މޯލްޑިވްސް ޖޫނިއަރ އޯޕަންގެ ދެ ވަނަ މުބާރާތް ޑިސެމްބަރު މަހު

މޯލްޑިވްސް ޖޫނިއަރ އޯޕަން ބެޑްމިންޓަން މުބާރާތުގެ ދެ ވަނަ މުބާރާތް، މިއަހަރުގެ ޑިސެމްބަރު މަހުގެ ތެރޭގައި ބާއްވަން ނިންމައިފި އެވެ.

ދަ ބެޑްމިންޓަން ކުލަބުން އިންތިޒާމު ކޮށްގެން ބާއްވާ މިއަހަރުގެ މުބާރާތް ތާވަލު ކޮށްފައި ވަނީ ޑިސެމްބަރު މަހުގެ 13 ވަނަ ދުވަހުން ފެށިގެން 19 ވަނަ ދުވަހުގެ ނިޔަލަށެވެ. މިއަހަރުގެ މުބާރާތް ވެސް ރާވާފައި ވަނީ އޯޕަން ކެޓަގަރީގެ އިތުރުން، ޕެރަ އެންޑް ސްޕެޝަލް އޮލިމްޕިކްސް ކެޓަގަރީ ވެސް ހިމެނޭ ގޮތަށެވެ.

މުބާރާތުގައި ނުވަ އަހަރުން ދަށުގެ އުމުރުފުރާގެ އިތުރުން، 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށް އަދި 19 އަހަރުން ދަށުގެ އުމުރުފުރާ ހިމެނެ އެވެ. މުބާރާތުގައި ބައިވެރިވުމުގެ ފުރުސަތު ކުރިއަށް އޮތް ދުވަސް ތަކުގެ ތެރޭގައި ހުޅުވައިލާނެ އެވެ.

ބެޑްމިންޓަން ކުލަބުން އެންމެ ފުރަތަމަ މި މުބާރާތް ބާއްވާފައި ވަނީ މިދިޔަ އަހަރު އެވެ. މިދިޔަ އަހަރުގެ މުބާރާތުގައި 350 ކުޅުންތެރިން ބައިވެރިވެފައިވާއިރު، 730 އަށް ވުރެ ގިނަ މެޗު ވަނީ ކުޅެފަ އެވެ. ފުރަތަމަ މުބާރާތުގައި ހަތް ޤައުމަކުން 30 އަށް ވުރެ ގިނަ އިންޓަނޭޝަނަލް ކުޅުންތެރިން ބައިވެރިވެފައިވެ އެވެ. 

ބެޑްމިންޓަން ކުލަބުން ބުނީ، މިއަހަރުގެ މުބާރާތުގައި އިންޓަނޭޝަނަލް ގިނަ ކުޅުންތެރިން ތަކެއް ބައިވެރި ވާނެ ކަމަށް އުންމީދު ކުރެވޭ ކަމަށެވެ.