ބީއެމްއެލްގެ ޖުމްލަ އެސެޓް ފުރަތަމަ ފަހަރަށް 60 ބިލިއަން ރުފިޔާއަށްވުރެ އިތުރުވެއްޖެ
ބޭންކް އޮފް މޯލްޑިވްސްގެ ތާރީޚުގައި ފުރަތަމަ ފަހަރަށް ޖުމްލަ އެސެޓް 60 ބިލިއަން ރުފިޔާއަށް އަރާފައިވާއިރު، މިއަހަރުގެ ފުރަތަމަ ކުއަޓަރުގައި ޓެކުހަށް ކެނޑުމަށްފަހު ސާފު ފައިދާގެ ގޮތުގައި 631 މިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 27 އިންސައްތައިގެ ކުރިއެރުމެއް ކަމަށްވާއިރު، ކަސްޓަމަރުން ބޭންކަށް ޖަމާކުރި ފައިސާގެ އަދަދުވެސް ވަނީ 40.7 ބިލިއަން ރުފިޔާއަށް އިތުރުވެފައެވެ. މި ހަރުދަނާ ނަތީޖާއިން ދައްކުވައިދެނީ ބޭންކަށް ކަސްޓަމަރުން ކުރާ އިތުބާރާއި ބޭންކުގެ މާލީ ހާލަތު ދުވަހުން ދުވަހަށް ވަރުގަދަވަމުންދާ ކަމެވެ.
ބޭންކް އޮފް މޯލްޑިވްސް. | ބީއެމްއެލް
ބޭންކް އޮފް މޯލްޑިވްސް (ބީއެމްއެލް)ގެ ޖުމްލަ އެސެޓް 60 ބިލިއަން ރުފިޔާއަށްވުރެ އިތުރުވެފައިވާ ކަމަށް ބޭންކުން ހޯމަ ދުވަހު ނެރުނު މިއަހަރުގެ ފުރަތަމަ ކުއަޓަރ ރިޕޯޓުން ދައްކައިފި އެވެ.
ފުރަތަމަ ކުއަޓަރ ރިޕޯޓުގައި ބޭންކުން ހާމަކޮށްފައިވާ ގޮތުގައި ކުއާޓަރ ނިމުނު އިރު ބޭންކުގެ ޖުމްލަ އެސެޓް 60.6 ބިލިއަން ރުފިޔާއަށް ވަނީ އަރައިފައިވާއިރު ބޭންކުގެ ދިގު ތާރީހުގައިވެސް ޖުމްލަ އެސެޓް 60 ބިލިއަނަށްވުރެ އިތުރުވި ފުރަތަމަ ފަހަރު ކަމަށް ރިޕޯޓުގައިވެ އެވެ. 2025 ވަނަ އަހަރު ނިމުނުއިރު އެސެޓްގެ އަގު ހުރީ 55.8 ބިލިއަން ރުފިޔާއެވެ.
ކަސްޓަމަރުން ބޭންކަށް ކުރާ އިތުބާރު ދެމެހެއްޓުމުގެ ނަތީޖާއެއްގެ ގޮތުން، ވޭތުވެދިޔަ ކުއަޓަރގައި ކަސްޓަމަރުން ބޭންކަށް ޖަމާކުރި ފައިސާގެ ޖުމްލަ އަދަދު 40.7 ބިލިއަން ރުފިޔާއަށް ވަނީ އަރައިފަ އެވެ. މީގެ ތެރޭގައި ބޮޑު ހިއްސާއަކީ ބޭރު ފައިސާއިން ޖަމާކޮށްފައިވާ އަދަދެވެ.
ރިޕޯޓުގައި ވާގޮތުން، ވޭތުވެދިޔަ ކުއަޓަރގައި ބޭންކުގެ ޖުމްލަ އާމްދަނީގެ ގޮތުގައި 1.24 ބިލިއަން ރުފިޔާ ލިބިފައިވެ އެވެ. ބޭންކުގެ ހިންގުމުގެ ފައިދާގެ ގޮތުގައި 879 މިލިއަން ރުދިޔާ ލިބިފައިވާއިރު، ޓެކުހަށް ކެނޑުމަށް ފަހު ސާފު ފައިދާގެ ގޮތުގައި 631 މިލިއަން ރުފިޔާ ލިބިފައިވެ އެވެ. މިއީ ވޭތުވެ ދިޔަ އަހަރުގެ މި މުއްދަތާ އަޅާބަލާއިރު 27% އިތުރުވުމެކެވެ.
ވޭތުވެ ދިޔަ އަހަރު، ބޭންކުގެ 43 އަހަރުގެ ދިގު ތާރީހުގައި އެންމެ ރަނގަޅު ނަތީޖާ ހާސިލުކުރުމަށް ފަހު، މި އަހަރުގެ ފުރަތަމަ ކުއާޓަރގައިވެސް ބޭންކުން ވަނީ ހަރުދަނާ ނަތީޖާއެއް ދައްކައިފަ އެވެ. މި ނަތީޖާއިން ބޭންކަށް ދުވަހުން ދުވަހަށް ލިބެމުން އަންނަ ހަލުވި ކުރިއެރުން ރަންޒުކޮށްދެ އެވެ.
