ނަފްސާނީ ބަލިތަކަށް ދޭ ބޭހުގެ ދަތިކަމެއް ނެތް: މިނިސްޓަރު ގީލާ
23 ޖޫން 2026 | އަންގާރަ 05:04ނަފްސާނީ ބަލިތަކަށް ބޭނުންވާ ބޭސް ލިބުމުގައި ދަތިތަކެއް ހުރިކަމަށް އާންމުންނާއި މަޖިލިސް މެންބަރުން ފާހަގަކުރެއްވި ނަމަވެސް، އެފަދަ ދަތިކަމެއް އުޅޭކަމަށް ގަބޫލުނުކުރައްވާ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ. މިނިސްޓަރު ވިދާޅުވީ މި ބޭސްތަކަކީ ވަކި އުސޫލުތަކަކާއި ކޯޓާއެއްގެ ދަށުން އެތެރެކުރާ ބޭސްތަކެއް ކަމަށާއި، މިހާރު ވެސް ބޭނުންވާ ފަރާތްތަކަށް ބޭސް ފޯރުކޮށްދެމުންދާ ކަމަށް. ނަމަވެސް ބައެއް މުހިންމު އިންޖެކްޝަންތަކާއި ރިހެބިލިޓޭޝަނަށް ބޭނުންވާ ބޭސް ނުލިބޭތީ އާންމުންގެ ކަންބޮޑުވުންތައް ވަނީ އިތުރުވެފަ.
ހެލްތު މިނިސްޓަރު ގީލާ އަލީ، ރައްޔިތުންގެ މަޖިލީހުގައި | ރައްޔިތުންގެ މަޖިލިސް
ނަފްސާނީ ބަލިތަކަށް ދޭ ބެސްތައް ލިބުމުގައި ދަތިކަމެއް ހުރި ކަމަށް ގަބޫލު ނުކުރައްވާ ކަމަށް ހެލްތު މިނިސްޓަރު ގީލާ އަލީ ވިދާޅުވެއްޖެ އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާއަށް މިނިސްޓަރު ހާޒިރުކޮށްފައިވާއިރު، ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ވަނީ ނަފްސާނީ ބަލިތަކަށް ފަރުވާ ދިނުމަށް ބޭނުންކުރާ ބޭސް ލިބުމުގައި ދަތިކަން ހުރިކަން ފާހަގަ ކުރައްވާ، އެކަން ހައްލު ކުރުމަށް ކުރަމުންދާ މަސައްކަތާ ގުޅިގެން ސުވާލު ކުރައްވާފަ އެވެ.
އެ ސުވާލަށް ޖަވާބު ދެއްވަމުން މިނިސްޓަރު ވިދާޅުވީ ނަފްސާނީ ބަލިތަކަށް ފަރުވާ ދިނުމަށް ބޭނުންވާ ބޭސްތަކަކީ ވަކި އުސޫލުތަކެއްގެ ތެރެއިން ރާއްޖެ އެތެރެ ކުރެވޭ ބޭސް ތަކެއް ކަމަށެވެ. އަދި އެއީ ވަކި ކޯޓާތަކެއް ކަނޑައެޅިގެން އެތެރެކުރެވޭ ބޭސް ތަކެއް ކަމަށެވެ.
މި ބޭސްތައް ލިބުމުގައި ދަތިކަމެއް ހުރިކަމަށް ނުދެންނެވޭނެ ކަމަށް ވެސް މިނިސްޓަރު ވިދާޅުވި އެވެ.
މެންޓަލް ހެލްތު ޕޭޝަންޓްސް އަށް ލިބެން ޖެހޭ ބޭހަކީ ވެސް ވަކި ޚާއްސަ ބޭސްތަކެއް. އެއީ އެ ބޭހަކީ ބައެއް ބޭސްތަކަކީ ބޭސް ސިޓީގައި ލިޔެވިގެން ވަކި އިންތިޒާމެއްގެ ތެރެއިން މެނުވީ ލިބޭ ބޭސްތަކެއް ނޫން. އެއީ ރާއްޖެ އެތެރެ ކުރުމުގައި ވެސް ކޯޓާ އެއް ކަނޑައެޅިފަ ހުންނަ ބޭސްތަކެއް. އޭގެ ތެރެއިން ބައެއް ބޭސްތަކަކީ. އަޅުގަނޑުމެން މިހާރު ވެސް ގުރައިދޫ މަރުކަޒުގަ ތިބި މީހުންގެ ތެރެއިން ވެސް ބޭސް ފޯރުކޮށްދިނުމާ ކުރީގަ ވެސް ދަންނަވާލިހެން އާއިލާތަކާ ހަވާލު ކުރެވިގެން ގޮސްފައިވާ މީހުންނަށް ބޭސް ފޯރުކޮށްދިނުމަކީ މިހާރު ވެސް ކުރަމުން ދާ ކަމެއް. އެ ބޭހުގެ ސަޕްލައި އަށް އަޅުގަނޑު ނުދަންނަވާނަން މިވަގުތު ދަތިކަމެއް ހުރިއެކޭ.ހެލްތު މިނިސްޓަރު ގީލާ އަލީ
މިނިސްޓަރު އެހެން ވިދާޅުވި އިރު، ނަފްސާނީ ބަލިތަކަށް ފަރުވާ ހޯދާ ފަރާތްތަކަށް ބޭސް ނުލިބިގެން ދާދި ފަހުން ވެސް ގިނަ ބަޔަކު ވަނީ ކަންބޮޑުވުން ފާޅު ކޮށްފަ އެވެ. އަދި ބައެއް ހާލަތްތަކުގައި ބޭނުންކުރާ އިންޖެކްޝަން ނުލިބޭތީ އެކަމުގެ ކަންބޮޑުވުން ވެސް ގިނަބަޔަކު ސޯޝަލް މީޑިއާގައި ފާޅު ކޮށްފައި ވެ އެވެ.
އޭގެ އިތުރުން އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި މާވަށު ދާއިރާގެ މެންބަރު އަހްމަދު ޝާކިރު ވެސް ވަނީ ނަފްސާނީ ބަލިތަކަށް ފަރުވާ ކުރުމަށް ބޭނުންކުރާ އިންޖެކްޝަނެއް ނުލިބޭތީ، އެކަން މެންބަރުގެ ސަމާލުކަމަށް ވެސް އައިސްފައިވާ ކަން ފާހަގަކުރައްވާފަ އެވެ. އަދި ކެންދޫ ދާއިރާގެ މެންބަރު މައުރޫފް ޒާކިރު ވަނީ ރިހެބިލިޓޭޝަނަށް ބޭނުންވާ ބޭސް ނުލިބޭތީ އެކަން މެންބަރުގެ ސަމާލު ކަމަށް އައިސްފައިވާ ކަމަށް ވިދާޅުވެފަ އެވެ.
މިނިސްޓަރު ގީލާ، ނަފްސާނީ ބަލިތަކަށް ފަރުވާ ކުރުމަށް ބޭނުންކުރާ ބޭސް ލިބުމުގައި ދަތިކަމެއް ނެތް ކަމަށް ވިދާޅުވި އިރު، މީގެ ކުރިން މިނިސްޓަރު ވަނީ ބޭސް ލިބުމުގައި ހުރި ދަތިތަކަށް ހައްލު ހޯދުމަށްޓަކައި ފާމަސީތަކުގައި ހުރި ބޭސްތައް ދިނުމަށް ޑޮކްޓަރުންނަށް އިރުޝާދު ދީފައިވާ ކަމަށް ވިދާޅުވެފަ އެވެ. އެކަމާ ގުޅިގެން ގިނަ ބައެއްގެ ފާޑުކިޔުން މިނިސްޓަރަށް ވަނީ އަމާޒުވެފަ އެވެ.
