18 އަހަރުން ދަށުގެ ސާފް ޗެމްޕިއަންޝިޕް: ތިންވަނަ މެޗުން ވެސް ރާއްޖެ ބަލިވެއްޖެ

ބޫޓާންގައި ކުރިޔަށްދާ 18 އަހަރުން ދަށުގެ ސާފް ޗެމްޕިއަންޝިޕްގައި ރާއްޖޭގެ ގައުމީ ޓީމު ކުޅުނު ތިންވަނަ މެޗުން ވެސް ބަލިވެއްޖެއެވެ.

ނޭޕާލްއާ ދެކޮޅަށް ކުޅުނު މެޗުން ރާއްޖޭގެ ޓީމު ބަލިވެފައި ވަނީ 2-0ގެ ނަތީޖާއަކުންނެވެ.

މި މެޗުގައި ރާއްޖޭގެ ޓީމުގެ ފަރާތުން މާ އެދެވޭ ކުޅުމެއް ދެއްކިފައިނުވާއިރު ނޭޕާލްއިން ވަނީ މުޅި މެޗުވެސް ކޮންޓްރޯލްކޮށް ރާއްޖޭގެ ގޯލާއި އަމާޒުކޮށް ގިނަ ހަމަލާތަކެއް ފޮނުވާލާފައެވެ. އެގޮތުން ނޭޕާލްއިން ވަނީ މެޗުގެ 7 ވަނަ މިނެޓުގައި ލީޑު ނަގާފައެވެ. މި ލަނޑު ރާއްޖޭގެ ޓީމުގެ ޑިފެންސަށް ހެދުނު ގޯހެއްގެ ފައިދާ ނަގައި ނޭޕާލްއަށް ކާމިޔާބު ކޮށްދިނީ އެ ޓީމުގެ ޑިފެންޑާ ރޯމަން ލިމްބޫއެވެ. މި ލަނޑަށްފަހު ވެސް ނޭޕާލްގެ ޓީމުން ވަނީ ރާއްޖޭގެ ގޯލަށް އަމާޒުކޮށް ފުލުފުލުގައި ހަމަލާ ފޮނުވާލާފައެވެ. އެހެނަސް ފުރަތަމަ ހާފު ނިމިފައިވަނީ 1-0 ގެ ނަތީޖާއަކުންނެވެ.

ނޭޕާލްއިން އެ ޓީމުގެ ދެވަނަ ލަނޑު ޖަހާފައި ވަނީ މެޗުގެ 57 ވަނަ މިނެޓުގައެވެ. މި ލަނޑު އެ ޓީމުގެ ކުޅުންތެރިޔަކު ނަގައިދިން ހުރަހަކުން ކާމިޔާބު ކޮށްދިނީ ރާޖިން ސުއްބާއެވެ. މެޗުގެ ފަހުވަގުތުކޮޅުގައި ނޭޕާލްއަށް ޕެނަލްޓީއެއް ވެސް ލިބުނެއެވެ. އެހެނަސް އެ ޓީމުގެ އަބީޝޭކް ރިޖާލް ފޮނުވާލި ޕެނަލްޓީ އަމާޒުވީ ގޯލުގެ ދަނޑިއާއެވެ.

މެޗަށް ފަހު ވާހަކަ ދައްކަމުން ރާއްޖޭގެ ކޯޗު އިހުސާން އަބްދުލް ޢަނީ (ސާންތި) ބުނެފައި ވަނީ ޖެހިޖެހިގެން މެޗުތައް ކުޅެންޖެހުމާ ވިދިގެން ކުޅުންތެރިންގެ ފަރާތުން ވަރަށް ބޮޑަށް ވަރުބަލިކަން ފެނުނު ކަމަށާއި ނޭޕާލްއަށް ރިކަވާވާން ފުރުސަތު ލިބުނު ނަމަވެސް ރާއްޖެއަށް އެ ފުރުސަތު ނުލިބުމަކީ މެޗުން ބަލިވުމުގެ އެންމެ ބޮޑު އެއް ސަބަބު ކަމަށެވެ. ކުޅުނު ތިން މެޗުން ވެސް ބަލިވުމާ ގުޅިގެން މުބާރާތުގެ ވަނައެއް ހޯދުމުގެ ފުރުސަތު ރާއްޖެއަށް ވަނީ ގެއްލިފައެވެ. ރާއްޖޭގެ ޓީމުން މުބާރާތުގައި ކުޅޭ ފަހު މެޗުގައި ނުކުންނާނީ ސަރަހައްދުގެ ގަދަ ބާރެއް ކަމަށްވާ އިންޑިއާއާއި ދެކޮޅަށެވެ.