އެލްޖީއޭގެ ރައީސް ކަމަށް މިނިސްޓަރު މޫސާ ޒަމީރު އައްޔަން ކުރައްވައިފި
ލޯކަލް ގަވަމަންޓް އޮތޯރިޓީ (އެލްޖީއޭ) ގެ ބޯޑުގެ ރައީސްކަމަށް ފިނޭންސް މިނިސްޓަރު މޫސާ ޒަމީރު އައްޔަންކުރެއްވީ، އެ އޮތޯރިޓީގެ ޒިންމާތައް ފިނޭންސް މިނިސްޓްރީގެ ދަށަށް ބަދަލުކުރުމާ ގުޅިގެން. ލާމަރުކަޒީ ގާނޫނު ބަޔާންކުރާ ގޮތުން އެލްޖީއޭގެ ބޯޑުގެ ރައީސްކަން ކުރައްވަންޖެހެނީ އެ އިދާރާގެ މަސްއޫލިއްޔަތު ހަވާލުކޮށްފައިވާ ވުޒާރާގެ ވަޒީރު.
ރައީސް ޑރ. މުހައްމަދު މުއިއްޒުގެ ފިނޭންސް މިނިސްޓަރު މޫސާ ޒަމީރު | ރައީސް އޮފީސް
ލޯކަލް ގަވަމަންޓް އޮތޯރިޓީ (އެލްޖީއޭ) ގެ ބޯޑުގެ ރައީސްގެ މަގާމަށް، މިނިސްޓަރ އޮފް ފައިނޭންސް މޫސާ ޒަމީރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބުރާސްފަތި ދުވަހު އައްޔަން ކުރައްވައިފި އެވެ.
މި ބަދަލު ގެންނަވާފައިވަނީ ސަރުކާރުގެ ކެބިނެޓަށް ގެނައި ބަދަލުތަކާއެކު، ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާ ބެހޭ ވުޒާރާ އުވާލައި، އެލްޖީއޭގެ ޒިންމާތައް ފިނޭންސް މިނިސްޓްރީގެ ދަށަށް ބަދަލުކުރުމާ ގުޅިގެންނެވެ.
މީގެ ކުރިން އެލްޖީއޭގެ ބޯޑުގެ ރައީސްގެ މަގާމުގައި ހުންނެވީ، އުވާލާފައިވާ ސިޓީސް މިނިސްޓްރީގެ ވަޒީރު އާދަމް ޝަރީފް އުމަރެވެ. ނަމަވެސް ވަޒީރުކަމުގެ މަގާމުން އާދަމް ޝަރީފް އިސްތިއުފާދެއްވުމާ ގުޅިގެން އެ މަގާމު ވަނީ ހުސްވެފަ އެވެ.
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 60 ވަނަ މާއްދާގައިވާ ގޮތުން، އެލްޖީއޭގެ ބޯޑުގެ ރައީސްކަން ކުރައްވާނީ އެ އޮތޯރިޓީގެ މަސްއޫލިއްޔަތު ހަވާލުކޮށްފައިވާ ވުޒާރާގެ ވަޒީރެވެ. އަދި ގާނޫނުއަސާސީގެ 140 ވަނަ މާއްދާ އާއި ލާމަރުކަޒީ ގާނޫނުގެ 59 ވަނަ މާއްދާގެ ދަށުން، އެލްޖީއޭގެ ފަރާތުން ރައްޔިތުންގެ މަޖިލީހަށް ޖަވާބުދާރީވާނީ ރައީސުލްޖުމްހޫރިއްޔާ އައްޔަންކުރައްވާ މި ވަޒީރެވެ.
އެލްޖީއޭގެ ބޯޑަކީ ރައީސް އާއި ސީއީއޯ ހިމެނޭ ގޮތަށް ޖުމްލަ ނުވަ މެންބަރުންގެ މައްޗަށް އެކުލެވިގެންވާ ބޯޑެކެވެ. ބޯޑުގެ ރައީސްގެ މައިގަނޑު ޒިންމާއަކީ ބޯޑު ބައްދަލުވުންތައް ބޭއްވުން ކަމަށްވާއިރު، އޮތޯރިޓީގެ ދުވަހުން ދުވަހަށް ކުރަންޖެހޭ މަސައްކަތްތައް ހިންގުމަކީ ސީއީއޯގެ ޒިންމާއެކެވެ. މި ދެ މަގާމަށްވެސް ބޭފުޅުން އައްޔަންކުރައްވަނީ ރައީސުލްޖުމްހޫރިއްޔާއެވެ. މި ސަރުކާރުގައި އެލްޖީއޭގެ ސީއީއޯގެ މަގާމަށްވެސް ވަނީ ބަދަލުތަކެއް ގެނެސްފައެވެ. އެގޮތުން ފުރަތަމަ އެ މަގާމުގައި ހުންނެވި ޑރ. މަރިޔަމް ޒުލްފާގެ ބަދަލުގައި މިހާރު އެ މަގާމުގައި ހުންނެވީ މުހައްމަދު ނިމާލް އެވެ.
ސިޓީތަކާއި އިދާރީ ދާއިރާތައް ހިންގުމާ ބެހޭ ވުޒާރާ އުވާލި ނަމަވެސް، އެލްޖީއޭ އިން މީގެ ކުރިން ބުނެފައިވަނީ އެކަމުގެ ސަބަބުން ގާނޫނީ އެއްވެސް ހުސްކަމެއް ނާންނާނެ ކަމަށެވެ. މީގެ ކުރީގެ ސަރުކާރު ތަކުގައި އެލްޖީއޭގެ ރައީސްކަން އާންމުކޮށް ކުރައްވަނީ ހޯމް މިނިސްޓަރެވެ. ނަމަވެސް މި ސަރުކާރުން ވަނީ ކައުންސިލްތަކުގެ ކަންކަން ބެލެހެއްޓުމަށް ވަކި ވުޒާރާއެއް އުފައްދައި، ފަހުން އެ މަސައްކަތްތައް ފިނޭންސް މިނިސްޓްރީގެ ދަށަށް ބަދަލުކޮށްފަ އެވެ.
