައްމަދު ޞާލިޙް އަދި މިދިޔަ ސަރުކާރުގެ ފިނޭންސް މިނިސްޓަރ އަމީރުގެ ފަރާތުން ސަޢޫދީ އަރަބިއްޔާގެ އިސްވެރިންނާއެކު މަޝްވަރާ ވެސް ކުރެވިފައިވާ މަޝްރޫއެކެވެ.
150 މިލިއަން ޑޮލަރުގެ މި ޕެކޭޖްގައި ހިމެނެނީ އެއަރޕޯޓް ތަރައްޤީ ކުރުމަށް 100 މިލިއަން ޑޮލަރު އަދި ޞިއްޙީ ދާއިރާ ތަރައްޤީ ކުރުމަށް 50 މިލިއަން ޑޮލަރެވެ. މި އެއްބަސްވުމަށް ހަދާފައި ވަނީ 2023 ގެ އޮކްޓޯބަރުގަ އެވެ. އަދި މި ލޯނު ލިބިވައިވަނީ މި ސަރުކާރުގެ ކުރީގެ ފިނޭންސް މިނިސްޓަރ ޝަފީޤް މެދުވެރިކޮށް މި އަހުގެ މޭމަހުގަ އެވެ.
ރައީސް މުޢިއްޒު ވިދާޅުވެފައިވަނީ މި ފައިނޭންސިންގ ހަމަޖެހުނުތާ އެންމެ މަހެއް ކަމަށެވެ. ނަމަވެސް އޭރުގެ ފިނޭންސް މިނިސްޓަރ ޝަފީޤް ސޮއިކުރެއްވި ދުވަހުން ފެށިގެންވެސް މިއަދާއި ހަމައަށް މިވަނީ 16 މަސް ވެފަ އެވެ. އަދި މީގެ އިތުރުން 8-10 މަސް ދުވަސް އިދާރީ މަސައްކަތަށް ބޭނުންވާނެ ކަމަށް ރައީސް މުއިއްޒު ވިދާޅުވުމަކީ މިފަދަ ފަންޑު މެދުވެރިކޮށް ހިންގޭ މަޝްރޫޢުތަކުގެ އާންމު އުސޫލުތަކާ ޚިލާފު ވާހަކައެކެވެ.
އެމްޑީޕީ ސަރުކާރުން މި މަޝްރޫޢު ރޭވިފައިވަނީ އއ. ރަސްދޫ، ނ. މަނަދޫ އަދި ފުވައްމުލަކު ސިޓީގައި ހޮސްޕިޓަލްތައް ޤާއިމްކުރުމަށެވެ. ނަމަވެސް ޕީއެންސީ ސަރުކާރުން މިހާރު ވަނީ ފ. ނިލަންދޫ އަދި ލ. ފޮނަދޫއަށް ބަދަލުކޮށް، ހަމައެކަނި ފުވައްމުލަކު ސިޓީ ހިމަނާފައެވެ.
މި މައްސަލައިގައި ރައީސް މުޢިއްޒު ދެއްކެވި ވާހަކަފުޅުތަކަކީ ރައްޔިތުންނަށް އޮޅުވާލުމަށް ދެއްކެވި ވާހަކަތަކެއް ކަމަށް ފާހަގަކުރެވޭއިރު، މިހާތަނަށް މަޝްރޫޢުގެ އެއްވެސް މަސައްކަތެއް ކުރިއަށް ނުގެންދެވި ލަސްވަމުންދާކަން ވެސް ފާހަގަކުރެވެއެވެ.
