ނަދީމް މަރާލި މައްސަލައިގައި 4 މީހެއްގެ މައްޗަށް ދައުވާކޮށްދިނުމަށް އެދިއްޖެ
18 ސެޕްޓެމްބަރު 2017 | ހޯމަ 19:16ނަދީމަށް ހަމަލާދިނީ ޖުލައި 27 ވަނަ ދުވަހުގެރޭ
ހއ. ތަކަންދޫ، އިބްރާހިމީ ހިޔާ، ނަދީމު އަބްދުއްރަހީމް (ނަޑޭ)
ޖުލައި މަހުގެ 27 ވަނަ ދުވަހުގެ އިރުއޮއްސުނު ވަގުތު ލޮނުޒިޔާރަތް މަގުގައި ހުންނަ ޓާމިނަލް ކެފޭއަށް، މޫނު ނިވާކޮށްގެން ތިބި ބަޔަކު ވަދެ، ހއ. ތަކަންދޫ، އިބްރާހިމީ ހިޔާ، ނަދީމު އަބްދުއްރަހީމް (ނަޑޭ)، 23، އަށް ހަމަލާދީ ޒަޚަމް ކޮށްލުމާއި ގުޅިގެން އޭނާ މަރުވި މައްސަލައިގެ ތަޙުޤީޤު ނިންމައި އެ ކުށުގައި ތުޙުމަތުކުރެވޭ މީހުންގެ މައްޗަށް ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވައިފިއެވެ.
ނަދީމް މަރުވެފައިވަނީ އޭނާއަށް ދިން ހަމަލާގައި ލިބުނު ޒަޚަމްތަކަށް ފަރުވާ ދެމުންދަނިކޮށް ޖުލައި 29 ވަނަ ދުވަހުއެވެ.
ފުލުހުން ބުނީ މި މައްސަލައިގައި 4 މީހެއްގެ މައްޗަށް ދައުވާ ކޮށްދިނުމަށް އެދިފައިވާ ކަމަށެވެ.
މި މައްސަލަ އާއި ގުޅިގެން ފުލުހުން ހިންގި އެކި އޮޕަޜޭޝަންތަކުގައި މައްސަލައާއި ގުޅޭ އެކި މީހުން ވަނީ ހައްޔަރުކޮށްފައެވެ. އެގޮތުން އޯގްސްޓް 10 ވަނަ ދުވަހާއި އެރޭ ހިންގި އޮޕަރޭޝަނެއްގައި ސަބުދެރިޔާ މަގުގައި ހުންނަ ގ. ޖެލީފިޝް ބަލައި ފާސްކުރުމަށް ފަހު ފުލުހުން ވަނީ ނަދީމްއަށް ހަމަލާދިނުމުގައި ބައިވެރިވިކަމަށް ތުޙުމަތުކުރެވޭ މީހަކު އެގެއިން ހައްޔަރުކޮށްފައެވެ.
މި މައްސަލައިގައި ގ. ޖެލީފިޝްއިން ހައްޔަރު ކޮށްފައިވަނީ ނުރައްކާތެރި ކުށްވެރިއެ އްކަމަށް ކަނޑައަޅައި މީގެ ކުރިން މޮނިކޮން އަމުރުގެ ދަށުން ޓެގް ވެސް އެޅުވި، ގ. ޝާރާޒް، މުހައްމަދު މަފާޒް ޙުސައިން ސަލީމް (ޕެންސިލް) އެވެ. މޮނިކޮން އަމުރާއި ޚިލާފުވެގެން އޭރު މަފާޒްގެ މައްޗަށް ދައުވާވެސް ކޮށްފައިވެއެވެ.
ހައްޔަރު ކުރެވުނު ފަހުން އެކި ފަހަރުމަތިން މަފާޒްގެ ބަންދުގެ މުއްދަތު ވަނީ އިތުރުކޮށްފައެވެ.
މަފާޒްގެ އިތުރުން ދެން މި މައްސަލައިގައި ހައްޔަރު ކޮށްފައިވަނީ ކޮން ބައެއްކަން މީޑީއާއަށް ހާމަވެފައެއް ނުވެއެވެ. އަދި ދައުވާ ކުރުމަށް އެދި ޕީޖީއަށް ފޮނުވި ތުހުމަތު ކުރެވޭ 4 މީހުންގެ ތެރޭގައި މަފާޒް ހިމެނޭކަން ވެސް ފުލުހުން ކަށަވަރު ކޮށްދީފައެއް ނުވެއެވެ.
ނަދީމަށް ހަމަލާދީފައި ވަނީ މޫނު ނިވާކޮށްގެން ތިބި ދެމީހެކެވެ. އެ ހަމަލާގައި ނަދީމްގެ ގަޔަށާއި ބޮލަށް ވަޅިހަރާފައިވެއެވެ.
