ޕްރިމިއާ ލީގު: މެންޗެސްޓަރ ސިޓީއަށް ތަފާތު ބޮޑު މޮޅެއް !

އިނގިރޭސި ޕްރިމިއަރ ލީގުގައި ހޮނިހިރު ދުވަހުގެރޭ ކުޅުނު މެޗުން ފަސޭހަކަމާއެކު މެންޗެސްޓަރ ސިޓީ މޮޅުވެއްޖެއެވެ. ސިޓީ ރޭ މޮޅުވީ ކްރިސްޓަލް ޕެލެސްއާ ބައްދަލު ކުރި މެޗުން 0-5 ގެ ތަފާތު ބޮޑު ނަތީޖާއަކުންނެވެ. މެންޗެސްޓާ ސިޓީގެ އަމިއްލަ ދަނޑުގައި ރޭ ކުޅުނު މި މެޗުގައި އެޓީމުގެ ފަރާތުން މޮޅު ކުޅުމެއް ފެނިގެން ގޮސްފައިވާއިރު، މި މެޗުގެ ފުރަތަމަ ގޯލު ފުރަތަމަ ހާފްގެ 45 ވަނަ މިނެޓުގައި އެޓީމަށް ކާމިޔާބު ކޮށްދިނީ ލީރޯއި ސާނޭއެވެ.

މި ގޯލާއެކު ލީޑުގައި އޮވެ މެޗުގެ ފުރަތަމަ ހާފު ސިޓީން ނިންމާލިއިރު، ސިޓީގެ ދެވަނަ ގޯލު ދެވަނަ ހާފްގެ ކުރީކޮޅު ރަހީމް ސްޓާލިން ކާމިޔާބު ކޮށްދިންއިރު މެޗުގެ 59 ވަނަ މިނެޓުގައި އެޓީމުގެ ތިންވަނަ ގޯލު ވެސް ކާމިޔާބު ކޮށްދިނީ ސްޓާލިންއެވެ. ސިޓީގެ ހަތަރުވަނަ ގޯލު މެޗުގެ 79 ވަނަ މިނެޓުގައި ސާޖިއޯ އަގުއެރޯ ކާމިޔާބު ކޮށްދިންއިރު މިއީ އޭނާ ލީގުގައި ކާމިޔާބު ކުރި ހަވަނަ ގޯލެވެ. ސިޓީގެ ފަސްވަނަ ގޯލު މެޗުގެ 89 ވަނަ މިނެޓުގައި ކާމިޔާބު ކޮށްދިނީ ފަބިއަން ޑެލްޕްއެވެ. ސިޓީން ވަނީ އެންމެފަހުން ކުޅުނު ފަސް މެޗުގައިވެސް މޮޅުވެފައެވެ. ރޭގެ މި މޮޅާއެކު ސިޓީ މިވަގުތު އޮތީ 16 ޕޮއިންޓާއި އެކު ލީގުގެ އެއްވަނާގައެވެ.