ތައިލެންޑުގައި ކުރިއަށްދާ ވޮލީ މުބާރާތުގައި ރާއްޖޭގެ ވެޓަރަންސް ޓީމު ވާދަ ކުރަނީ

ތައިލެންޑުގައި ކުރިއަށްދާ ވޮލީ ބޯޅަ މުބާރާތެއްގައި ރާއްޖޭގެ ވެޓަރަންސް ވޮލީ ކުޅުންތެރިން މުބާރާތުގައި ވާދަ ކުރުމަށް ޓީމު ތައިލެންޑަށް ގޮސްފި އެވެ.

ތައިލެންޑުގެ ކޮ ސަމުއި ގައި އޮންނަ މި މުބާރާތަކީ، ސަމުއި އޯޕަން މުބާާރާތެވެ. މުބާރާތް ކުރިއަށް ދާނީ މާޗު މަހުގެ 27 ވަނަ ދުވަހުން ފެށިގެން، 29 ވަނަ ދުވަހުގެ ނިޔަލަށެވެ. ދެ ދުވަހުގެ މުއްދަތަކަށް ކުރިއަށްދާ މި މުބާރާތުގައި ވާދަ ކުރާ ރާއްޖޭގެ ޓީމު ތައިލެންޑަށް ގޮސްފައި ވަނީ ހޯމަ ދުވަހުގެ ރޭ އެވެ.

މި މުބާރާތުގައި ބައިވެރިވާ ރާއްޖޭގެ ޓީމުގައި ކުރީގެ މަޝްހޫރު ގިނަ ކުޅުންތެރިން ހިމެނެ އެވެ. އެގޮތުން ވޮލީގެ ލެޖެންޑް ސައްޔިދު އަލީގެ އިތުރުން، މުޙައްމަދު ނަދީމް (ނަދީމްބެ) އާއި، އިބްރާހީމް ޝިހާމް (ސަޑިއްކެ) އާއި، މުމްތާޒް އަލީ އާއި، އަލީ ޝިމާލް އާއި، އީސާ އަލީ އާއި، މުޙައްމަދު ފައިޞަލް ފަދަ ކުޅުންތެރިން ހިމެނެ އެވެ. މިއީ ކުރީގެ މަޝްހޫރު ކުޅުންތެރިންނަށް ވާއިރު، މީގެ ތެރެއިން ގިނަ ކުޅުންތެރިން އަންނަނީ މިހާރު ވެސް ކޯޗުންގެ ގޮތުގައި މަސަައްކަތް ކުރަމުންނެވެ. ނަދީމްބެ އަކީ ރާއްޖޭގެ ޤައުމީ އަންހެން ޓީމުގެ ކޯޗެވެ. 

މުބާރާތުގައި ވާދަ ކުރުމަށް ޓީމު ގޮސްފައިވާއިރު، މޯލްޑިވްސް ވޮލީ ބޯޅަ ވެޓަރަންސްގެ ނައިބު ރައީސް އަޙުމަދު ވަޙީދު (ވައްޑެ) ވިދާޅުވީ ޓީމު މުބާރާތުގައި ވާދަ ކުރުމަށް ގޮސްފައި ވަނީ ގިނަ ތައްޔާރީ ތަކަކަށް ފަހު ކަމަށެވެ. މީގެ އިތުރުން މުބާރާތުގައި ބައިވެރިވާ ޓީމަށް ކުޅިވަރު ވުޒާރާގެ އިތުރުން، ބައެއް ހެޔޮ އެދޭ ފަރާތް ތަކުން ވެސް އެހީތެރިން ދީފައިވާ ކަމަށް ފާހަގަ ކޮށްފައިވެ އެވެ. 

މޯލްޑިވްސް ވޮލީ ބޯލް ވެޓަރަންސްގެ ރައީސް އަކީ ސައްޔިދު ޢަލީ އެވެ. ސައްޔިދު ޢަލީ އަކީ ރާއްޖޭގައި ފާހަގަ ކޮށްލެވުނު ވޮލީ ކުޅުންތެރިޔަކަށްވާއިރު، މިހާރު ވެސް އަންނަނީ ވޮލީގެ ކަންކަމުގައި ޙަރަކާތްތެރި ވަމުންނެވެ. މީގެ އިތުރުން ނަދީމްބެ އާއި ވައްޑެ އަކީ މޯލްޑިވްސް ވޮލީ ބޯލް ވެޓަރަންސްގެ ނައިބު ރައީސުންނެވެ.

މީގެ ކުރިން މޯލްޑިވްސް ވޮލީ ބޯލް ވެޓަރަންސް އިން ވަނީ 2023 ވަނަ އަހަރާއި، 2024 ވަނަ އަހަރު ވެސް މި މުބާރާތުގައި ވާދަ ކޮށްފަ އެވެ. މީގެ ތެރެއިން 2023 ވަނަ އަހަރު އޮތް މުބާރާތުން ރާއްޖޭގެ ޓީމު ވަނީ ބްރޯންޒް މެޑަލް (ތިން ވަނަ) ހޯދައިފަ އެވެ.