މާލެ ސަރަހައްދުގެ 35 މިސްކިތެއްގައި ދަމުނަމާދު ކުރާނެ: އިސްލާމިކް މިނިސްޓްރީ
މި އަހަރުގެ ރަމަޟާން މަހުގެ ފަހު ދިހައިގައި މާލެ ސަރަހައްދުގެ 35 މިސްކިތެއްގައި ދަމުނަމާދު ކުރުމަށާއި، 25 މިސްކިތެއްގައި އިއުތިކާފަށް ތިބުމަށް އިސްލާމިކް މިނިސްޓްރީން ވަނީ ހަމަޖައްސާފައި. މީގެ ތެރޭގައި މާލެ، ހުޅުމާލެ އަދި ވިލިމާލޭގެ މިސްކިތްތައް ހިމެނޭއިރު، މިއީ ރަމަޟާން މަހުގެ ފަހު ދިހައިގެ މަތިވެރި ސަވާބާއި ދަރުމަ ހޯދުމަށް މަގުފަހިކޮށްދިނުމަށް ކޮންމެ އަހަރަކުވެސް ކުރިއަށްގެންދާ އިންތިޒާމެއް.
އިސްލާމީ މަރުކަޒުގައި ނަމާދު ކުރުމަށް ޖަމާއަތް ހަދައިގެން. | އިސްލާމިކް މިނިސްޓްރީ
މި ރަމަޟާން މަހުގެ ފަހު ދިހައިގައި ދަމުނަމާދު ކުރުމާއި އިއުތިކާފަށް ތިބުމަށް ހަމަޖެހިފައިވާ މިސްކިތްތައް ކަނޑައަޅައިފި އެވެ.
އިސްލާމިކް މިނިސްޓްރީން ބުނީ، 1447 ވަނަ އަހަރުގެ ރަމްޟާންމަހުގެ ފަހުދިހައިގައި މާލެ ސަރަހައްދުގެ 35 މިސްކިތެއްގައި ދަމު ނަމާދު ކުރާނެ ކަމަށެވެ. އަދި އިއުތިކާފަށް އިނުމަށް 25 މިސްކިތެއް ހަމަޖައްސާފައިވާ ކަމަށެވެ.
މިނިސްޓްރީން ބުނީ، ދަމު ނަމާދު ކުރުމަށް ހަމަޖެހިފައިވަނީ މާލޭގެ 21 މިސްކިތާއި، ހުޅުމާލޭ ފޭސް-1ގެ 6 މިސްކިތާއި، ހުޅުމާލޭ ފޭސް-2 ގެ 5 މިސްކިތެއްގެ އިތުރުން ވިލިމާލޭގެ 03 މިސްކިތެއްގައި ކަމަށެވެ.
މީގެ އިތުރުން އިއުތިކާފަށް ތިބުމަށް މާލޭގެ 16 މިސްކިތެއް ހަމަޖައްސާފައިވާއިރު، ހުޅުމާލެ ފޭސް-1 ގެ 5 މިސްކިތް، ހުޅުމާލެ ފޭސް-2 އަކުން 3 މިސްކިތް ހަމަޖައްސާފައިވެ އެވެ. އަދި ވިލިމާލޭގައި 1 މިސްކިތް ހަމަޖައްސާފައިވެ އެވެ.
ކޮންމެ ރޯދަމަހެއްގެ ވެސް ފަހު 10 އާ ދިމާކޮށް، އިސްލާމިކް މިނިސްޓްރީން ދަމުނަމާދު ކުރުމާއި، އިއުތިކާފަށް ތިބޭ މިސްކިތްތައް ކަނޑައަޅައެވެ.
ދަމުނަމާދަކީ، އިޝާނަމާދަށް ފަހު ކިތަންމެ ކުޑަ ހިނދުކޮޅަކު ނަމަވެސް ނިދާލުމަށްފަހު ތެދުވެ، ފަތިސްވަގުތުގެ ކުރިން ދެރަކުޢަތުން، ދެރަކުއަތުން ސަލާމްދެމުން ކުރާ ނަމާދެކެވެ. މިއީ ގަދަވެގެންވާ ސުންނަތް ނަމާދެކެވެ.
ދަމު ނަމާދަކީ ހަމައެކަނި ރަމަޟާންމަހު ނުވަތަ ރަމަޟާން މަހުގެ ފަހުދިހައިގައި ކުރާ ނަމާދެއް ނޫނެވެ. އެހެނަނަމަވެސް ރަމަޟާން މަހަކީ މަތިވެރި މައްސަރަކަށްވެފައި، ރަމަޟާން މަހުގެ އަޅުކަމުގެ ސަވާބާއި ދަރުމަ އިތުރުކަމާއެކު ރަމަޟާންމަހު ދަމުނަމާދުކުރުމަށް މުސްލިމުން ދޭ ސަމާލުކަން އިތުރުކުރެ އެވެ.
ކޮންމެ ރޯދަމަހެއްގެ ވެސް ފަހު ދިހައިގައި ރަސޫލުﷲ صلى الله عليه و سلم އިޢްތިކާފަށް އިންނަވާ ކަމަށް ޘާބިތުވެފައިވެއެވެ. ހަމައެހެންމެ، އެކަލޭގެފާނުގެ އެންމެ ފަހު ރޯދަމަހުގައި ވިހި ދުވަހު އިޢްތިކާފު ކުރެއްވިކަމަށްވެ އެވެ.
