ފަރަންސޭސިވިލާތުގެ މިއުޒިމަކަށް އަނެއްކާވެސް ވަގުން ވަދެއްޖެ، މިފަހަރު ލަލީކް މިއުޒިއަމުން 4 މިލިއަން ޔޫރޯގެ ގަހަނާ ވަގަށް ނަގައިފި

ފްރާންސްގެ އިރުއުތުރުގައި ހުންނަ ލަލީކް މިއުޒިއަމުން ގާތްގަނޑަކަށް 4 މިލިއަން ޔޫރޯގެ އަގުހުރި ގަހަނާތަކެއް ވަގަށް ނަގައިފި އެވެ.

މި ވައްކަން ހިންގާފައި މިވަނީ، މިދިޔަ އަހަރު ލޫވް މިއުޒިއަމް ފަޅާލި މައްސަލަ އާ ގުޅިގެން، ލަލީކް މިއުޒިއަމަކީ ސަލާމަތީ ގޮތުން "ޚާއްސަ ސަމާލުކަމެއް" ދެމުންދިޔަ ތަނެއް ކަމަށް ރިޕޯޓްތައް ބުނަމުންދަނިކޮށެވެ.

ޖަރުމަނުވިލާތުގެ ބޯޑަރު ކައިރީގައި އޮންނަ އަވަށެއް ގައި ހުންނަ މި މިއުޒިއަމަށް ވަގުން ވަދެފައިވަނީ އާދީއްތަ ދުވަހުގެ ފަތިހު އެތާ ގަޑިން 5:30 ހާއިރު އެވެ. މޫނު ނިވާކޮށްގެން ތިބި ބަޔަކު މިއުޒިއަމްގެ ދޮރެއް ހަލާކުކޮށްލައިގެން ވަދެ، ގަހަނާ ބަހައްޓާފައި ހުރި ހަ ޑިސްޕްލޭ ކޭސް ތަޅާލުމަށްފަހު، ގާތްގަނޑަކަށް 20 ވަރަކަށް ގަހަނާއާއެކު ވަނީ ފިލާފަ އެވެ.

ލިބުނު ގެއްލުންތައް އަދިވެސް ބަލަމުންދާއިރު، ތަހުގީގާ ގާތް މަސްދަރަކުން އޭއެފްޕީ ނިއުސް އެޖެންސީއަށް މައުލޫމާތު ދިން ގޮތުގައި، ގެއްލުނު ތަކެތީގެ އަގު "4 މިލިއަން ޔޫރޯއާ ގާތްކުރާނެ" ކަމަށް ބެލެވެ އެވެ. ވަގަށް ނަގާފައިވާ ތަކެއްޗަކީ ކްރިސްޓަލުން އުފައްދާފައިވާ ތަކެތި ކަމަށާއި، އޭގައި އެއްވެސް އަގުބޮޑު ޖަވާހިރެއް ނެތުމުން، އެ ތަކެތި ވިރުވައިގެން ބޭނުން ނުކުރެވޭނެ ކަމަށްވެސް އެ މަސްދަރުން ބުނެފައިވެ އެވެ.

އެ އަވަށުގެ މޭޔަރު ވިދާޅުވި ގޮތުގައި، ވަގުންނަށް މިއުޒިއަމާ ބެހޭ "ފުރިހަމަ މައުލޫމާތު" ލިބިފައިވާ ކަމަށް ބެލެވެ އެވެ. ސަބަބަކީ އެމީހުން ވަނުމާއެކު ސީދާ ގަހަނާތަކަށް އަމާޒުކޮށްފައިވާތީ އެވެ. މޭޔަރު އެ ސަރަހައްދުގެ ނޫހެއް ކަމަށްވާ "ޑީއެންއޭ" އަށް މައުލޫމާތު ދެއްވަމުން ވިދާޅުވީ، ވައްކަން ކުރި ވަގުތު ހުރިހާ އެލާމްތަކެއް މަސައްކަތް ކުރި ނަމަވެސް، ސެކިއުރިޓީ ކުންފުނިން ފުލުހުންނަށް ވަގުތުން މައުލޫމާތު ދީފައި ނުވާ ކަމަށެވެ. "ލެ ޕެރިސިއަން" ނޫހުން ރިޕޯޓްކޮށްފައިވާ ގޮތުގައި، ފުލުހުންނަށް އެންމެ ފުރަތަމަ ގުޅާފައިވަނީ އެތަނަށް މަސައްކަތަށް ދިޔަ ސާފުކުރާ މީހެކެވެ.

މި ވައްކަން ހިންގާފައި މިވަނީ، 2025 ވަނަ އަހަރުގެ އޮކްޓޫބަރު މަހު ޕެރިހުގެ ލޫވް މިއުޒިއަމުން ދުވާލު ވަގުތު ގާތްގަނޑަކަށް 88 މިލިއަން ޔޫރޯގެ އަގުހުރި ފްރާންސްގެ ޝާހީ އާއިލާ އަށް ނިސްބަތްވާ ގަހަނާތަކެއް ވަގަށް ނެގިތާ އަހަރެއްވެސް ނުވަނީހެވެ. ލޫވް މިއުޒިއަމްގެ ވައްކަމަށްފަހު މަދު ގަޑިއިރުތަކެއްގެ ތެރޭގައި، އިރުއުތުރުގެ ރަށެއް ކަމަށްވާ ލަންގްރެސްގައި ހުންނަ ޑެނިސް ޑިޑަރޮޓް ހައުސް އޮފް އެންލައިޓްމަންޓުން 2،000 އެއްހާ އަގުބޮޑު ފައިސާ ފޮތި ވަނީ ވަގަށް ނަގާފަ އެވެ. އަދި އޭގެ އެއް މަސް ކުރިން، ނޭޝަނަލް މިއުޒިއަމް އޮފް ނެޗުރަލް ހިސްޓްރީއަށް ވަދެ، 1.5 މިލިއަން ޔޫރޯގެ އަގުހުރި ހަ ގޯލްޑް ނަގެޓްސް ވެސް ވަނީ ވަގަށް ނަގާފަ އެވެ.

މި ހާދިސާތަކާ ގުޅިގެން މިއުޒިއަމްތަކުގެ ސަލާމަތީ ކަންކަމާ މެދު މުޅި ގައުމުގައި ވަނީ ބޮޑު ބަހުސެއް އުފެދިފަ އެވެ. "ލެ ޕެރިސިއަން" އިން ރިޕޯޓްކުރި ގޮތުގައި، ލޫވް މިއުޒިއަމްގެ ވައްކަމަށްފަހު ލަލީކް މިއުޒިއަމަކީ "ނާޒުކު ތަނެއްގެ" ގޮތުގައި ބަލައި، އެތަނަށް "ޚާއްސަ ސަމާލުކަމެއް" ދެމުންދިޔަ ތަނެކެވެ. ނަމަވެސް ތަހުގީގާ ގާތް މަސްދަރަކުން ބުނީ އެތަނުގައި ހުރި ރައްކާތެރިކަމުގެ ފިޔަވަޅުތައް "ފުދޭވަރެއް ނޫން" ކަމަށެވެ.

މިދިޔަ މެއި މަހު ފްރާންސްގެ ޕާލަމެންޓުން ނެރުނު ތަހުގީގީ ރިޕޯޓެއްގައި ބުނެފައިވަނީ، އެ ގައުމުގެ މިއުޒިއަމްތަކުގެ ސަލާމަތީ ނިޒާމުގައި ބޮޑެތި އުނިކަންތައްތަކެއް ހުރި ކަމަށެވެ. އޭގެ ތެރޭގައި އިމާރާތްތައް ބާވުމާއި، މުވައްޒަފުން މަދުވުމާއި، އަދި ސަވައިލަންސް ނިޒާމު އެކަށީގެންވާ ވަރަށް ނެތުން ހިމެނެ އެވެ. އެ ރިޕޯޓުގައިވާ ގޮތުން 2024 ވަނަ އަހަރާ ހަމައަށް ފްރާންސްގެ މިއުޒިއަމްތަކުގެ ތެރެއިން ކުއްލި ހާލަތްތަކަށް ތައްޔާރުވުމުގެ ޕްލޭނެއް އޮތީ އެންމެ 23 އިންސައްތަ ތަނުގަ އެވެ. އަދި އެކަށީގެންވާ ވީޑިއޯ ސަވައިލަންސް ނިޒާމެއް ހުރީ އެންމެ 54 އިންސައްތަ މިއުޒިއަމްގަ އެވެ.

ގްރޭންޑް އެސްޓް ސަރަހައްދުގެ ރައީސް ފްރޭންކް ލެރޯއީ ވަނީ ލަލީކް މިއުޒިއަމްގައި ހިންގި ވައްކަން ކުށްވެރިކުރައްވައި، އެއީ "ގައުމުގެ ތަރިކައަށް ދިން ބަލައިނުގަނެވޭނެ ހަމަލާއެއް" ކަމަށް ސިފަކުރައްވާފަ އެވެ. އޭނާ ވިދާޅުވީ ގެއްލުނު ތަކެތީގެ އިތުރުން، މިއީ ފްރާންސްގެ ތާރީޚާއި، މަސައްކަތްތެރިކަމާއި، ސަގާފަތް ރަމްޒުކޮށްދޭ މުހިންމު ބިނާއަކަށް ދިން ހަމަލާއެއް ކަމަށެވެ.

2011 ވަނަ އަހަރު ހުޅުވި ލަލީކް މިއުޒިއަމަކީ މަޝްހޫރު ގަހަނާ އުފައްދާ އަދި ބިއްލޫރީގެ މަސައްކަތްތެރިޔާ ރެނޭ ލަލީކް އާއި އޭނާގެ ފަހުން އައި ފަރާތްތަކުގެ ހަނދާނުގައި ބިނާކޮށްފައިވާ ތަނެކެވެ. މިތަނުގައި ޒަމާންވީ ގަހަނާތަކުން ފެށިގެން ޒަމާނީ ކްރިސްޓަލް އުފެއްދުންތަކާ ހަމައަށް 650 އަށްވުރެ ގިނަ މަސައްކަތްތައް ދައްކާލަން ބަހައްޓާފައި ހުރެ އެވެ. މިއުޒިއަމުން ބުނި ގޮތުގައި، މި ވައްކަމާ ގުޅިގެން "އަމާން އަދި ރައްކާތެރި" ގޮތަކަށް އަލުން ހުޅުވުމަށް ތައްޔާރުވުމުގެ ގޮތުން، ކުރިއަށް އޮތް ދުވަސްތަކުގައި މިއުޒިއަމް ބަންދުވާނެ އެވެ.