ޝަރީޢަތް ފެށުމުގެ ކުރިން މީހެއްގެ އަނގަ ބަންދުކުރުމުގެ އަމުރެއް ނެރުމަކީ ފަލްސަފީ ގޮތުން ބަލާއިރު ހަމަޖެހޭ ކަމެއް ނޫން: ޝަމީމް
ޝަރީޢަތް ފެށުމުގެ ކުރިން މީހެއްގެ އަނގަ ބަންދުކުރުމުގެ އަމުރެއް ނެރުމަކީ ޤާނޫނީ ގޮތުންނާއި ފަލްސަފީ ގޮތުން ބެލިޔަސް ހަމަޖެހޭ ކަމެއް ނޫން ކަމަށް ކުރީގެ ޕީޖީ ހުސައިން ޝަމީމް ވިދާޅުވެއްޖެ. ޕީޖީ އޮފީހުގެ އަސްލު މަޤްޞަދަކީ އިންސާފު ޤާއިމުކުރުން ކަމަށްވާއިރު، ޑިމޮކްރެޓިކް ނިޒާމެއްގައި ފަނޑިޔާރުންނަކީ ރައްޔިތުންނަށް ޚިދުމަތްކުރާ ބައެއްކަން އޭނާ ފާހަގަކުރެއްވި. އަދި ޝަރީޢަތް ކުރުމަށް އިންތިހާއަށް ދަތިވާ ހާލަތެއްގައި ނޫނީ ޚިޔާލު ފާޅުކުރުން ހުއްޓުވުމުގެ އަމުރު ނެރެގެން ނުވާނެ ކަމަށްވެސް ޝަމީމް ވިދާޅުވި.
ކުރީގެ ޕްރޮސެކިއުޓަރ ޖެނެރަލް ހުސައިން ޝަމީމް. | ރާއްޖެ އެމްވީ
ޝަރީޢަތް ފެށުމުގެ ކުރިން މީހެއްގެ އަނގަ ބަންދުކުރުމުގެ އަމުރެއް ނެރުމަކީ ފަލްސަފީ ގޮތުން ބަލާއިރު ހަމަޖެހޭ ކަމެއް ނޫން ކަމަށް ކުރީގެ ޕްރެސެކިއުޓަރ ޖެނެރަލް ހުސައިން ޝަމީމް ވިދާޅުވެއްޖެ އެވެ.
ރާއްޖެޓީވީގެ ޕްރޮގްރާމެއްގައި ވާހަކަދައްކަވަމުން ޝަމީމް މިހެން ވިދާޅުވީ، ވަކި މައްސަލައަކާ ގުޅިގެން ވާހަކަ ނުދެއްކުމަށް ކޯޓުން ނެރެފައިވާ އަމުރަކަށް އިޝާރާތް ކުރައްވަ އެވެ.
ޝަމީމް ވިދާޅުވީ ކޯޓުން ނެރެފައިވާ އަމުރަކަށް ވާތީ އެ އަމުރަށް އިޙްތިރާމްކޮށް، އެއާ އެއްގޮތަށް ޢަމަލުކުރަންޖެހޭނެ ކަމަށް ޤަބޫލުކުރައްވާ ކަމަށެވެ. އަދި ހައިކޯޓުން އެ އަމުރަކީ ބާތިލު އަމުރެއް ކަމަށް ކަނޑަނާޅާ ހިނދަކު އެ އަމުރަށް ތަބާވާނެ ކަމަށްވެސް އޭނާ ވިދާޅުވި އެވެ. ނަމަވެސް އެ އަމުރުގެ ސްކޯޕް ބޮޑުވުމާއި އޭގައި ހުރި ޤާނޫނީ މައްސަލަތަކަކީ ޚިޔާލު ފާޅުކުރުމުގެ މިނިވަންކަމުގެ ތެރެއިން ބަހުސް ކުރެވިދާނެ ކަންކަން ކަމަށް ޝަމީމް ފާހަގަކުރެއްވި އެވެ.
ޕްރެސެކިއުޓަރ ޖެނެރަލްގެ އޮފީހުން މިފަދަ އަމުރަކަށް އެދުނު ސަބަބާ މެދު ސުވާލު އުފައްދަވަމުން ޝަމީމް ވިދާޅުވީ، އެއީ ދުވަހަކުވެސް ތަސައްވުރު ކުރި ކަމެއް ނޫން ކަމަށެވެ. ޕީޖީ އޮފީހުގެ މަސްއޫލިއްޔަތަކީ ވަކި މީހަކު ކުށްވެރިކުރުން ނުވަތަ ދޫކޮށްލުން ނޫން ކަމަށާއި، އެ އޮފީހުގެ އަސްލު މަޤްޞަދަކީ އިންސާފު ޤާއިމުކުރުން ކަމަށް އޭނާ ވިދާޅުވި އެވެ. ކުށްވެރިވާ މީހާގެ މައްޗަށް ދަޢުވާ ސާބިތުވުމާއި ކުށެއް ނެތް މީހާ މިނިވަންވުމަކީ ޕްރޮސިކިއުޓަރަށް ލިބޭ ގެއްލުމެއް ނޫން ކަމަށްވެސް ޝަމީމް ވިދާޅުވި އެވެ.
ޕީޖީ އޮފީހުން އަމުރަށް އެދުނީ ކީއްވެތޯ؟ އަޅުގަނޑަކަށްވެސް ނުއެއް އެނގޭ އަޅުގަނޑުމެން ދުވަހަކުވެސް ތަސައްވުރުވެސް ކުރި ކަމެއް ނޫން އެއީ ޕީޖީ އޮފީހަށް މި އޮންނަނީ ކޮންމެހެން ވަކި މީހެއް ކުށްވެރިކުރުމެއްވެސް ނޫން ވަކި މީހެއް ދޫކުރުމެއްވެސް ނޫން އިންސާފު ޤާއިމުކުރަން އެ އިންސާފު ޤާއިމުވަނީ ކުށްކުރާ މީހާގެ މައްޗަށް ދަޢުވާކޮށްގެން ކުށް ނުކުރާ މީހާ ދޫކޮށްލިން އެ އަނެއްހެން ބަލަންޏާ ޕްރޮސިކިއުޓަރަކަށް އޭނަގެ މަސައްކަތުގައި ގެއްލުންވާނެ އެއްވެސް ގޮތެއްނެތް މައްސަލައެއް ސާބިތުނުވެއްޖެއްޔާ އެ ކުށް ނުކުރާ މީހާ މިނިވަންވީ. މައްސަލައެއް ސާބިތުވެއްޖެއްޔާ ކުށްކުރާ މީހާ ބަންދުކުރެވުނީ އެހެންވީމަ ޕީޖީ އޮފީހުގެ އިންޓްރަސްޓެއް ޕީޖީ އޮފީހުގެ މަޞްލަޙަތެއް ނުވެން އޮންނާނެ އެގޮތަކަށްކުރީގެ ޕްރެސެކިއުޓަރ ޖެނެރަލް ހުސައިން ޝަމީމް
ޖުޑީޝަރީގެ ބާރުތައް އުފެދިގެން އައި ގޮތުގެ މައްޗަށް އަލިއަޅުވާލައްވަމުން ޝަމީމް ވިދާޅުވީ، ކޯޓުގެ ހުރުމަތް ކެނޑުމުގެ މަފްހޫމަކީ ކުރީގެ ރަސްކަމުގެ ނިޒާމުގެ ތެރެއިން އައިސްފައިވާ ކަމެއް ކަމަށެވެ. ކުރީގައި ފަނޑިޔާރުންނަކީ ރަސްގެފާނުގެ ބާރުތައް ތަންފީޒުކުރަން ތިބޭ ބައެއް ކަމަށާއި، އެހެންކަމުން ކޯޓުގެ ހުރުމަތް ކެނޑުމަކީ ރަސްގެފާނުގެ ހުރުމަތް ކެނޑުން ކަމުގައި ބެލެވުނު ކަމަށް އޭނާ ވިދާޅުވިއެވެ. ނަމަވެސް ޑިމޮކްރެޓިކް ނިޒާމެއްގައި ފަނޑިޔާރަކީ ރައްޔިތުންނަށް ޚިދުމަތްކުރާ ޚާދިމެއް ކަމަށް ޝަމީމް ސިފަކުރެއްވި އެވެ.
އިންޑިއާގެ ސުޕްރީމް ކޯޓުގެ ފަނޑިޔާރެއްގެ ވާހަކަފުޅަކަށް ރިއާޔަތް ކުރައްވަމުން ޝަމީމް ވިދާޅުވީ، ފަނޑިޔާރަށް އޭނާގެ މަސައްކަތް ކުރުމަށް އިންތިހާއަށް އުނދަގޫވާ ހާލަތެއްގައި ނޫނީ އަނގަ ބަންދުކުރުމުގެ އަމުރު ނެރެގެން ނުވާނެ ކަމަށެވެ. އަދި ޝަރީޢަތް ކުރުމަށް ދަތިވޭތޯ ނުވަތަ ނޫންތޯ އެނގޭނީ ޝަރީޢަތް ފެށުމުން ކަމަށްވާތީ، ޝަރީޢަތް ފެށުމުގެ ކުރިން އެފަދަ އަމުރެއް ނެރުމަކީ މުޅި ތަރުތީބުން ބެލިޔަސް ހަމަޖެހޭ ކަމެއް ނޫން ކަމަށް ޝަމީމް ވިދާޅުވި އެވެ.
