ޓީސީ އަތުން މޮޅުވެ، ގައްދޫ އިން ދިވެހި ޕްރިމިއާ ލީގަށް

ދިވެހި ޕްރިމިއާ ލީގުގެ ކޮލިފިކޭޝަންގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، ގދ. ގައްދޫ އިން އަންނަ ސީޒަންގެ ދިވެހި ޕްރިމިއާ ލީގުން ޖާގަ ހޯދައިފި އެވެ. 

އާދީއްތަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ގައްދޫ އިން ކާމިޔާބު ކޮށްފައި ވަނީ 1-0 އިންނެވެ. މި މެޗާ ކުރިމަތިލީއިރު ވެސް، ޓީސީ އިން ވަނީ އަންނަ ސީޒަންގެ ޕްރިމިއާ ލީގުގެ ޖާގަ ދިފާއު ކޮށްފައި އެވެ.

މެޗުގައި ގައްދޫ އިން ލަނޑު ޖަހާފައި ވަނީ ވެސް ދެ ވަނަ ހާފުގައި އެވެ. އެގޮތުން މެޗުގެ ދެ ވަނަ ހާފުގެ 76 ވަނަ މިނެޓުގައި ގައްދޫގެ ލަނޑު ޖެހީ އެ ޓީމުގެ ބިދޭސީ ކުޅުންތެރިޔާ ޑޮނާލިއޯ މެލާޝިއޯ ޑުއާންލާ އެވެ. މެޗުގައި ޓީސީ އަށް ވެސް ވަނީ ލަނޑު ޖަހާނެ ރަނގަޅު ފުރުސަތު ތަކެއް ލިބިފައި އެވެ.

ޓީސީ އަތުން ހޯދި މޮޅާ އެކު ގައްދޫ އިން ވަނީ ކޮލިފިކޭޝަންގެ ހަތަރު ވަނައިގައި އަންނަ ސީޒަންގެ ދިވެހި ޕްރިމިއާ ލީގުގެ ޖާގަ ކަށަވަރު ކޮށްފައި އެވެ. މިއާ އެކު، އަންނަ ސީޒަންގެ ދިވެހި ޕްރިމިއާ ލީގުގެ ޖާގަ ހޯދި ހަތަރު ޓީމު ވަނީ ކަށަވަރުވެފައި އެވެ. އެއީ ޓީސީ އާއި ގައްދޫގެ އިތުރުން، ބިސް ބުރު ސްޕޯޓްސް ކުލަބު އަދި ހއ.ދިއްދޫ އެވެ. 

ކޮލިފިކޭޝަންގައި އެއް ވަަނައިގައި އޮތީ ބިސް ބުރު ސްޕޯޓްސް ކުލަބެވެ. އެއީ އެ ޓީމު ކުޅުނު ހަތަރު މެޗުން 10 ޕޮއިންޓާ އެކު އެވެ. ދެ ވަނައިގައި ޓީސީ އަށް ހަތަރު މެޗުން ހަތް ޕޮއިންޓު ލިބޭއިރު، ތިން ވަނައިގައި ދިއްދޫ އަށް ވެސް ވަނީ ހަތް ޕޮއިންޓެވެ. އަދި ހަތަރު ވަަނައިގައި ގައްދޫ އަށް ލިބެނީ ހަ ޕޮއިންޓެވެ.

އަންނަ ސީޒަންގެ ދިވެހި ޕްރިމިއާ ލީގުން ޖާގަ ލިބޭ ހަތަރު ޓީމު ކަށަވަރު ކުރެވިފައި ވީ ނަމަވެސް، ކޮލިފިކޭޝަންގައި ކޮންމެ ޓީމަކަށް ވެސް ބާކީ އެއް މެޗު އެބަ އޮތެވެ. ކޮލިފިކޭޝަންގައި ދެން ވާދަ ކޮށްފައި ވަނީ ކުލަބު ގްރީން ސްޓްރީޓްސްގެ އިތުރުން، ކ.ހުރާ އެވެ.